ବିଦ୍ୟାଳୟ ଶୌଚାଳୟରୁ ଛାତ୍ରଙ୍କ ମୃତଦେହ ଉଦ୍ଧାର ; ପରିବାର ଲୋକ ଆଣିଲେ ହତ୍ୟା ଅଭିଯୋଗ

କନକ ବ୍ୟୁରୋ : ଆବାସିକ ବିଦ୍ୟାଳୟରେ ଅଭାବନୀୟ ଘଟଣା । କନ୍ଧମାଳ ଜିଲ୍ଲା ଖଜୁରୀପଡା ଥାନା ଆର. ନୂଆଗାଁ ସ୍ଥିତ କଳିଙ୍ଗ ଆଦର୍ଶ ଆବାସିକ ବିଦ୍ୟାଳୟର ଟଏଲେଟରୁ ମିଳିଛି ଦଶମଶ୍ରେଣୀ ଛାତ୍ରଙ୍କ ମୃତଦେହ । ମୃତ ଛାତ୍ର ଜଣକ ହେଉଛନ୍ତି ଆନନ୍ଦେସ୍ୱର ମଲ୍ଲିକ । ତାଙ୍କ ଘର ଖଜୁରୀପଡା ଥାନା ବାଳିସୁଗ୍ରୀ ଗ୍ରାମର ବୋଲି ଜଣାପଡ଼ିଛି । ଛାତ୍ରର କେଉଁଭଳି ଭାବ ମୃତ୍ୟୁ ହୋଇଛି, ତାହା ବର୍ତ୍ତମାନ ପର୍ଯ୍ୟନ୍ତ ଅସ୍ପଷ୍ଟ ଥିବା ବେଳେ ପରିବାର ଲୋକ ତାଙ୍କ ପୁଅକୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି । ଏନେଇ ଖଜୁରୀପଡା ଥାନାରେ ଏତଲା ଦେଇଛନ୍ତି ।

ଏପଟେ ହଷ୍ଟେଲରେ ଛାତ୍ର ଜଣକ ଆତ୍ମହତ୍ୟା କରିଥିବା ନେଇ ବିଦ୍ୟାଳୟ କର୍ତ୍ତୃପକ୍ଷ ସୂଚନା ଦେଇଛନ୍ତି । ତେବେ ବିଭିନ୍ନ ସମୟରେ କନ୍ଧମାଳ ଜିଲ୍ଲାର ବିଭିନ୍ନ ଆବାସିକ ବିଦ୍ୟାଳୟରେ ଛାତ୍ରଛାତ୍ରୀମାନଙ୍କ ମୃତ୍ୟୁ ସହିତ ବିଭିନ୍ନ ଲଜ୍ଜାଜନକ ଘଟଣା ଘଟୁଥିଲେ ମଧ୍ୟ ଏହା ଉପରେ ରୋକ ଲାଗୁନଥିବା ଦେଖିବାକୁ ମିଳିଛି ।