କାଉ ମିଳନ ଦେଖିବାରୁ ପ୍ରତିକାତ୍ମକ ଶବଦାହ ; ବଞ୍ଚି ଥାଉଥାଉ ହେଲା ପିଣ୍ଡଦାନ

କନକ ବ୍ୟୁରୋ : ଅନ୍ଧ ବିଶ୍ବାସର ବଶବର୍ତ୍ତୀ ମଣିଷ । ଆଦିବାସୀ ସମ୍ପ୍ରଦାୟର ପରମ୍ପରା ଓ କଟକଣାର ଶିକାର ୨ ଯୁବକ । କାଉ ମିଳନ ଦେଖିଲେ ବୋଲି କରାଗଲା ପ୍ରତିକାତ୍ମକ ଶବ ସତ୍କାର । ମଣିଷ ମୃତ୍ୟୁ ପରେ ଯେମିତି ମୃତଦେହ ମଶାଣିକୁ ନିଆଯାଏ, ଠିକ୍ ସେହିପରି ମୃତଦେହ ବଦଳରେ କୋକେଇରେ ପ୍ରତିକାତ୍ମକ କୁଶପୁତ୍ତଳିକା ନିଆଯାଇ କରାଯାଇଛି ଅନ୍ତିମ ସଂସ୍କାର । 

କୋରାପୁଟ ଜିଲ୍ଲା ଜୟପୁର ବ୍ଲକର ରଣ୍ଡାପାଲି ପଞ୍ଚାୟତ ପାତ୍ରଗୁଡ଼ା ଗାଁରୁ ଆସିଛି ଏଭଳି ଅନ୍ଧବିଶ୍ବାସ ଖବର । ଗାଁର ଦୁଇ ଯୁବକ ମୀନ ଜାନୀ ଓ ଧବଲୁ ଜାନୀ ଗୁପ୍ତେଶ୍ବର ପୀଠରୁ ବୋଲବମ୍‌ ସାରି ଫେରିବା ବାଟରେ ଦେଖିଥିଲେ କାଉ ମିଳନ । ସେମାନେ ଏକଥା ଗାଁରେ ଜଣାଇବା ପରେ ବୈଠକ ବସିଥିଲା । ପରେ ୨ ଜଣଙ୍କର ପ୍ରତିକାତ୍ମକ ଶବ ସତ୍କାର କରାଯାଇଛି । ପ୍ରଥମେ ଦୁର୍ଘଟଣାରେ ସେମାନଙ୍କ ମୃତ୍ୟୁ ନେଇ ମିଛ ଖବର ଘୋଷଣା କରାଯାଇଥିଲା । ପରେ କୋକେଇରେ ପ୍ରତିକାତ୍ମକ କୁଶ ପୁତ୍ତଳିକା ନେଇ ଦାହ କରାଯାଇଛି । ଶବ ସତ୍କାର ପରେ ପିତା ଖାଇ ଶୁଦ୍ଧିକ୍ରିୟା ସରିବା ପରେ ୨ ଯୁବକଙ୍କୁ ଘରକୁ ଯିବାକୁ ଅନୁମତି ମିଳିଥିଲା ।  

ଏହାକୁ ଦେଖିଥିବା ଲୋକର ମୃତ୍ୟୁ ହୋଇଥାଏ ବୋଲି ଏହାର କୌଣସି ବୈଜ୍ଞାନିକ ପ୍ରମାଣ ନାହିଁ । ଏହା ସଂପୂର୍ଣ୍ଣ ଅନ୍ଧବିଶ୍ୱାସ । ଆଜି ବି ଆଦିବାସୀ ଅଞ୍ଚଳରେ ଏସବୁ ବଞ୍ଚିଛି । ସେଥିପାଇଁ ପରଜା ସମାଜ ପକ୍ଷରୁ ଜାରି କରାଯାଇଥିବା ଏଭଳି ଅଜବ ପ୍ରଥାକୁ ସମସ୍ତେ ମାନି ଆସୁଛନ୍ତି । କାଉର ରାବ ରାତି ପାହିବାର ସୂଚନା ଦେଇଥାଏ । ପିତୃପୁରୁଷଙ୍କୁ ଶାନ୍ତି ପାଇଁ ସେମାନଙ୍କ ଉଦ୍ଦେଶ୍ୟରେ ଦିଆଯାଉଥିବା ଶ୍ରାଦ୍ଧକୁ ପ୍ରଥମେ କାଉକୁ ଦିଆଯାଇଥାଏ । ତେବେ ଏମାନଙ୍କ ମିଳନର ଦୃଶ୍ୟକୁ କାହିଁକି ଅଶୁଭ ବୋଲି ବିବେଚନା କରାଯାଉଛି ତାହା ଏକ ପ୍ରଶ୍ନ ।