ଗଜ ଉପରେ ବିଜେ କରି ଆସିଲେ ମା’ ଦୁର୍ଗା, ନୌକା ଉପରେ କରିବେ ପ୍ରସ୍ଥାନ

କନକ ବ୍ୟୁରୋ;   ଶାରଦୀୟ ନବରାତ୍ରି ହିନ୍ଦୁ ଧର୍ମର ଏକ ପ୍ରମୁଖ ପର୍ବ । ଏହି ପର୍ବ ମା’ ଦୁର୍ଗାଙ୍କର ନଅଟି ରୂପକୁ ସମର୍ପିତ । ନଅ ଦିନ ଧରି ମା’ଙ୍କର ବିଭିନ୍ନ ରୂପର ପୂଜା ଅର୍ଚ୍ଚନା କରାଯାଏ । ପ୍ରତିବର୍ଷ ନବରାତ୍ରି ସମୟରେ ମା’ ଦୁର୍ଗା ଭିନ୍ନ ଭିନ୍ନ ବାହନରେ ଆସିଥାନ୍ତି ଏବଂ ଭିନ୍ନ ଭିନ୍ନ ବାହନରେ ପ୍ରସ୍ଥାନ କରିଥାନ୍ତି । ମା’ଙ୍କର ଆଗମନ ଏବଂ ପ୍ରସ୍ଥାନର ବାହନ ଅନୁଯାୟୀ, ଆଗାମୀ ବର୍ଷର ଶୁଭ ଏବଂ ଅଶୁଭ ଫଳାଫଳ ବିଷୟରେ ଆକଳନ କରାଯାଇଥାଏ ।  ଏ ବର୍ଷ  ମା’ ଦୁର୍ଗା ଗଜ  ବା ହାତୀ  ଉପରେ ବିଜେ କରି ଧରାପୃଷ୍ଟକୁ ଓହ୍ଲାଇଛନ୍ତି ।   ଏବଂ ନୌକା  ଉପରେ ପ୍ରସ୍ଥାନ କରିବେ ମା ।  

ଆସନ୍ତୁ ଜାଣିବା ଏହାର ପ୍ରଭାବ କଣ ରହିବ ଏବଂ ଏହା କାହାର କଲ୍ୟାଣ କରିବ ।  ଯେତେବେଳେ ନବରାତ୍ରି ରବିବାର କିମ୍ବା ସୋମବାର ଦିନ ଆରମ୍ଭ ହୁଏ, ସେତେବେଳେ ମା’ ଦୁର୍ଗା ଗଜ (ହାତୀ) ଉପରେ ବିଜେ କରି ଆସିଥାନ୍ତି ।  ଯେହେତେ ୨୦୨୫ ମସିହାରେ ନବରାତ୍ରିର ପ୍ରାରମ୍ଭ  ସୋମବାରରେ ହେଥିବାରୁ  ଗଜ ଉପରେ ମା’ଙ୍କର ଆଗମନକୁ ସୂଚିତ କରିଛି । ଶାସ୍ତ୍ର ଅନୁଯାୟୀ, ଗଜ ଉପରେ ମା’ଙ୍କର ଆଗମନ ଅତ୍ୟନ୍ତ ଶୁଭ ଏବଂ ମଙ୍ଗଳମୟ ବୋଲି ବିବେଚନା କରାଯାଏ ।  କୁହାଯାଏ  ଗଜକୁ ସମୃଦ୍ଧି, ଶାନ୍ତି ଏବଂ ଉତ୍ତମ ବର୍ଷାର ପ୍ରତୀକ ଭାବରେ ଦେଖାଯାଏ । ମା’ଙ୍କର ଗଜ ଉପରେ ଆଗମନ ଦେଶରେ ସୁଖ, ଶାନ୍ତି ଏବଂ ସମୃଦ୍ଧି ବୃଦ୍ଧି କରିବ ।

କୃଷକମାନଙ୍କ ପାଇଁ ଲାଭ: ଏହା ବର୍ଷା ଭଲ ହେବାର ସୂଚନା ଦିଏ, ଯାହା କୃଷି କ୍ଷେତ୍ର ପାଇଁ ଅତ୍ୟନ୍ତ ଲାଭଦାୟକ ହେବ । କୃଷକମାନଙ୍କୁ ଭଲ ଫସଲ ଅମଳ ହେବାର ସମ୍ଭାବନା ଅଛି ।

ଆର୍ଥିକ ସ୍ଥିତିରେ ସୁଧାର: ଦେଶର ଅର୍ଥନୀତି ମଜବୁତ ହେବାର ସମ୍ଭାବନା ଅଛି ଏବଂ ବ୍ୟବସାୟରେ ଉନ୍ନତି ପରିଲକ୍ଷିତ ହେବ ।
ସାମାଜିକ ସମୃଦ୍ଧି: ସମାଜରେ ସାମାଜିକ ସମ୍ପର୍କ ସୁଦୃଢ ହେବ ଏବଂ ଶାନ୍ତିପୂର୍ଣ୍ଣ ବାତାବରଣ ସୃଷ୍ଟି ହେବ ।
କଲ୍ୟାଣ: ମା’ ଗଜ ଉପରେ ଆସି ସମସ୍ତ ବର୍ଗର ଲୋକଙ୍କର କଲ୍ୟାଣ କରିବେ, ବିଶେଷ କରି କୃଷକ ଏବଂ ବ୍ୟବସାୟୀମାନଙ୍କ ପାଇଁ ଏହା ଅଧିକ ଫଳପ୍ରଦ ହେବ । ଦେଶରେ ଶାନ୍ତି ଏବଂ ସମୃଦ୍ଧିର ବାତାବରଣ ରହିବ ।
 
ଯେତେବେଳେ ନବରାତ୍ରିର ବିସର୍ଜନ ମଙ୍ଗଳବାର କିମ୍ବା ଶନିବାର ଦିନ ହୁଏ, ସେତେବେଳେ ମା’ ଦୁର୍ଗା ନୌକା (ଡଙ୍ଗା) ଉପରେ ପ୍ରସ୍ଥାନ କରିଥାନ୍ତି । ଏହି ବର୍ଷ  ମା’ଙ୍କର ନୌକା ଉପରେ ପ୍ରସ୍ଥାନ  କରିବେ । ଶାସ୍ତ୍ରରେ ନୌକା ଉପରେ ମା’ଙ୍କର ପ୍ରସ୍ଥାନକୁ ମିଶ୍ରିତ ଫଳାଫଳ ପ୍ରଦାନକାରୀ ବୋଲି କୁହାଯାଇଛି । ନୌକା ଉପରେ ମା’ଙ୍କର ପ୍ରସ୍ଥାନ ଅନେକ ସମୟରେ କିଛି ଅଶୁଭ ଘଟଣାକୁ ସୂଚିତ କରିଥାଏ । ଏହା ଅତ୍ୟଧିକ ବର୍ଷା, ବନ୍ୟା, ଏବଂ ପ୍ରାକୃତିକ ବିପର୍ଯ୍ୟୟର ସମ୍ଭାବନା ବଢାଇପାରେ । କିଛି ସ୍ଥାନରେ ସାମାଜିକ ଅଶାନ୍ତି କିମ୍ବା ରାଜନୈତିକ ଅସ୍ଥିରତା ଦେଖାଯାଇପାରେ  । କେତେକ ଅଞ୍ଚଳରେ ରୋଗ ଏବଂ ମହାମାରୀର ପ୍ରକୋପ ବଢିବାର ଆଶଙ୍କା ଥାଏ । ଯଦିଓ ନୌକା ଉପରେ ପ୍ରସ୍ଥାନ ମିଶ୍ରିତ ଫଳାଫଳ ଦିଏ, ତଥାପି ମା’ ଦୁର୍ଗା ସର୍ବଦା ନିଜ ଭକ୍ତଙ୍କର କଲ୍ୟାଣ କରିଥାନ୍ତି ।

 ମା’ ଦୁର୍ଗା ସର୍ବଦା ନିଜ ଭକ୍ତଙ୍କର ରକ୍ଷା କରନ୍ତି । ଏହି ପର୍ବ ଆମକୁ ଶୁଭ ଏବଂ ଅଶୁଭ ଉଭୟ ପରିସ୍ଥିତିରେ ବିଶ୍ୱାସ ଏବଂ ସାହସ ସହିତ ଆଗକୁ ବଢିବାକୁ ପ୍ରେରଣା ଦିଏ । ଆଗାମୀ ବର୍ଷରେ ସମୃଦ୍ଧି ଏବଂ ସୁଖର ବାତାବରଣ ରହିବ, କିନ୍ତୁ ପ୍ରାକୃତିକ ବିପର୍ଯ୍ୟୟ ପ୍ରତି ସଜାଗ ରହିବାକୁ ପଡିବ । ମା’ ଦୁର୍ଗା ସମସ୍ତଙ୍କର କଲ୍ୟାଣ କରନ୍ତୁ ଏବଂ ସମାଜରେ ସୁଖ, ଶାନ୍ତି ଓ ସମୃଦ୍ଧି ବିରାଜମାନ କରୁ ।