ବ୍ୟାଙ୍କ ଆଗରେ ‘ସୁଭଦ୍ରା’ ଭିଡ଼ । ୫ ହଜାର ଟଙ୍କା ପାଇଁ ଲମ୍ବା ଲାଇନ୍‌

କନକ ବ୍ୟୁରୋ: ସୁଭଦ୍ରା ଟଙ୍କା ଉଠାଇବାକୁ ବ୍ୟାଙ୍କରେ ଜମୁଛି ପ୍ରବଳ ଭିଡ଼। ଖାଲି ଟଙ୍କା ଉଠା ନୁହେଁ, ଆଧାର ଅପଡେଟ ପାଇଁ ଜନସେବା କେନ୍ଦ୍ର ଆଗରେ ଲୋକମାନେ ଗହଳି ଜମାଉଛନ୍ତି । ପ୍ରଥମ ପର୍ଯ୍ୟାୟରେ ୨୫ଲକ୍ଷ ମହିଳାଙ୍କୁ ଟଙ୍କା ମିଳିଛି। ତେଣୁ ଅନ୍ୟମାନେ ମଧ୍ୟ ଶୀଘ୍ର ଯୋଜନାର ଲାଭ ପାଇବାକୁ ବେଶ୍ ଉତ୍ସାହିତ ହୋଇପଡିଛନ୍ତି।

• ବ୍ୟାଙ୍କ ଆଗରେ ‘ସୁଭଦ୍ରା’ ଭିଡ଼
• ୫ ହଜାର ଟଙ୍କା ପାଇଁ ଲମ୍ବା ଲାଇନ୍‌ 

ମହିଳାଙ୍କ ବ୍ୟାଙ୍କ ଆକାଉଣ୍ଟକୁ ଆସିଛି ‘ସୁଭଦ୍ରା’ ଟଙ୍କା । ପ୍ରଥମ ପର୍ଯ୍ୟାୟରେ ୫ ହଜାର ଟଙ୍କା ଲେଖାଏଁ ପ୍ରଦାନ କରାଯାଇଛି । ଆଉ ଏହି ଟଙ୍କା ଉଠାଇବାକୁ ବ୍ୟାଙ୍କ ଆଗରେ ଜମୁଛି ଅସମ୍ଭାଳ ଭିଡ଼ । ସକାଳୁ ସନ୍ଧ୍ୟା ଯାଏଁ ଅଖିଆ ଅପିଆ ହୋଇ ଲାଇନରେ ଛିଡ଼ା ହେଉଛନ୍ତି ମହିଳା । କଳାହାଣ୍ଡି ଧର୍ମଗଡ଼ ଷ୍ଟେଟ ବ୍ୟାଙ୍କ ଶାଖାରେ ୨୪ଟି ପଞ୍ଚାୟତର ଲୋକଙ୍କ ଆକାଉଣ୍ଟ ଥିବା ବେଳେ ଏଠାରେ ପ୍ରବଳ ଭିଡ଼ ଦେଖିବାକୁ ମିଳିଛି । ବ୍ୟାଙ୍କଟି ଜାତୀୟ ରାଜପଥ କଡ଼ରେ ଥିବାରୁ ଟ୍ରାଫିକ ସମସ୍ୟା ମଧ୍ୟ ସୃଷ୍ଟି ହେଉଛି ।

ସେହିପରି ବାଲେଶ୍ବର ସୋରରୁ ମଧ୍ୟ ଆସିଛି ସମାନ ଖବର। ମଙ୍ଗଳପୁର ଅଞ୍ଚଳରେ ବ୍ୟାଙ୍କ ଖୋଲିବା ଆଗରୁ ମହିଳାମାନେ ଲାଇନ୍‌ ଲଗାଉଛନ୍ତି । କିଏ ଟଙ୍କା ଉଠାଇବା ପାଇଁ ଆସୁଛି ତ ଆଉ କିଏ କେୱାଇସି ଏବଂ ମୋବାଇଲ ଲିଙ୍କ ପାଇଁ ଧାଡ଼ିରେ ଛିଡ଼ା ହେଉଛି । ତା ସହ କାମାକ୍ଷାନଗରରେ ମଧ୍ୟ ସୁଭଦ୍ରା ଟଙ୍କା ପାଇବା ପାଇଁ ମହିଳାଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି । ଏଠି ଆଧାର ଅପଡେଟ ପାଇଁ କେନ୍ଦ୍ର ଆଗରେ ଲୋକମାନେ ଗହଳି ଜମାଉଛନ୍ତି । ୧୦ ଦିନ ହେବ ଏଭଳି ଭିଡ଼ ଜମୁଥିବାରୁ ଅନେକ କେୱାଇସି ଅପଡେଟ କରି ନପାରି ଫେରି ଯାଉଛନ୍ତି ।

କଟକରେ ମଧ୍ୟ ଆଧାର କେନ୍ଦ୍ର ଆଗରେ ମହିଳାଙ୍କ ଭିଡ଼ ଦେଖିବାକୁ ମିଳିଛି । ରାସନକାର୍ଡ ଇ-କେୱାଇସି ଏବଂ ଆଧାର ଅପଡେଟ ପାଇଁ ଭୋର ୩ଟାରୁ ଧାଡ଼ି ଲଗାଉଛନ୍ତି ମହିଳା । ତେବେ ସୁଭଦ୍ରା ଯୋଜନାରେ ପ୍ରଥମ ପର୍ଯ୍ୟାୟରେ ୨୫ ଲକ୍ଷ ମହିଳାଙ୍କୁ ଟଙ୍କା ମିଳିଛି । ତେଣୁ ଅନ୍ୟମାନେ ମଧ୍ୟ ଶୀଘ୍ର ଯୋଜନାର ଲାଭ ପାଇବାକୁ ଉତ୍ସାହିତ ଅଛନ୍ତି । ସେହିପରି ଯଦିଓ ରାସନକାର୍ଡ E-KYC ପାଇଁ କୌଣସି ନିର୍ଦ୍ଦିଷ୍ଟ ସମୟ ସୀମା ନାହିଁ ତଥାପି ଲୋକେ କୌଣସି ରିକ୍ସ ନନେଇ ଏବେଠୁ ଏହାକୁ ଅପଡେଟ କରିବାକୁ ଭିଡ଼ ଜମାଉଛନ୍ତି ।