ଭଙ୍ଗାଘରେ ଚାଲିଛି ଭବିଷ୍ୟତ ଗଢ଼ା । ବିପଦସଙ୍କୁଳ ଅବସ୍ଥାରେ ଚାଲିଛି ଶିକ୍ଷାଦାନ ।

କନକ ବ୍ୟୁରୋ: ଦୟନୀୟ ଅବସ୍ଥାରେ ପଡିଛି ବହୁ ପୁରୁଣା ବିଦ୍ୟାଳୟ । ବର୍ଷେ କି ଦୁଇ ବର୍ଷ ନୁହେଁ । ୫୦ବର୍ଷରୁ ଅଧିକ ବର୍ଷ ହେଲା ସୁଧୁରିପାରିଲାନି ବିଦ୍ୟାଳୟ ସ୍ଥିତି  । ବଲାଙ୍ଗିର ଜିଲ୍ଲା ଧରବଗଡ ପଞ୍ଚାୟତ ଗୋଏଲଭାଡ଼ି ଗାଁର ଚିତ୍ର ଦେଖିଲେ ଯେ କେହିବି ଆଶ୍ଚର୍ଯ୍ୟ ହୋଇଯିବେ । ବହୁ ପୁରୁଣା ସ୍କୁଲ ହୋଇଥିବା ବେଳେ ଭଙ୍ଗା ଘରେ ପଢୁଛନ୍ତି ପିଲା । ବିପଦ ସଙ୍କୁଳ ଅବସ୍ଥାରେ ବିଦ୍ୟାଳୟ କୋଠରୀ । କାନ୍ଥ ଫାଟି ଯାଇଥିବା ବେଳେ କେତେବେଳେ ଅଘଟଣ ଘଟିବ କହିହେବନି । ତାରି ତଳେ ଗୋଟିଏ କୋଠରୀରେ ବସୁଛନ୍ତି ପିଲା । ଏନେଇ ଅଭିଯୋଗ ହୋଇଥିଲେ ବି ଶୁଣିବାକୁ କେହି ନାହିଁ । ହେଲେ ଗୋଟିଏ କୋଠରୀ ତିଆରି ହେଉଥିବା ବେଳେ ଏହା ଯଥେଷ୍ଟ ନୁହେଁ ବୋଲି ଅଭିଯୋଗ ହୋଇଛି । 
 

ବହୁବାର ଜଣାଯିବା ପରେ ସମସ୍ୟାର ସମାଧାନ ହୋଇପାରୁନି । ପ୍ରତିଥର ଭଳି ଚଳିତଥର ବି ମିଳିଛି ପ୍ରତିଶ୍ରୁତି। ସରକାରଙ୍କୁ ସମସ୍ୟା ନେଇ ଜଣାଯିବା ସହିତ ଆବେଦନ ହୋଇଛି । ପିଲାମାନଙ୍କ ସୁବିଧା ପାଇଁ ସରକାର ନିଜ ତରଫରୁ ସହଯୋଗ କରିବେ ବୋଲି ଜଣାଯାଇଛି ।  
ବିଦ୍ୟାଳୟ ସମସ୍ୟା ପ୍ରତି ଗୁରୁତ୍ବ ଦିଆଯାଇ ଖୁବଶୀଘ୍ର ସମାଧାନ କରାଯାଇପାରିଲେ ପିଲାମାନେ ଉପକୃତ ହୋଇପାରିବେ ।