ବଢିଲା ଟିମ୍ ଇଣ୍ଡିଆ ଟେନସନ୍ । ରୋହିତ, ଗିଲ୍ ଖେଳିବେନି । ଏହି ୩ ଖେଳାଳିଙ୍କ ଉପରେ ନଜର

କନକ ବ୍ୟୁରୋ: 

• ବର୍ଡର ଗାଭାସ୍କର ଟ୍ରଫି ପୂର୍ବରୁ ଟିମ୍ ଇଣ୍ଡିଆକୁ ଝଟକା
• ପ୍ରଥମ ଟେଷ୍ଟ ଖେଳିବେନି ରୋହିତ, ଶୁଭମନ୍ ଗିଲ୍ ବି ଆହତ
• ଗାଏକ୍ୱାର୍ଡ ନଚେତ୍ ପଡିକ୍କଲଙ୍କୁ ମିଳିପାରେ ଟିମରେ ସୁଯୋଗ

ନ୍ୟୁଜିଲାଣ୍ଡ ବିରୋଧରେ କ୍ଲିନ୍ ସୁଇପ୍ ପରାଜୟ ପରେ, ଏବେ ଅଷ୍ଟ୍ରେଲିଆ ମାଟିରେ ବର୍ଡର ଗାଭାସ୍କର ସିରିଜ୍ ଖେଳିବାକୁ ଯାଉଛି ଟିମ୍ ଇଣ୍ଡିଆ । ଆଉ ଏହି ଟେଷ୍ଟ ସିରିଜ୍ ପୂର୍ବରୁ ଟିମ୍ ଇଣ୍ଡିଆକୁ ଲାଗିଛି ବଡ ଝଟକା । ଗୋଟିଏ ପଟେ ରୋହିତ ଶର୍ମା ପ୍ରଥମ ଟେଷ୍ଟ ନଖେଳିବା ନେଇ ପକ୍କା ଖବର ଆସୁଥିବାବେଳେ, ଅନ୍ୟପଟେ ଦଳର ଷ୍ଟାର ବ୍ୟାଟ୍ସମ୍ୟାନ୍ ଶୁଭମନ୍ ଗିଲ ବି ଅଭ୍ୟାସ ମ୍ୟାଚରେ ଆହତ ହେଇଛନ୍ତି । ଯାହାକି ଏବେ ଟିମ୍ ଇଣ୍ଡିଆ ପାଇଁ ଚିନ୍ତାର କାରଣ ପାଲଟିଛି ।

ବର୍ଡର ଗାଭାସ୍କର ଟେଷ୍ଟ ସିରିଜ୍ ପୂର୍ବରୁ ଦ୍ୱିତୀୟ ଥର ପାଇଁ ବାପା ହେଇଛନ୍ତି ରୋହିତ ଶର୍ମା । ଆଉ ଏହି କାରଣରୁ ସେ ସିରିଜର ପ୍ରଥମ ଟେଷ୍ଟ ମିସ୍ କରିବେ । ତାଙ୍କ ଅନୁପସ୍ଥିତିରେ ଦ୍ରୁତ ବୋଲର ଜଶପ୍ରୀତ ବୁମରା ଦଳର ଅଧିନାୟକ ଭାର ସମ୍ଭାଳିବେ । ତେବେ ଚିନ୍ତାର ବିଷୟ ହେଉଛି, ଅଭ୍ୟାସ ମ୍ୟାଚରେ ଦଳର ଆଉ ଜଣେ ଷ୍ଟାର ବ୍ୟାଟ୍ସମ୍ୟାନ୍ ଶୁଭମନ୍ ଗିଲ ବି ଆହତ ହେଇଛନ୍ତି । ତାଙ୍କ ଆଙ୍ଗୁଠି ଭାଙ୍ଗିଯିବା କାରଣରୁ ସେ ପ୍ରଥମ ଟେଷ୍ଟ ମିସ୍ କରିପାରନ୍ତି ବୋଲି ଚର୍ଚ୍ଚା ହେଉଛି । ତେଣୁ ଏହି ଦୁଇ ଖେଳାଳିଙ୍କ ଅନୁପସ୍ଥିତିରେ ଦଳ କେମିତି ପ୍ଲେଇଙ୍ଗ୍ ୧୧କୁ ନେଇ ପଡିଆକୁ ଓହ୍ଲାଇବ ତାକୁ ନେଇ ଚର୍ଚ୍ଚା ବଢିଛି ।

ବିସିସିଆଇର ସୂତ୍ରରୁ ଆସୁଥିବା ଖବର ମୁତାବକ, ରୋହିତ ଆଉ ଶୁଭମନ୍ ଗିଲଙ୍କ ଅନୁପସ୍ଥିତିରେ ଦଳ କିଛି ନୂଆ ଖେଳାଳିଙ୍କୁ ପର୍ଥ ଟେଷ୍ଟରେ ସୁଯୋଗ ଦେଇପାରେ । ଖାସ୍ କରି, ଇଣ୍ଡିଆ-ଏ ଟୁରରେ ଭଲ ପ୍ରଦର୍ଶନ କରିଥିବା ଋତୁରାଜ ଗାଏକ୍ୱାର୍ଡ, ଦେବଦତ୍ତ ପଡିକ୍କଲ ନଚେତ୍ ସାଇ ସୁଦର୍ଶନଙ୍କୁ ପ୍ଲେଇଙ୍ଗ୍ ୧୧ରେ ସୁଯୋଗ ମିଳିପାରେ । ତେବେ ଏପର୍ୟ୍ୟନ୍ତ ଦେବଦତ୍ତ ପଡିକଲ ଭାରତ ପାଇଁ ମାତ୍ର ଗୋଟିଏ ଟେଷ୍ଟ ମ୍ୟାଚ୍ ଖେଳିଥିବାବେଳେ, ଗାଏକ୍ୱାର୍ଡ ଆଉ ସାଇ ସୁଦର୍ଶନ ଟେଷ୍ଟ ଡେବ୍ୟୁ କରିନାହାଁନ୍ତି । ତେଣୁ ଏହି ଖେଳାଳିମାନେ ସିଧା ଅଷ୍ଟ୍ରେଲିଆ ମାଟିରେ ଡେବ୍ୟୁ କଲେ, କେମିତି ପ୍ରଦର୍ଶନ କରୁଛନ୍ତି ତାହା ଉପରେ ସମସ୍ତଙ୍କର ନଜର ରହିଛି ।

ବର୍ଡର ଗାଭାସ୍କର ଟ୍ରଫିରେ ରୋହିତଙ୍କ ଜାଗାରେ, ଫର୍ମରେ ଥିବା କେ ଏଲ ରାହୁଲ ଦଳ ପାଇଁ ଓପନିଂ କରିପାରନ୍ତି ବୋଲି କୁହାଯାଉଛି । ଯଶସ୍ୱୀ ଜୟସଓ୍ୱାଲଙ୍କ ସହିତ କେ ଏଲ ରାହୁଲ ଓପନିଂ କରିବା ସହିତ , ଅନ୍ୟ କୌଣସି ନୂଆ ଖେଳାଳି ୩ ନମ୍ବରରେ ବ୍ୟାଟିଂ କରିପାରନ୍ତି ବୋଲି କୁହାଯାଉଛି । ଏହାସହ ରିଷଭ ପନ୍ତ, ସର୍ଫରାଜ ଖାନ୍ ମଧ୍ୟ ଚୂଡାନ୍ତ ଏକାଦଶରେ ସାମିଲ ହେଇପାରନ୍ତି ବୋଲି କୁହାଯାଉଛି । ତେବେ ଆସନ୍ତା ୨୨ ତାରିଖରୁ ଏହି ବର୍ଡର ଗାଭାସ୍କର ଟ୍ରଫି ଆରମ୍ଭ ହେବାକୁ ଯାଉଛି । ଯାହାର ପ୍ରଥମ ଟେଷ୍ଟ ପର୍ଥରେ ଖେଳାଯିବ । ସେହିପରି ଦ୍ୱିତୀୟ ଟେଷ୍ଟ ଆଡିଲେଡ୍, ତୃତୀୟ ବ୍ରିସବେନ୍, ଚତୁର୍ଥ ଟେଷ୍ଟ ମେଲବର୍ଣ୍ଣରେ ଖେଳାଯିବାକୁ ଥିବାବେଳେ, ପଂଚମ ତଥା ଶେଷ ଟେଷ୍ଟ ସିଡନୀରେ ଖେଳାଯିବ ।