ତାମିଲନାଡୁ ଦଳାଚକଟା ଘଟଣାରେ ରାଜ୍ୟ ସରକାରଙ୍କ ଦ୍ବାରା ଗଠିତ କମିଟିର ତଦନ୍ତ ଆରମ୍ଭ : କରୁର ଯିବେ ଏନଡିଏ ପ୍ରତିନିଧିମଣ୍ଡଳୀ

କନକବ୍ୟୁରୋ  : ତାମିଲନାଡୁ କରୁର ଦଳାଚକଟା ଘଟଣା ପୂରା ଦେଶକୁ ସ୍ତବ୍ଧ କରି ଦେଇଛି ।  ୪୧ ଜଣଙ୍କ ଜୀବନ ଯାଇଥିବା  ଏହି ଅଘଟଣ ପାଇଁ କେବଳ ତାମିଲଗା ଭେଟ୍ରି  କାଝାଗମ୍- ଟିଭିକେ ମୁଖ୍ୟ ଥାଲାପତି ବିଜୟ ଦାୟୀ ନା ଆଉ କାହାକୁ  ଦାୟୀ କରାଯିବ ?   କରୁର କୁ ଏନଡିଏ ପ୍ରତିନିଧି ଦଳ ପଠାଉଥିବା ବେଳେ ଜୋର୍ ଧରିଛି ରାଜନୀତି ।    

ଅଭିନେତାରୁ ନେତା ବନିଥିବା ଥାଲାପତି ବିଜୟ ଆଗାମୀ ବର୍ଷ ହେବାକୁ ଥିବା  ତାମିଲନାଡୁ ବିଧାନସଭା ନିର୍ବାଚନ ପାଇଁ ଏହି ରାଲି ଆୟୋଜନ କରିଥିଲେ ।  ତେଣୁ ତାଙ୍କୁ ଦଳାଚକଟା ପାଇଁ ଦାୟୀ କରାଯାଉଛି ।  କିନ୍ତୁ ବିଜୟଙ୍କ ଲୋକପ୍ରିୟତା ବଢୁଥିବା ଦେଖି କେହି ଷଡ଼ଯନ୍ତ୍ର କରି ଅଘଟଣ ଘଟାଇଥିବା  ତାଙ୍କ ସମର୍ଥକ ଅଭିଯୋଗ କରିଛନ୍ତି ।  ତେବେ ନିରପେକ୍ଷ ତଦନ୍ତ ହେଲେ ସବୁ ସ୍ପଷ୍ଟ ହୋଇଯିବ ବୋଲି ଟିଭିକେର ଓକିଲ କହିଛନ୍ତି ।  

ସେପଟେ ଘଟଣାକୁ ନେଇ ରାଜନୀତି ବି ଜୋର୍ ଧରିଛି  ।  ବିଜୟଙ୍କ ସହ ଫୋନରେ କଥା ହୋଇଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ ।  ତାମିଲନାଡୁ ମୁଖ୍ୟମନ୍ତ୍ରୀ ଏମ୍.କେ  ଷ୍ଟାଲିନଙ୍କ ସହ ମଧ୍ୟ କଥା ହୋଇ ଘଟଣା ବାବଦରେ ବୁଝିଛନ୍ତି ।  ସେପଟେ ମୃତକଙ୍କ ପରିବାର ଓ ଆହତଙ୍କୁ ଭେଟିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ।  ସମ୍ୱେଦନଶୀଳ ଘଟଣାରୁ ଫାଇଦା ଉଠାଇବା ପାଇଁ କେହି କୌଣସି ସୁଯୋଗ ହାତଛଡ଼ା କରିବାକୁ ଚାହୁ ନାହାନ୍ତି ।  

କରୁର ଦଳଚକଟା ଘଟଣାକୁ ନେଇ ତାମିଲନାଡୁ ସରକାରଙ୍କୁ ରିପୋର୍ଟ ମାଗିଛି କେନ୍ଦ୍ର ଗୃହ ମନ୍ତ୍ରାଳୟ  । ରାଜ୍ୟଠାରୁ କେନ୍ଦ୍ର ଏବଂ ଆଞ୍ଚଳିକ ଦଳଠାରୁ ଜାତୀୟ ଦଳଙ୍କ ପର୍ଯ୍ୟନ୍ତ ସମସ୍ତେ ତାଲନାଡୁ ଦଳଚକଟା ଘଟଣାକୁ ନେଇ ସକ୍ରିୟ ହୋଇଉଠିଛନ୍ତି   ।