ରାଜ୍ୟସଭାରେ ସମର୍ଥନ ରାଜ୍ୟରେ ସମଦୂରତ୍ୱ! ବିଜେଡିରେ ଚାଲିଛି କ’ଣ?

କନକ ବ୍ୟୁରୋ: ନବୀନ ନିବାସରେ ସରିଲା ରୁଦ୍ଧଦ୍ୱାର ବୈଠକ  । ଦିନରେ ଶଙ୍ଖ ଭବନରେ ବୈଠକ ପରେ ସନ୍ଧ୍ୟାରେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ନବୀନ ନିବାସରେ ଭେଟିଛନ୍ତି ବିଜେଡିର ବରିଷ୍ଠ ନେତାମାନେ । ଖାସ୍ କରି ବିଜେଡିର ପରାମର୍ଶଦାତା କମିଟି ନବୀନଙ୍କୁ ଭେଟି ବିସ୍ତୃତ ଆଲୋଚନା କରିଥିବା କହିଛନ୍ତି ପରାମର୍ଶଦାତା କମିଟିର ଅଧ୍ୟକ୍ଷ ପ୍ରସନ୍ନ ଆଚାର୍ଯ୍ୟ । ପ୍ରସନ୍ନ କହିଛନ୍ତି, ଦିନରେ ଯାହା ଆଲୋଚନା ହୋଇଥିଲା ସେନେଇ ଦଳର ସଭାପତିଙ୍କୁ ଜଣାଇଲୁ । ଅନେକ ଦଳୀୟ ପ୍ରସଙ୍ଗ ନେଇ ନବୀନ ବାବୁଙ୍କ ସହ ଆଲୋଚନା ହେଲା ।

ଶଙ୍ଖ ଭବନରେ ଯେଉଁ ଯେଉଁ ପଏଣ୍ଟ ଉପରେ ଆଲୋଚନା ହୋଇଥିଲା ସେନେଇ ଆମ ସଭାପତିଙ୍କୁ ଅବଗତ କରାଇଛୁ । ୱାକଫ୍ ବିଲ୍ ନେଇ ମଧ୍ୟ ଦିନରେ ଆଲୋଚନା ହୋଇଥିଲା ଆଉ ସେନେଇ ଆମ ମତ ସବୁବେଳେ ପୂର୍ବଭଳି ରହିବ । ବିଜେଡି ଧର୍ମ ନିରପେକ୍ଷ ଦଳ ଥିଲା, ଅଛି ଆଉ ଭବିଷ୍ୟତରେ ମଧ୍ୟ ରହିବ । ୱାକଫ୍ ବିଲ୍ ନେଇ ବିଜେଡି ସାଂସଦଙ୍କ ସମର୍ଥନ ବିଷୟରେ ନବୀନ ବାବୁଙ୍କୁ ଅବଗତ କରାଇଲୁ । ନବୀନ ବାବୁଙ୍କୁ ରାଜ୍ୟସଭା ସଦସ୍ୟମାନେ ନିଜ ନିଜ ମତ ଜଣାଇ ସାରିଛନ୍ତି ବୋଲି ଗଣମାଧ୍ୟମକୁ କହିଛନ୍ତି ପ୍ରସନ୍ନ ଆଚାର୍ଯ୍ୟ ଓ ଦେବୀପ୍ରସାଦ ମିଶ୍ର  ।