କିୱି ଦଳକୁ ଧୂଳି ଚଟାଇଲା ଟିମ୍ ଇଣ୍ଡିଆ: ଇଶାନଙ୍କ ବିସ୍ଫୋରକ ଶତକ , ୪-୧ରେ ସିରିଜ୍ ଜିତିଲା ଭାରତ

କନକ ବ୍ୟୁରୋ: ଗ୍ରିନଫିଲ୍ଡ ଷ୍ଟାଡିୟମରେ ଭାରତୀୟ ବ୍ୟାଟରଙ୍କ ରୁଦ୍ର ରୂପ ଏବଂ ଘାତକ ବୋଲିଂରେ ନୟାନ୍ତ ହୋଇଗଲା ନ୍ୟୁଜିଲ୍ୟାଣ୍ଡ  । ପଞ୍ଚମ ତଥା ଅନ୍ତିମ ଟି-୨୦ ମ୍ୟାଚରେ ଭାରତ ୪୬ ରନର ଏକ ବଡ଼ ବିଜୟ ହାସଲ କରିବା ସହ ସିରିଜକୁ ୪-୧ରେ ନିଜ ନାଁରେ କରିଛି । ପକେଟ୍ ଡାଇନାମୋ ଇଶାନ କିଶାନଙ୍କ ଆକାଶଛୁଆଁ ଶତକ ଆଗରେ ଫିକା ପଡ଼ିଗଲେ କିୱି ବୋଲର ।

ଇଶାନଙ୍କ 'ଶତକୀୟ' ଝଡ଼: ସ୍କୋରବୋର୍ଡରେ ରନର ପାହାଡ଼

ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ଆରମ୍ଭରୁ ହିଁ ଆକ୍ରମଣାତ୍ମକ ଆଭିମୁଖ୍ୟ ଆପଣାଇଥିଲା । ବିଶେଷ କରି ଇଶାନ କିଶାନଙ୍କ ବ୍ୟାଟରୁ ବାଉଣ୍ଡ୍ରିର ବର୍ଷା ଦେଖିବାକୁ ମିଳିଥିଲା । ଇଶାନଙ୍କ ବିସ୍ଫୋରକ ଶତକ ବଳରେ ଭାରତ ନିର୍ଦ୍ଧାରିତ ୨୦ ଓଭରରେ ୬ ୱିକେଟ ହରାଇ ୨୭୧ ରନର ଏକ ବିଶାଳ ସ୍କୋର ଛିଡ଼ା କରିଥିଲା । ନ୍ୟୁଜିଲ୍ୟାଣ୍ଡ ପାଇଁ ଏହି ଲକ୍ଷ୍ୟ ଏକପ୍ରକାର ଅସମ୍ଭବ ମନେ ହେଉଥିଲା ।

ଆଲେନଙ୍କ ସଂଘର୍ଷ ବେକାର
ବୋଲରଙ୍କ ଆଗରେ ଆତ୍ମସମର୍ପଣ

୨୭୨ ରନର ପାହାଡ଼ ସଦୃଶ ଲକ୍ଷ୍ୟକୁ ପିଛା କରି ନ୍ୟୁଜିଲ୍ୟାଣ୍ଡ ଭଲ ଆରମ୍ଭ କରିଥିଲେ ମଧ୍ୟ ଭାରତୀୟ ବୋଲରଙ୍କ ନିୟମିତ ୱିକେଟ ଶିକାର ଆଗରେ ହାର ମାନିଥିଲା । ଫିନ୍ ଆଲେନ୍ ମାତ୍ର ୩୮ ବଲରେ ୮୦ ରନର ଏକ ଲଢୁଆ ଇନିଂସ ଖେଳି ଭାରତୀୟ କ୍ୟାମ୍ପରେ ଛନକା ପଶାଇଥିଲେ । ରଚିନ୍ ରବିନ୍ଦ୍ର (୩୦ ରନ) ଓ ଆଲେନ୍ ଦ୍ୱିତୀୟ ୱିକେଟ ପାଇଁ ୧୦୦ ରନର ପାର୍ଟନରଶିପ୍ କରିଥିଲେ ସତ, କିନ୍ତୁ ମଧ୍ୟକ୍ରମର ବିଫଳତା ଦଳକୁ ମହଙ୍ଗା ପଡ଼ିଥିଲା ।

କିୱି ଦଳର ବ୍ୟାଟିଂ ବିପର୍ଯ୍ୟୟ

ଫିନ୍ ଆଲେନ୍: ୮୦ ରନ (୩୮ ବଲ୍)
ରଚିନ୍ ରବିନ୍ଦ୍ର:୩୦ ରନ
ଡାରିଲ୍ ମିଚେଲ୍:୨୬ ରନ

ଅର୍ଶଦୀପ ସିଂହ ପ୍ରଥମ ଓଭରରେ ହିଁ ଟିମ୍ ସିଫର୍ଟଙ୍କୁ ଆଉଟ୍ କରି ଭାରତକୁ ବଡ଼ ସଫଳତା ଦେଇଥିଲେ । ଏହାପରେ କୌଣସି ବି କିୱି ବ୍ୟାଟର କ୍ରିଜରେ ବେଶୀ ସମୟ ତିଷ୍ଠି ପାରିନଥିଲେ । ପରିଶେଷରେ ୧୯.୪ ଓଭରରେ ୨୨୫ ରନ କରି ସମସ୍ତ ୱିକେଟ ହରାଇଥିଲା ନ୍ୟୁଜିଲ୍ୟାଣ୍ଡ ।

ଐତିହାସିକ ସିରିଜ୍ ବିଜୟ

ଏହି ବିଜୟ ସହ ଭାରତ ୫ ମ୍ୟାଚ୍ ବିଶିଷ୍ଟ ସିରିଜକୁ ୪-୧ ବ୍ୟବଧାନରେ ଜିତି ନିଜର ଦବଦବା ବଜାୟ ରଖିଛି । ଘରୋଇ ମାଟିରେ ଭାରତର ଏହି ପ୍ରଦର୍ଶନ ଆଗାମୀ ବିଶ୍ୱକପ୍ ପ୍ରସ୍ତୁତି ପାଇଁ ଏକ ଶୁଭ ସଙ୍କେତ ବୋଲି କ୍ରୀଡ଼ା ସମୀକ୍ଷକ ମତ ଦେଇଛନ୍ତି ।