ଡିଗ୍ରୀ ପରେ ବି ମିଳୁନି ଚାକିରି

କନକ ବ୍ୟୁରୋ: ରାଜ୍ୟରେ କମୁଛି ଆଇଟିଆଇ, ଡିପ୍ଲୋମା ଓ ଇଞ୍ଜିନିୟରିଂ ଚାହିଦା । ଡିଗ୍ରୀ ହାସଲ କରିବା ପରେ ବି, ମିଳୁନି ଚାକିରି । ରାଜ୍ୟରେ ଏବେ ବି ଅନେକ ଛାତ୍ର ଚାକିରି ଅପେକ୍ଷାରେ ଥିବା ଗୃହରେ ଉତ୍ତର ରଖିଛନ୍ତି ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ । ଶୁକ୍ରବାର ବିଧାନସଭାରେ ବିଜେଡି ବିଧାୟକ ଧ୍ରୁବ ଚରଣ ସାହୁ ଦକ୍ଷତା ବିକାଶ ଓ ବୈଷୟିକ ଶିକ୍ଷା ନେଇ ପ୍ରଶ୍ନ କରିଥିଲେ । ରାଜ୍ୟରେ କେତେ ଇଞ୍ଜିନିୟରିଂ ଡିଗ୍ରୀ, ଡିପ୍ଲୋମା ଓ ପଲିଟେକନିକ୍ ଯୋଗ୍ୟତାଧାରୀ, ଆଇଟିଆଇ ଶିକ୍ଷାପ୍ରାପ୍ତ ଯୁବକ ଯୁବତୀ ବେକାର ଅଛନ୍ତି ବୋଲି ସେ ପ୍ରଶ୍ନ କରିଥିଲେ । ଯାହାର ଉତ୍ତର ଦେଇ ମନ୍ତ୍ରୀ କହିଛନ୍ତି...

ଆଇଟିଆଇରେ ୩୪ ହଜାର ୦୧୮ ଜଣ
ଡିପ୍ଲୋମାରେ ୪୩ ହଜାର ୪୬୩ ଜଣ
ଇଞ୍ଜନିୟରିଂରେ ୧୨୧୪ ଜଣ
ପିଜି ଇଞ୍ଜିନିୟରିଂରେ ୮୬୩ ଜଣ

ଯୁବକ, ଯୁବତୀ କର୍ମ ନିୟୋଜନ କାର୍ୟ୍ୟାଳୟରେ ସେମାନଙ୍କ ନାମ ପଞ୍ଜୀକରଣ କରି ଚାକିରି କରିବା ପାଇଁ ଅପେକ୍ଷାରେ ଅଛନ୍ତି । ତେବେ ବୈଷୟିକ ଶିକ୍ଷାଧାରୀ ବିଦ୍ୟାର୍ଥୀଙ୍କର ଆତ୍ମନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ରାଜ୍ୟ ଦକ୍ଷତା ବିକାଶ କର୍ତ୍ତୃପକ୍ଷଙ୍କ ତରଫରୁ ନାନୋ ୟୁନିକର୍ଣ୍ଣ ସ୍କିମ୍ ପ୍ରଚଳନ କରାଯାଇଅଛି । ତା ସହ ଛାତ୍ରଛାତ୍ରୀଙ୍କ ପାଇଁ ଅନୁଷ୍ଠାନ ସ୍ତରରେ ପ୍ଲେସମେଣ୍ଟ ସେଲି ଗଠନ କରାଯାଇ ସେଗୁଡିକ ମାଧ୍ୟମରେ ନିଯୁକ୍ତି ବ୍ୟବସ୍ଥା କରାଯାଇଥାଏ ବୋଲି ମନ୍ତ୍ରୀ ସୂଚନା ଦେଇଛନ୍ତି ।