ସନ୍ଧ୍ୟାରେ ତିନି ସେନା ସହ ବଡ ବୈଠକ : ଆତଙ୍କୀ ଆକ୍ରମଣର ପ୍ରତିଶୋଧ ନେବ ଭାରତ

କନକ ବ୍ୟୁରୋ : ଜମ୍ମୁ କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ପ୍ରତିରକ୍ଷା ମନ୍ତ୍ରଣାଳୟର ବସିଛି  ଏକ ଉଚ୍ଚସ୍ତରୀୟ ବୈଠକ । ଏଥିରେ ତିନୋଟି ବାହିନୀର ମୁଖ୍ୟମାନେ ଅଂଶଗ୍ରହଣ କରିଥିଲେ । ରିପୋର୍ଟ ଅନୁସାରେ, ପହଲଗାମ ଆକ୍ରମଣର ପ୍ରତିଶୋଧ ନେବା ପାଇଁ ବୈଠକରେ ଏକ ଯୋଜନା ପ୍ରସ୍ତୁତ ହୋଇଥିଲା । ପ୍ରଧାନମନ୍ତ୍ରୀ ମୋଦୀ ଆଜି ସନ୍ଧ୍ୟାରେ CCS ବୈଠକରେ ଯୋଗଦେବେ । ଏହି ବୈଠକରେ ଆତଙ୍କୀଙ୍କୁ ନିପାତ କରିବା ନେଇ ଆଲୋଚନା କରାଯିବ । 

ରିପୋର୍ଟ ଅନୁଯାୟୀ, ପ୍ରତିରକ୍ଷା ମନ୍ତ୍ରଣାଳୟର ବୈଠକ ପ୍ରାୟ ସାଢ଼େ ତିନି ଘଣ୍ଟା ଧରି ଚାଲିଥିଲା । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସହିତ, ତିନି ସଶସ୍ତ୍ର ବାହିନୀର ମୁଖ୍ୟମାନେ ମଧ୍ୟ ଏହି ବୈଠକରେ ଯୋଗ ଦେଇଥିଲେ । ବୈଠକରେ ପହଲଗାମ ଆକ୍ରମଣର ପ୍ରତିଶୋଧ କିପରି ନିଆଯିବ ସେ ବିଷୟରେ ଆଲୋଚନା ହୋଇଥିଲା । ବୈଠକରେ ପ୍ରସ୍ତୁତ ଯୋଜନାକୁ ପ୍ରଧାନମନ୍ତ୍ରୀ ମୋଦୀଙ୍କ ସମ୍ମୁଖରେ ରଖାଯିବ । 

ଅଧ ରାସ୍ତାରୁ ଫେରିଆସିଲେ ମୋଦୀ 
ପ୍ରଧାନମନ୍ତ୍ରୀ ମୋଦୀ ମଙ୍ଗଳବାର ସାଉଦି ଆରବ ଗସ୍ତ ପାଇଁ ଯାଇଥିଲେ । ସେ ସେଠାରେ ପହଞ୍ଚିବା ପରେ ଆତଙ୍କବାଦୀମାନେ ପହଲଗାମ ଉପରେ ଆକ୍ରମଣ କରିଥିଲେ । ଏହି ଆକ୍ରମଣରେ ୨୬ ଜଣ ପ୍ରାଣ ହରାଇଥିଲେ । ଆକ୍ରମଣ ପରେ, ପ୍ରଧାନମନ୍ତ୍ରୀ ମୋଦୀ ତାଙ୍କ ଗସ୍ତ ଅଧା ବାଟରେ ଛାଡି ଫେରି ଆସିଲେ । ବିମାନବନ୍ଦରରେ ପହଞ୍ଚିବା ମାତ୍ରେ ସେ ବୈଦେଶିକ ମନ୍ତ୍ରୀ ଏସ.ଜୟଶଙ୍କର ଏବଂ ଅଜିତ ଡୋଭାଲଙ୍କଠାରୁ ଆକ୍ରମଣ ବିଷୟରେ ସୂଚନା ନେଇଛନ୍ତି ।

ପହଲଗାମରେ ପହଞ୍ଚିଲେ ଅମିତ ଶାହ 
ଆଜି ସକାଳେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଶ୍ରୀନଗରରେ ପହଞ୍ଚିଥିଲେ । ଏହା ପରେ ସେ ପହଲଗାମର ଆକ୍ରମଣ ସ୍ଥାନରେ ପହଞ୍ଚିଲେ ।  ଅମିତ ଶାହା ଆକ୍ରମଣରେ ପ୍ରାଣ ହରାଇଥିବା ଲୋକମାନଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ଏହା ପରେ ସେ ଦିଲ୍ଲୀରେ ପହଞ୍ଚିବେ । ଏଠାରେ CCS ବୈଠକରେ ଅଂଶଗ୍ରହଣ କରିବେ ।

ଉରିରେ ଅନୁପ୍ରବେଶ ଷଡଯନ୍ତ୍ର,  ଆତଙ୍କୀଙ୍କୁ ନିପାତ କଲା ସେନା 
ପହଲଗାମ ପରେ, ଉରି ଆତଙ୍କବାଦୀଙ୍କ ଟାର୍ଗେଟରେ ଥିଲା । ବୁଧବାର ଦିନ ଦୁଇଜଣ ଆତଙ୍କବାଦୀ ଉରିରେ ଅନୁପ୍ରବେଶ କରିବାକୁ ଚେଷ୍ଟା କରିଥିଲେ, କିନ୍ତୁ ସେନା ଯବାନ ଆତଙ୍କୀ ଯୋଜନାକୁ ପଣ୍ଡ କରିବା ସହ, ଦୁଇ ଆତଙ୍କୀଙ୍କୁ ନିପାତ କରିଛନ୍ତି ।