କନକ ବ୍ୟୁରୋ : ମୟୂରଭଞ୍ଜରେ ୧୦୮ ଆମ୍ବୁଲାନ୍ସ କର୍ମଚାରୀଙ୍କ କାର୍ଯ୍ୟବନ୍ଦ ଆନ୍ଦୋଳନର କରୁଣ ପରିଣତି । କଟକ ରେଫର ହେବା ପରେ ମିଳିଲାନି ଆମ୍ବୁଲାନ୍ସ । ଚାଲିଗଲା ରୋଗୀଙ୍କ ଜୀବନ । ମୃତକ ହେଲେ ଶାମାଖୁଣ୍ଟା ବ୍ଲକ ଶରତଚନ୍ଦ୍ରପୁର ଗ୍ରାମର କାନ୍ଦ୍ରା ସିଂ । ସୂଚନା ଅନୁସାରେ, ଉଚ୍ଚ ରକ୍ତଚାପ ଯୋଗୁ କାନ୍ଦ୍ରାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ହୋଇ ପଡ଼ିବାରୁ ପରିବାର ଲୋକେ ତାଙ୍କୁ ରାତିରେ ବାରିପଦା ଡାକ୍ତରଖାନାରେ ଭର୍ତ୍ତି କରିଥିଲେ । ସିଟିସ୍କାନ୍‌ ପରେ ତାଙ୍କର ବ୍ରେନ୍ ଷ୍ଟ୍ରୋକ୍ ହୋଇଥିବା ଜଣାପଡ଼ିଥିଲା । ତେଣୁ ତାଙ୍କୁ ତୁରନ୍ତ କଟକ ବଡ଼ ମେଡିକାଲ୍‌କୁ ରେଫର୍‌ କରିଥିଲେ ଡାକ୍ତର । ହେଲେ ଏପଟେ ୧୦୮ ଆମ୍ବୁଲାନ୍ସ କର୍ମଚାରୀଙ୍କର କାର୍ଯ୍ୟବନ୍ଦ ଆନ୍ଦୋଳନ ଯୋଗୁ କେହି ବି କାନ୍ଦ୍ରାଙ୍କୁ କଟକ ନେବାକୁ ରାଜି ହୋଇନଥିଲେ । ଅନ୍ୟ ଉପାୟ ନପାଇ ପରିବାର ଲୋକେ ବାଲେଶ୍ୱରରୁ ଏକ ଆମ୍ବୁଲାନ୍ସ ମଗାଇଥିଲେ । ହେଲେ ଉକ୍ତ ଆମ୍ବୁଲାନ୍ସ ବାରିପଦାରେ ପହଞ୍ଚିବା ପୂର୍ବରୁ ଆଖି ବୁଜି ଦେଇଥିଲେ କାନ୍ଦ୍ରା । 

Advertisment

ଏହି ଅଘଟଣ ପାଇଁ ଡାକ୍ତରଖାନାର ଆମ୍ବୁଲାନ୍ସ କର୍ମଚାରୀମାନଙ୍କୁ ଦାୟୀ କରିଛନ୍ତି ମୃତକଙ୍କ ସମ୍ପର୍କୀୟ ଓ ୨୨ ନମ୍ବର ଜିଲ୍ଲା  ପରିଷଦ ସଭ୍ୟ ଦଶରଥ ସିଂ । ବିନା କୌଣସି ପୂର୍ବ ସୂଚନାରେ ହଠାତ୍‌ ସେବା ଯୋଗାଇବାକୁ ମନା କରିଥିବା ଡ୍ରାଇଭରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ସେମାନେ ଦାବି କରିଛନ୍ତି । ଅନ୍ୟପକ୍ଷରେ ମୟୂରଭଞ୍ଜରେ ସ୍ୱାଭାବିକ ହୋଇଛି ୧୦୮ ଆମୁଲାନ୍ସ ସେବା । ବାରିପଦା ଏସଡିପିଓ ଏବଂ ତାହସିଲଦାରଙ୍କ ବୁଝାସୁଝା ପରେ ଆସନ୍ତା ୧୩ ତାରିଖ ବୁଧବାର ସୁଦ୍ଧା ଆମ୍ବୁଲାନ୍ସ କର୍ମଚାରୀଙ୍କର ସବୁ ସମସ୍ୟାର ସମାଧାନ କରାଯିବା ନେଇ ପ୍ରତିଶ୍ରୁତି ଦେବାପରେ କାର୍ଯ୍ୟରେ ଯୋଗ ଦେଇଛନ୍ତି ସମସ୍ତ କର୍ମଚାରୀ । ସେପଟେ ମୟୂରଭଞ୍ଜ ରୋଗୀ ମୃତ୍ୟୁ ଘଟଣାରେ ଠିକା ସଂସ୍ଥା ଏମ୍ରି ଗ୍ରୀନ ହେଲ୍‌ଥ ସର୍ଭିସକୁ ଦାୟୀ କରିଛି କର୍ମଚାରୀ ସଂଘ ।