କନକ ବ୍ୟୁରୋ: ଅଚାନକ ଉପରାଷ୍ଟ୍ରପତି ପଦରୁ ଇସ୍ତଫା ଦେଇ ଦେଶବାସୀଙ୍କୁ ଆଶ୍ଚର୍ଯ୍ୟ ଚକିତ କରାଇଛନ୍ତି ଜଗଦୀପ ଧନଖଡ଼ । ଗତ ସୋମବାର ଏଭଳି ନିଷ୍ପତ୍ତି ପରେ ଜାତୀୟ ରାଜନୀତି ଆରମ୍ଭ ହୋଇଯାଇଛି ଅନେକ ଚର୍ଚ୍ଚା ଓ ଆଲୋଚନା । ଜଗଦୀପ ଧନଖଡ଼ ସ୍ୱାସ୍ଥ୍ୟଗତ କାରଣ ଦର୍ଶାଇ ନିଜ ପଦରୁ ଇସ୍ତଫା ଦେଇଥିବା ବେଳେ ଏହାକୁ ସହଜରେ ଗ୍ରହଣ କରିପାରୁନାହାନ୍ତି ବିରୋଧୀ । ଏବେ ବିରୋଧୀ ଓ ଦେଶବାସୀଙ୍କ ମନରେ ଗୋଟିଏ ପ୍ରଶ୍ନ । କିଏ ହେବ ଦେଶର ପରବର୍ତ୍ତୀ ଉପରାଷ୍ଟ୍ରପତି । ଉପରାଷ୍ଟ୍ରପତି ମଙ୍ଗ କିଏ ଧରିବ ତାହାକୁ ନେଇ ଅନେକ ନାମ ଚର୍ଚ୍ଚା ପରିସରରେ ରହିଛି । ସେଥିମଧ୍ୟରୁ ଗୋଟିଏ ନାଁ ହେଉଛି ଜେଡିୟୁ ଦଳିତ ନେତା ତଥା ଭାରତ ରତ୍ନ କର୍ପୁରୀ ଠାକୁରଙ୍କ ପୁଅ ରାମନାଥ ଠାକୁରଙ୍କର । ଆଗକୁ ବିହାର ନିର୍ବାଚନ ଆସୁଛି । ଏଣୁ ଜେଡିୟୁର ଜଣେ ନେତାଙ୍କୁ ଏଭଳି ଏକ ଦାୟିତ୍ୱ ସମ୍ପନ୍ନ ପଦରେ ବସାଇ ବିଜେପି ରାଜନୈତିକ ଗୋଟି ଚାଳନା କରିପାରେ ବୋଲି ଆଲୋଚନା ହେଉଛି ।

Advertisment

ନୀତିଶଙ୍କ ଘନିଷ୍ଠ ରାମନାଥ ଠାକୁର 
ଜେଡିୟୁର ରାଜ୍ୟସଭା ସାଂସଦ ହେଉଛନ୍ତି ରାମନାଥ ଠାକୁର । ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବାପରେ କର୍ପୁରୀ ଠାକୁରଙ୍କ ପୁଅ ରାମନାଥ ଠାକୁରଙ୍କୁ କ୍ୟାବିନେଟ୍‌ରେ ସାମିଲ କରିଥିଲେ ନରେନ୍ଦ୍ର ମୋଦୀ । ପଛୁଆ ବର୍ଗ ମନ୍ତ୍ରୀ ରାମନାଥ ଠାକୁର ନୀତିଶ କୁମାରଙ୍କ ଅତି ଘନିଷ୍ଠ । ସେ ରାଜ୍ୟସଭା ସାଂସଦ ଭାବେ ଜେଡିୟୁ ସଂସଦୀୟ ଦଳର ନେତା ମଧ୍ୟ ରହି ସାରିଛନ୍ତି । ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ବିଶିଷ୍ଠ ଜନନାୟକ ଭାରତ ରତ୍ନ କର୍ପୁରୀ ଠାକୁରଙ୍କ ବଡ଼ ପୁଅ ହେଉଛନ୍ତି ରାମନାଥ ଠାକୁର । କର୍ପୁରୀ ଠାକୁର ବଂଶବାଦ ରାଜନୀତିକୁ ଘୋର ବିରୋଧ କରୁଥିଲେ । ଏଣୁ ସେ ରାଜନୀତିରେ ଥିବା ବେଳେ କେବେ ନିଜ ପରିବାର ଲୋକଙ୍କୁ ରାଜନୀତିରେ ଆଣିନଥିଲେ । ଭାରତ ରତ୍ନ କର୍ପୁରୀ ଠାକୁରଙ୍କ ନିଧନ ପରେ ୧୯୮୯ରେ ପ୍ରଥମ ଥର ପାଇଁ ବିହାରରେ ବିଧାନ ପରିଷଦ ସଦସ୍ୟ ଭାବେ ନିର୍ବାଚିତ ହୋଇଥିଲେ । ଲାଲୁ ଯାଦବ ସରକାର ସମୟରେ ବି ରାମନାଥ ଠାକୁର ମନ୍ତ୍ରୀ ହୋଇଥିଲେ । ଏହାପରେ ନୀତିଶ କୁମାର ଜେଡିୟୁ ନିକଟତର ହେବାକୁ ଲାଗିଲେ । ପରିଶେଷରେ ୨୦୦୫ରେ ସେ ନୀତିଶ ସରକାର ସମୟରେ ସୂଚନା ଓ ଜନସମ୍ପର୍କ ମନ୍ତ୍ରୀ ଭାବରେ ଦାୟିତ୍ୱ ତୁଲାଇଥିଲେ । ସେବେଠୁ ସେ ଜେଡିୟୁ ପ୍ରତି ନିଷ୍ଠା ଦେଖାଇଛନ୍ତି । ୨୦୨୦ରେ ପ୍ରଥମ ଥର ପାଇଁ ତାଙ୍କୁ ରାଜ୍ୟସଭା ପଠାଇଥିଲେ ନୀତିଶ କୁମାର । ଏହାପରେ ସେ ମୋଦୀ ସରକାର କ୍ୟାବିନେଟ୍‌ରେ କେନ୍ଦ୍ର ରାଷ୍ଟ୍ରମନ୍ତ୍ରୀ ଭାବରେ ଦାୟିତ୍ୱ ତୁଲାଇ ଆସିଛନ୍ତି । 

ବିହାର ନିର୍ବାଚନ ବୈତରଣୀ
ନଭେମ୍ବର ସୁଦ୍ଧା ବିହାରରେ ବିଧାନସଭା ନିର୍ବାଚନ ପ୍ରକ୍ରିୟା ଆରମ୍ଭ ହୋଇପାରେ । ଏହାକୁ ନେଇ ନିର୍ବାଚନ କମିସନ କୌଣସି ଘୋଷଣା କରିନଥିଲେ ସୁଧା ଏବେଠୁ ପ୍ରମୁଖ ରାଜନୈତିକ ଦଳ ସଜବାଜ ଆରମ୍ଭ କରି ସାରିଲେଣି । ଏଭଳି ସ୍ଥିତିରେ ବିଜେପି ମଧ୍ୟ ଜେଡିୟୁ ସହ ମିଶି ସରକାରକୁ ଆସିବାକୁ ସବୁ ପ୍ରକାର ଚେଷ୍ଟା କରିବ । ଖାଲି ସେତିକି ନୁହେଁ କର୍ପୁରୀ ଠାରୁକଙ୍କ ପୁଅଙ୍କୁ ଉପରାଷ୍ଟ୍ରପତି ପଦରେ ବସାଇ ବିଜେପି ବିହାର ସ୍ୱାଭିମାନ କାର୍ଡ ଖେଳିପାରେ । କର୍ପୁରୀ ଠାକୁର ବିହାରର ଜଣେ ବିଶିଷ୍ଟ ଜନନାୟକ ଥିଲେ । ଏଭଳି ଭାବେ ବିଜେପି ନୀତିଶଙ୍କୁ ସନ୍ତୁଷ୍ଟ କରିବାକୁ ଚେଷ୍ଟା କରିପାରେ ବୋଲି ବି ଚର୍ଚ୍ଚା ହେଉଛି । 

ଦଳିତ ଭୋଟ ବ୍ୟାଙ୍କ ଉପରେ ନଜର
ଭାରତ ରତ୍ନ କର୍ପୁରୀ ଠାକୁର ଦଳିତଙ୍କୁ ମୁଖ୍ୟ ସ୍ରୋତରେ ସାମିଲ କରିବାକୁ ଅନେକ କିଛି  କରିଥିଲେ । ଜଣେ ବିଶିଷ୍ଟ ସାମାଜିକ କର୍ମକର୍ତ୍ତା ଭାବରେ ସେ ବିହାରବାସୀଙ୍କ ହୃଦୟରେ ରାଜ୍‌ କରିଥିଲେ । ଏହାପରେ ତାଙ୍କ ପୁଅ ରାମନାଥ ଠାକୁରଙ୍କ ଭାବମୂର୍ତ୍ତି ମଧ୍ୟ ଅକ୍ଷୁଣ୍ଣ ରହିଛି । ଦଳିତ ଭୋଟରଙ୍କ ବିଶ୍ୱାସ ମତରେ ରାମନାଥ ଠାକୁର ବାରମ୍ବାର ନିର୍ବାଚନ ଜିତିଛନ୍ତି । ଏଣୁ ତାଙ୍କୁ ବିଜେପି ଏକ ଭୋଟ ବ୍ୟାଙ୍କ ଭାବରେ ବି ଦେଖୁଛି । ତେଣୁ ତାଙ୍କୁ ଉପରାଷ୍ଟ୍ରପତି ପଦରେ ବସାଇ ବିହାରରେ ଜେଡିୟୁ ସହ ସରକାର ଗଢ଼ିବାକୁ ସ୍ୱପ୍ନ ଦେଖୁଛି । କାରଣ ଏଥର ବିହାରରେ ମହାମେଣ୍ଟ ପଲ୍ଲା ଭାରି ଅଛି ବୋଲି ଚର୍ଚ୍ଚା ହେଉଛି । ରାହୁଲ ଗାନ୍ଧୀ ଘନଘନ ବିହାର ଗସ୍ତ କରୁଛନ୍ତି । ଆର୍‌ଜେଡିର ତେଜସ୍ୱୀ ମଧ୍ୟ ନୀତିଶଙ୍କୁ ଟାର୍ଗେଟ୍‌ ପରେ ଟାର୍ଗେଟ୍ କରି ଚାଲିଛନ୍ତି । ଏଣୁ ବିଜେପି କୌଣସି ମତେ ନିର୍ବାଚନ ବୈତରଣୀ ପାର୍‌ ହେବାକୁ ଉପରାଷ୍ଟ୍ରପତି ପଦକୁ ନେଇ ରାଜନୈତିକ ଗୋଟି ଚାଳନା କରିପାରେ ।