କନକ ବ୍ୟୁରୋ : ଗୁଣାତ୍ମକ ଶିକ୍ଷା ବିନା ଦେଶ ତଥା ରାଜ୍ୟର ବିକାଶ ଅସମ୍ଭବ । ଏଥିପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ପ୍ରତିବର୍ଷ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ଶିକ୍ଷକ ନିଯୁକ୍ତି ସଂଖ୍ୟା ବି ବଢ଼ିଛି । କିନ୍ତୁ ଗ୍ରାଉଣ୍ଡଜିରୋରେ ଯେଉଁଭଳି ତଥ୍ୟ ସାମନାକୁ ଆସୁଛି ତାହା ଶିକ୍ଷା ବ୍ୟବସ୍ଥାର ବିକଳ ଚିତ୍ରକୁ ପଦାରେ ପକାଇଛି ।

Advertisment

ରାଜ୍ୟର ତିନି ଜିଲ୍ଲାରୁ ଆସିଥିବା ତିନି ସ୍କୁଲର ଚିତ୍ର ଶିକ୍ଷା ବ୍ୟବସ୍ଥାର ଅବ୍ୟବସ୍ଥାକୁ ପଦାରେ ପକାଇଛି । ଦେଶରେ ପ୍ରଥମ ଥର ପାଇଁ ଶିକ୍ଷକ ସଂଖ୍ୟା କୋଟିଏ ପାର କରିଥିବା ନେଇ ରିପୋର୍ଟ ପ୍ରକାଶ ପାଇଥିବାବେଳେ ଓଡ଼ିଶାରେ ହଜାରେରୁ ଅଧିକ ସ୍କୁଲରେ ଜଣେ ଲେଖାଏଁ ଶିକ୍ଷକରେ ଚାଲିଛି । ଏଥିସହ ପାଠପଢ଼ା ମଝିରେ ଶିକ୍ଷକ ବଦଳି ସମସ୍ୟାକୁ ବଢ଼ାଇ ଦେଇଛି । ଯାହାଫଳରେ ସ୍କୁଲ ପ୍ରତି ପିଲାଙ୍କ ଆଗ୍ରହ କମିବା ସହ ଅଧାରୁ ପାଠ ଛାଡୁଛନ୍ତି । କେନ୍ଦ୍ର ଶିକ୍ଷା ମନ୍ତ୍ରଣାଳୟର ରିପୋର୍ଟ ଅନୁସାରେ, ଜାତୀୟସ୍ତରରେ ସ୍କୁଲ ଶିକ୍ଷାରେ ଉନ୍ନତି ଆସୁଥିବା ବେଳେ ଓଡ଼ିଶାରେ ସ୍ଥିତି ଭିନ୍ନ । ଓଡ଼ିଶାରେ ବଢୁଛି ଡ୍ରପଆଉଟ ଛାତ୍ରଛାତ୍ରୀଙ୍କ ସଂଖ୍ୟା । ୨୦୨୩-୨୪ ବର୍ଷ ମାଧ୍ୟମିକ ଶିକ୍ଷାରେ ଡ୍ରପଆଉଟ ହାର ୯.୧% ଥିବାବେଳେ ୨୦୨୪-୨୫ବର୍ଷରେ ଏହା ୯.୮% କୁ ବୃଦ୍ଧି ପାଇଛି ।

ଖାଲି ଶିକ୍ଷକ ଅଭାବ ନୁହେଁ, ଏବେ ବି ସବୁ ଛାତ୍ରଛାତ୍ରୀଙ୍କୁ ସ୍କୁଲ ପୋଷାକ ମିଳିପାରିନି । ଅନେକ ସ୍ଥାନରେ ପାଠ୍ୟପୁସ୍ତକ ମିଳିନଥିବା ଅଭିଯୋଗ ହେଉଛି । ଅଭିଭାବକଙ୍କ କହିବା କଥା ଖାଲି ଶିକ୍ଷା ନୀତି ଘୋଷଣା କଲେ ହେବନି । ପ୍ରଥମେ ଭିତ୍ତିଭୂମି ସଜାଡିବାକୁ ପଡିବ । ଶିକ୍ଷକ, ଅଭିଭାବକ ମଧ୍ୟରେ ସୁସମ୍ପର୍କ ରଖିବାକୁ ହେବ । ତେବେ ଯାଇ ଡ୍ରପ ଆଉଟ୍ ସଂଖ୍ୟା କମିବ । ତେବେ ପୂର୍ବ ସରକାରକୁ ଦୋଷ ଦେଇ ମୁଣ୍ଡରୁ ଦୋଷ ଖସାଇଛନ୍ତି ଗଣଶିକ୍ଷା ମନ୍ତ୍ରୀ ।

ସରକାରୀ ଶିକ୍ଷା ବ୍ୟବସ୍ଥାର ତ୍ରୁଟି ଯୋଗୁଁ ପିଲା ଟ୍ୟୁସନ ଉପରେ ଭରସା କରୁଛନ୍ତି । ଏକଥା ସମସ୍ତେ ଜାଣନ୍ତି । କିନ୍ତୁ ଛାତ୍ରଛାତ୍ରୀ କେମିତି ସରକାରୀ ସ୍କୁଲ ମୁହାଁ ହେବେ ସେଥିପାଇଁ କୌଣସି ବ୍ୟବସ୍ଥା କରାଯାଉନି । ମାଧ୍ୟମିକ ଶିକ୍ଷାରେ ଡ୍ରପଆଉଟ୍ ହାର ବଢ଼ୁଥିଲେ ବି ନିର୍ଦ୍ଦେଶକ ଓ ଅଧିକାରୀମାନଙ୍କ ଚିନ୍ତା ନାହିଁ ।