୨୦ ବର୍ଷ ପରେ ଏକାଠି ହେବେ ଦୁଇ ଭାଇ; ହାତ ମିଳାଇବେ ଉଦ୍ଧବ ଠାକର ,ରାଜ ଠାକରେ

କନକ ବ୍ୟୁରୋ: ଏକାଠି ହେବେ ଠାକରେ ବ୍ରଦର୍ସ । ଦୀର୍ଘ ୨୦ ବର୍ଷ ପରେ ଦୁଇ ଭାଇ ପୁଣିଥରେ ଏକାଠି ହେବାକୁ ଯାଉଛନ୍ତି । ଦୁଇ ଭାଇଙ୍କ ଦୁଇ ଦଳ ଏବେ ମେଣ୍ଟ ଗଠନ କରି ନିର୍ବାଚନ ଲଢ଼ିବାକୁ ମନ ସ୍ଥିର କରିଛନ୍ତି । ମିଳିଥିବା ସୂଚନା ଅନୁସାରେ, ମହାରାଷ୍ଟ୍ରର ସ୍ଥାନୀୟ ନିର୍ବାଚନରେ ଶୋଚନୀୟ ପରାଜୟ ପରେ, ବିରୋଧୀ ଦଳଗୁଡ଼ିକ ବିଏମସି ନିର୍ବାଚନରେ ସକ୍ରିୟ ହୋଇ ଉଠିଛନ୍ତି । ଆଉ ଏହାସହିତ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା (ୟୁବିଟି) ଏବଂ ରାଜ ଠାକରେଙ୍କ ମହାରାଷ୍ଟ୍ର ନବନିର୍ମାଣ ସେନା ବିଏମସି ସମେତ ମହାରାଷ୍ଟ୍ରର ୨୯ଟି ନଗର ନିଗମରେ ଏକାଠି ହୋଇ ନିର୍ବାଚନ ଲଢ଼ିବାକୁ ମନ ସ୍ଥିର କରିଛନ୍ତି ।

ମିଳିଥିବା ସୂଚନା ଅନୁସାରେ, ଉଦ୍ଧବ ଠାକରେ ଏବଂ ରାଜ ଠାକରେ ମୁମ୍ବାଇରେ ଏକ ମିଳିତ ସାମ୍ବାଦିକ ସମ୍ମିଳନୀ କରି ଉଭୟ ଦଳ ମଧ୍ୟରେ ମେଣ୍ଟ ଘୋଷଣା କରିବେ। ଏହା ପୂର୍ବରୁ ଠାକରେ ବ୍ରଦର୍ସ ମୁମ୍ବାଇର ଶିବାଜୀ ପାର୍କରେ ପହଞ୍ଚିଛନ୍ତି । ଯେଉଁଠି ଉଦ୍ଧବ ଠାକରେଙ୍କ ସହିତ ତାଙ୍କ ପୁଅ ଆଦିତ୍ୟ ଠାକରେ ଏବଂ ରାଜ ଠାକରେଙ୍କ ସହିତ ତାଙ୍କ ପୁଅ ଅମିତ ଠାକରେ ମଧ୍ୟ ଥିଲେ।

ଆହୁରି ପଢ଼ନ୍ତୁ : ଦେଢ଼ ବର୍ଷରେ ବଦଳିଗଲା ବିଶ୍ୱକପ୍‌ ଟିମ୍‌  ; ନୂଆ ଟିମ୍‌ରେ ନାହାନ୍ତି ୭ ଚାମ୍ପିୟନ ଖେଳାଳି

ଆପଣ ଭଲ ଭାବେ ଜାଣିଥିବେ ଯେ, ଉଭୟ ଭାଇ ୨୦ ବର୍ଷ ପରେ ଏକାଠି ହେଉଛନ୍ତି । ଦୁଇ ଦଳ ଭିତରେ ଆସନ ବୁଝାମଣା ନେଇ କଥା ଛିଣ୍ଡିଛି । ତେବେ ଶିବସେନା (UBT) ରାଜ୍ୟସଭା ସାଂସଦ ସଞ୍ଜୟ ରାଉତ ଶିବତୀର୍ଥରେ ରାଜ ଠାକରେଙ୍କୁ ଭେଟିଥିଲେ । ଏହାପରେ, ରାଜ ଠାକରେଙ୍କ ଦଳର ନେତାମାନେ ମଧ୍ୟ ବିଳମ୍ବିତ ସନ୍ଧ୍ୟାରେ ମାତୋଶ୍ରୀରେ ଉଦ୍ଧବ ଠାକରେଙ୍କୁ ଭେଟିଥିଲେ।

ତେବେ ଦୁଇ ଦଳ ମଧ୍ୟରେ ମେଣ୍ଟ ପ୍ରଥମେ ଡିସେମ୍ବର ୨୩ ତାରିଖରେ ଘୋଷଣା ହେବାର ଥିଲା, କିନ୍ତୁ ଶେଷ ମୁହୂର୍ତ୍ତରେ ଏହାକୁ ସ୍ଥଗିତ ରଖାଯାଇଥିଲା। ଶିବସେନା (UBT) ଏବଂ MNS କିଛି ଆସନକୁ ନେଇ ବିବାଦରେ ଫସିଥିଲେ। କାହିଁକି ନା, ଉଦ୍ଧବଙ୍କ ଦଳ ଗତ BMC ନିର୍ବାଚନରେ ଜିତିଥିବା ୮୪ ଆସନ ମଧ୍ୟରୁ ୧୨ରୁ ୧୫ ଆସନ MNSକୁ ଦେବାକୁ ଇଚ୍ଛୁକ ଥିଲା। ଆଉ ଏହାକୁ ନେଇ କଥା ଛିଣ୍ଡିନଥିଲା । ହେଲେ ଏବେ ଦୁଇ ଭାଇଙ୍କ ଭିତରେ ବୁଝାମଣା ହେବା ସହ ମେଣ୍ଟ ନେଇ କଥାବାର୍ତ୍ତା ଶେଷ ହୋଇଛି ।