କନକ ବ୍ୟୁରୋ: ଓଟିଇଟି ପ୍ରଶ୍ନପତ୍ର ଲିକ୍ ଘଟଣାରେ ବୋର୍ଡ କର୍ମଚାରୀ ସାମିଲ ଥିବା ସାମ୍ନାକୁ ଆସିବା ପରେ ବ୍ୟବସ୍ଥାରେ ଗଳାବାଟ ସାମ୍ନାକୁ ଆସିଛି । ପରିଷଦ କେତେ ସ୍ବଚ୍ଛ, ତା ଉପରେ ବି ଉଠିଛି ପ୍ରଶ୍ନ । ଏହାଦ୍ବାରା ଲକ୍ଷ ଲକ୍ଷ ଚାକିରି ଆଶାୟୀଙ୍କ ସ୍ବପ୍ନ ବି ଚୂରମାର ହୋଇଛି ।

Advertisment
  • ଶିକ୍ଷକ କରୁଛନ୍ତି ପ୍ରଶ୍ନପତ୍ର ଚୋରି
  • ଓଟିଇଟି ପ୍ରଶ୍ନପତ୍ର ଲିକ୍‌ରୁ ସାମ୍ନାକୁ ଆସିଲା ସତ

ଓଟିଇଟି ପ୍ରଶ୍ନପତ୍ର ଲିକ୍ର ୬ କାର୍ପଟଦାରଙ୍କ ମଧ୍ୟରୁ ୨ଜଣ, ବିଜୟ ମିଶ୍ର ଓ ସନାତନ ବିଶୋଇ ହେଉଛନ୍ତି ଶିକ୍ଷକ ନେତା । ଅର୍ଥାତ ଶିକ୍ଷକ ହୋଇ ପ୍ରଶ୍ନପତ୍ର ଚୋରିର ଦଲାଲ ପାଲଟିଥିଲେ ଏହି ଦୁଇଜଣ । ସ୍ବତନ୍ତ୍ର ଓଟିଇଟି ପରୀକ୍ଷାରେ ଫେଲ୍‌ ହୋଇଥିବା ଶିକ୍ଷକଙ୍କୁ ଟାର୍ଗେଟ୍‌ କରିଥିଲେ । କପି କରି ପାସ୍‌ ହେବାକୁ ଚାହୁଥିବା ଶିକ୍ଷକଙ୍କୁ ପ୍ରଶ୍ନପତ୍ର ବିକିବାକୁ ଜାଲ ବିଛାଇଥିଲେ । ହେଲେ ଆଶ୍ଚର୍ଯ୍ୟ, ଯେଉଁ ଶିକ୍ଷକ ପିଲାଙ୍କୁ ନୀତି ନୈତିକତାର ପାଠ ପଢ଼ାଉଛନ୍ତି, ସେମାନେ ହିଁ ଓଟିଇଟିରେ କପି କରି ପାସ୍‌ କରିବାକୁ ଉଦ୍ୟମ କରିଛନ୍ତି । 

  • ପରୀକ୍ଷା ପରିଚାଳନାରେ ରହୁନି କି ସ୍ବଚ୍ଛତା?
  • ଉପ ସଭାପତିଙ୍କ ଲାପଟପ୍‌କୁ କେମିତି ଆସିଲା ପ୍ରଶ୍ନ?

ପୂର୍ବତନ ବୋର୍ଡ ସଭାପତି କହିଛନ୍ତି, ଉପସଭାପତିଙ୍କ ଲାପଟପ୍‌କୁ କେମିତି ଆସିଲା ପ୍ରଶ୍ନପତ୍ର? ପୂର୍ବରୁ ମାଧ୍ୟମିକ ଶିକ୍ଷା ପରିଷଦରେ ଏଭଳି ବ୍ୟବସ୍ଥା ନଥିଲା । ବାରମ୍ବାର ପ୍ରଶ୍ନପତ୍ର ଲିକ୍‌, ବୋର୍ଡର କାର୍ଯ୍ୟଦକ୍ଷତା ଉପରେ ପ୍ରଶ୍ନଚିହ୍ନ ଲଗାଇଛି । ସବୁଠାରୁ ବଡ଼ କଥା ହେଲା, ମାଟ୍ରିକ ପରୀକ୍ଷା ପ୍ରଶ୍ନପତ୍ର ପରିଚାଳନା ଠିକ୍‌ ଭାବେ ହେଉଛି ତ? ଓଟିଇଟି ପ୍ରଶ୍ନପତ୍ର ଲିକ୍‌ ଘଟଣାରେ ବୋର୍ଡର ନିଜସ୍ବ କର୍ମଚାରୀ ସାମିଲ ଅଛନ୍ତି । ଏମାନଙ୍କୁ ସ୍କାନରରେ ରଖି ତଦନ୍ତ ଆଗଉଛି କ୍ରାଇମବ୍ରାଞ୍ଚ । ବିଭାଗୀୟ ମନ୍ତ୍ରୀ କହିଛନ୍ତି, ଯେତେବଡ଼ ଲୋକ ହୁଅନ୍ତୁ ନା କାହିଁକି କଠୋର କାର୍ଯ୍ୟାନୁଷ୍ଠାନ ହେବ ।

ଓଟିଇଟି ପରୀକ୍ଷା ସ୍ଥଗିତ ହେବା ଫଳରେ ୭୫ ହଜାରରୁ ଅଧିକ ଆଶାୟୀ ନିରାଶ ହୋଇଛନ୍ତି । ଆଉ ନିଆଁରେ ଘିଅ ଢାଳିଛି ଆର୍‌ଆଇ ଅମିନ ପରୀକ୍ଷା ରଦ୍ଦ ହେବା । ପ୍ରଶ୍ନ ଉଠୁଛି, ଓପିଏସ୍‌ସି, ଓଏସ୍‌ଏସ୍‌ଏସ୍‌ସି ଭଳି ସଂସ୍ଥାଗୁଡ଼ିକ ଠିକ୍‌ ଭାବେ ପରୀକ୍ଷା ପରିଚାଳନା କରିପାରୁନାହାନ୍ତି? ସ୍ବଚ୍ଛତାର ସହ ହେଉନି ସରକାରୀ ଚାକିରି ପାଇଁ ନିଯୁକ୍ତି ପ୍ରକ୍ରିୟା?  ତେବେ ମାଧ୍ୟମିକ ଶିକ୍ଷା ବୋର୍ଡରେ ପ୍ରଶ୍ନପତ୍ର ଲିକ୍ ଘଟଣା ନୂଆ ନୁହେଁ । ଆଉ ଏବେ ଓଟିଇଟି ପ୍ରଶ୍ନପ୍ରତ୍ର ଲିକ୍‌ ଘଟଣାର ସତ ସାମ୍ନାକୁ ଆସିବ ନା ଗିରଫଦାରୀ ପରେ ଶୀତଳଭଣ୍ଡାରକୁ ଚାଲିଯିବ କି ତଦନ୍ତ?