କନକବ୍ୟୁରୋ : ଚଳିତ ଥରର ଏସିଆ କପ୍ ଯେତିକି ରୋଚକ ଥିଲା, ସେତିକି ଚର୍ଚ୍ଚା ମଧ୍ୟ ସାଉଁଟିଛି । ଆଉ ବିବାଦ ମଧ୍ୟ କିଛି କମନଥିଲା  ।  ଫାଇନାଲରେ ପାକିସ୍ତାନକୁ ଧୂଳି ଚଟାଇବା ପରେ ସୋସିଆଲ ମିଡିଆରେ ପୋଷ୍ଟୱାର ଚାଲିଛି ।   ରବିବାର ରାତିରୁ ସୋସିଆଲ ମିଡିଆରେ ଚାଲିଛି ବୟାନବାଜିର ସୁନାମି  । ଚିର ପ୍ରତିଦ୍ବନ୍ଦ୍ୱୀ ପାକିସ୍ତାନକୁ ଫାଇନାଲରେ ହରାଇବା ପରେ ଟିମ୍ ଇଣ୍ଡିଆର ସମର୍ଥକ କି ପ୍ରଶଂସକ ନୁହନ୍ତି,  ଖୋଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଏକ୍ସରେ ବିଜୟ ଖୁସିକୁ ନେଇ ପୋଷ୍ଟ କରିଛନ୍ତି ।  ତେବେ ପ୍ରତିଥରର ଅଭିନନ୍ଦନଠୁ ଏଥରକର ପ୍ରଧାନମନ୍ତ୍ରୀଙ୍କ ପୋଷ୍ଟ ବେଶ୍ ଅଲଗା ରହିଛି  ।

Advertisment

କାରଣ ପାକିସ୍ତାନକୁ ସିଧାସଳଖ ଟାର୍ଗେଟ୍ କରି ସେ ଲେଖିଛନ୍ତି, ପଡ଼ିଆରେ ଅପରେସନ ସିନ୍ଦୂର,  ସମାନ ଫଳାଫଳ ମିଳିଲା, ଭାରତ ଜିତିଥିଲା, ଅଭିନନ୍ଦନ ଟିମ୍ ଇଣ୍ଡିଆ । ସେହିପରି କ୍ରୀଡ଼ାମନ୍ତ୍ରୀ ମନସୁଖ ମାଣ୍ଡବ୍ୟ ଲେଖିଛନ୍ତି, ସୀମାରେ ହରାଇଲୁ, ପଡ଼ିଆରେ ମଧ୍ୟ ହରାଇଲୁ ।  ସେପଟେ କେନ୍ଦ୍ରମନ୍ତ୍ରୀ କିରଣ ରିଜିଜୁ ଯଶପ୍ରୀତ ବୁମରା ଓ ପାକ ଖେଳାଳି ହାରିସ ରଉଫଙ୍କୁ ଫଟୋ ସେୟାର କରି କହିଛନ୍ତି ,  ଏଭଳି ଦଣ୍ଡ ଦରକାର କରୁଥିଲା ପାକିସ୍ତାନ  । 

ପାକିସ୍ତାନକୁ ଖେଳ ପଡ଼ିଆରେ ଧୂଳି ଚଟାଇବା ପରେ ହୁଏତ ଏହା ପ୍ରଥମ ଘଟଣା, ଯେଉଁଠି  ଭାରତର ବରିଷ୍ଠ ରାଜନେତା ଟିମ୍ ଇଣ୍ଡିଆକୁ  ଅଭିନନ୍ଦନ ଜଣାଇବା ସହ ଚିର ପ୍ରତିଦ୍ବନ୍ଦ୍ୱୀ ପାକିସ୍ତାନକୁ ସିଧାସଳଖ ନିଶାଣ କରିଛନ୍ତି । 

ସେପଟେ ଭାରତୀୟ ନେତାଙ୍କ ସୋସିଆଲ ମିଡିଆ ପୋଷ୍ଟ ଦେଖି ଚିହିଁକିଛନ୍ତି  ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ ।  ପୋଷ୍ଟରେ କହିଛନ୍ତି , ଏହା ପରଠୁ ଶାନ୍ତି ଓ ସମାଧାନର ସମସ୍ତ ସମ୍ଭାବନା ଶେଷ ହୋଇଛି ।  ସେପଟେ ପାକ୍ ଗୃହମନ୍ତ୍ରୀ ତଥା ପିସିବି ଅଧ୍ୟକ୍ଷ ମହସିନ ନକଭି କହିଛନ୍ତି ,  ଯୁଦ୍ଧ ଭିତରକୁ ଖେଳକୁ ଟାଣିବା ଅପମାନଜନକ ଘଟଣା ।

୨୦୨୫ ଏସିଆ କପ୍  ପ୍ରଥମ ଦିନରୁ ହିଁ ବିବାଦରେ ରହିଥିଲା ।   ଆୟୋଜନ ସ୍ଥଳଠୁ ନେଇ ହାତ ନ-ମିଳାଇବା ଘଟଣାକୁ ନେଇ ଭାରତ ଓ ପାକିସ୍ତାନ ଟିମ୍ ମଧ୍ୟରେ ବିବାଦ ଓ ବୟାନବାଜି ଜୋରଦାର ଦେଖିବାକୁ ମିଳିଥିଲା । ଏମିତିକି ଖେଳକୁ ନେଇ ରାଜନୀତି ମଧ୍ୟ ହୋଇଥିଲା  ।  ଏବେ ଭାରତ ଜିତିବା ପରେ  ଏସିସି ମୁଖ୍ୟ ମହସିନ ନକଭି ପାକିସ୍ତାନୀ ହୋଇଥିବାରୁ ତାଙ୍କ ହାତରୁ ଟ୍ରଫି ଗ୍ରହଣ କରିନାହିଁ  । ଟ୍ରଫି ନେଇଯାଇଛନ୍ତି ନକଭି  ।    ଏଥିରେ କଡ଼ା ଆପତ୍ତି ଜଣାଇଛି ବିସିସିଆଇ ।   ନଭେମ୍ବରରେ ଆଇସିସି ବୈଠକରେ ଉଠିବ ଏହି ପ୍ରସଙ୍ଗ ଉଠିବ।  ସେପଟେ ନିହତ ଆତଙ୍କବାଦୀ ପରିବାରକୁ ପାକ୍ ଟିମ୍ ମ୍ୟାଚ୍‌ ଫି  ଦାନ କରିବ ବୋଲି କହିଛି। ଏହାକୁ ନେଇ ବି ବିବାଦ । ତେବେ ଶେଷରେ ପାକିସ୍ତାନକୁ ହରାଇ ପୁଣି ଥରେ ଦମ୍ ଦେଖାଇଛି ଭାରତ ।