ଜମ୍ମୁ-କଶ୍ମୀରରେ ସେନା ଗାଡିକୁ ଆତଙ୍କବାଦୀ ଆକ୍ରମଣ । ସମ୍ପୂର୍ଣ୍ଣ ଅଂଚଳ ଘେରାବନ୍ଦୀ

କନକ ବ୍ୟୁରୋ : ଜମ୍ମୁ-କଶ୍ମୀରର ଅଖନୋର ସେକ୍ଟରରେ ଆତଙ୍କବାଦୀ ମାନେ ସେନା ଗାଡି ଉପରକୁ ଗୁଳି ଚଳାଇଛନ୍ତି । ଏବେ ଜମ୍ମୁ-କଶ୍ମୀରର ଅଖନୋରଠ‌ାରେ ବ୍ୟାପକ ସର୍ଚ୍ଚ ଅପରେସନ ଚାଲିଛି , ତେବେ ଗୁଳିବିନିମୟରେ ଜଣେ ଆତଙ୍କବାଦୀ ନିହତ ହୋଇଛି । ୩୨ ଫିଲ୍ଡ ରେଜିମେଣ୍ଟ ସମ୍ପୂର୍ଣ୍ଣ ଅଂଚଳକୁ ଘେରାବନ୍ଦୀ କରିଛନ୍ତି । ସେନା ଅଧିକାରୀଙ୍କ ସୂଚନା ଅନୁସାରେ ସେନାର ଆମ୍ବୁଲାନ୍ସ ଗାଡି ଗାଁ ରାସ୍ତାରେ ଯିବା ସମୟରେ ଅଚାନକ ଗୁଳି ଚାଲିଥିଲା । ସଂପୃକ୍ତ ଅଞ୍ଚଳରେ ସକାଳ ପ୍ରାୟ ୭ଟା ବେଳକୁ ତିନିଜଣ ଆତଙ୍କବାଦୀ ସେନା ଗାଡ଼ି ଉପରକୁ ଏକାଧିକ ରାଉଣ୍ଡ ଗୁଳି ଚାଳନା କରିଥିଲେ । ଖବର ଅନୁସାରେ ଆତଙ୍କବାଦୀମାନଙ୍କ ଗୁଳି ଚାଳନା ପରେ ସୁରକ୍ଷା ବାହିନୀ ତୁରନ୍ତ ଏହି ଅଞ୍ଚଳକୁ କର୍ଡନ କରି ସର୍ଚ୍ଚ ଅପରେସନ ଆରମ୍ଭ କରି ଦେଇଥିଲେ ।

ଜମ୍ମୁ-କଶ୍ମୀରରେ ସୁରକ୍ଷା ବାହିନୀ ଦୀପାବଳି ପାଇଁ ବିସ୍ତୃତ ସୁରକ୍ଷା ବ୍ୟବସ୍ଥା କାର୍ଯ୍ୟକାରୀ କରିଥିବା ଜଣାପଡ଼ିଛି । ତାହା ସତ୍ତ୍ବେ ବି ଗୁଳିକାଣ୍ଡ ଘଟିଥିବା ସୂଚନା ରହିଛି । ଗତ ଏକ ସପ୍ତାହ ମଧ୍ୟରେ ଜମ୍ମୁ-କଶ୍ମୀରରେ ୨ ସୈନିକଙ୍କ ସମେତ ଅତି କମରେ ୧୨ ଜଣଙ୍କର ମୃତ୍ୟୁ ହୋଇ ସାରିଲାଣି ଏବଂ ଅକ୍ଟୋବର ୨୪ ତାରିଖରେ ଆତଙ୍କବାଦୀମାନେ ବାରାମୁଲ୍ଲା ଜିଲ୍ଲାର ଗୁଲମର୍ଗ ନିକଟରେ ଏକ ସେନା ଗାଡି ଉପରେ ଆକ୍ରମଣ କରି ଦୁଇ ଜଣ ସୈନିକଙ୍କ ସମେତ ସମୁଦାୟ ୪ ଜଣଙ୍କୁ ହତ୍ୟା କରିଥିଲେ ।