ଦିନ ମଜୁରିଆ ଉପରେ ବିଧାତା ସାଜିଛି ବଇରୀ ; ଲିଟାଙ୍କ ଭାଗ୍ୟରେ ଲମ୍ବିଛି ଦୁଃଖର ଲମ୍ବା ଚିଠା

କନକ ବ୍ୟୁରୋ: ସ୍ବପ୍ନ ଯେଉଁଠି ସମାଧି ନିଏ, ଜୀବନ ଯେବେ ଜଙ୍ଗଲ ଭିତରୁ ଚିତ୍କାର କରେ, ଭୋକ ସହ ଭେକକୁ ଭାଗ୍ୟ ଯେବେ ଭୂତ କରିଦିଏ, ସେତେବେଳେ ସାମନାକୁ ଆସେ ଚାଳ ଛପର ଛାତିରେ ଲୁଚି ରହିଥିବା ଦରିଦ୍ରର ଛାତି ଚିରିଦେଲା ଭଳି ଦୃଶ୍ୟ । ଘର ହତାକୁ ପଶିଗଲେ ଆପଣଙ୍କ ଆଖି ଯୋଡ଼େ ନିରୀହ ଆଖିରେ ନିଶ୍ଚୟ ମିଶିଯିବ । ସେ ବି ଆପଣଙ୍କୁ ଆଶା ଓ ଅପେକ୍ଷାର ଆଖିରେ ବଲ ବଲ କରି ଚାହିଁ ରହିବେ । ଏମିତିକି କିଏ ଆପଣଙ୍କୁ ଦେଖି ହସି ପକାଇବ ତ ପୁଣି ଆଉ କିଏ ନିର୍ବାକ ଓ ନିସ୍ତେଜ ହୋଇଯିବ । କାଳେ କିଏ ତାଙ୍କ ଦୁର୍ଦ୍ଦଶାମୟ ଜୀବନରୁ ମୁକ୍ତି ଦେବ, ଏମିତି କିଛି ଭାବି ଭାବି ଦିନ କାଟୁଛନ୍ତି ଖୁଣ୍ଟା ବିପ୍ରଚରଣପୁର ଗାଁର ଦିନ ମଜୁରିଆ ଲିଟା ମୁର୍ମୁଙ୍କ ପରିବାର । 

୨ ଜଣ ଝିଅ ୩ ଜଣ ପୁଅ ଏବଂ ସ୍ତ୍ରୀ କାରମୀଙ୍କୁ ନେଇ ଲିଟାଙ୍କ ସଂସାର । ଦଇବ ଯେମିତି ଏ ପରିବାର ଉପରେ ଦାଉ ସାଧିବାକୁ ପଣ କରିଛି । ସେଥିପାଇଁ ବୋଧେ ଲିଟାଙ୍କ ଭାଗ୍ୟରେ ଲମ୍ବିଛି ଦୁଃଖର ଲମ୍ବା ଚିଠା । କାହିଁକି ନା ୫ ଜଣ ଯାକ ସନ୍ତାନ ଦିବ୍ୟାଙ୍ଗ । ବାପା ଲିଟା ମୁର୍ମୁ ଦିନ ମଜୁରିଆ ଭାବେ କାମ କରନ୍ତି, ଆଉ ମା କାରମୀ ଘରେ ରହି ୫ ପିଲାଙ୍କ କଥା ବୁଝନ୍ତି । ଯଦି ତାଙ୍କ ଯତ୍ନ ନନିଅନ୍ତି ସେମାନଙ୍କ ପେଟକୁ ଦାନା ଯିବନି । ଆପଣ ଏ ଦିବ୍ୟାଙ୍ଗ ପିଲାଙ୍କ ଚେହେରାକୁ ଦେଖିଲେ ବୁଝି ପାରିବେ ସରଳତାର ସଂଘର୍ଷ ଭରା କାହାଣୀ । କିଏ ଖାଲି ବାସି ପଖାଳକୁ ବସି ଖାଉଛି ତ ଆଉ କିଏ କୁକୁଡ଼ା ସହିତ ଖେଳୁଛି । ମାନସିକ ବିକାରଗ୍ରସ୍ତ ଛୁଆମାନଙ୍କ ଛାତିରେ ଭରି ରହିଛି ଅକୁହା ଯନ୍ତ୍ରଣା । 

ଅଧିକ ପଢ଼ନ୍ତୁ--କର୍ଣ୍ଣାଟକ କଂଗ୍ରେସର ତୁଟି ଗଲା କି କଳି ? ଗୋଟିଏ ଟେବୁଲକୁ ଆସିଲେ ଡି.କେ ଓ ସିଦ୍ଧରମୈୟା

ମା’ ଦୁଇ ପୁଅଙ୍କୁ ଦୁର୍ବଳ ମନେ କରାଇଦେବନି ବୋଲି ମଝିରେ ମଝିରେ ସେମାନଙ୍କୁ ଧାନ ପିଟା ମଧ୍ୟ ଶିଖାଉଛି । ଆଉ ଅନ୍ୟ ୩ ପିଲାଙ୍କ ଭିତରୁ କେହି କଥା କହି ପାରନ୍ତିନି । ଭଙ୍ଗା ଦଦରା ଚାଳ ଘରେ ପୁରା ପରିବାର ରହୁଛନ୍ତି । ବିଡ଼ମ୍ବନାର କଥା ହେଲା ଯେ, ଆଜି ପର୍ଯ୍ୟନ୍ତ ସେମାନଙ୍କ ପାଇଁ ସରକାରୀ ଯୋଜନା ସତେ ଯେମିତି ସାତ ସପନ ପାଲଟିଛି । ନା ଦିବ୍ୟାଙ୍ଗ ସାର୍ଟିଫିକେଟ, ନା ମିଳୁଛି ଭତ୍ତା, କେବଳ ଗୋଟିଏ ରାସନ କାର୍ଡରେ ମିଳୁଛି ୩୦ କେଜି ଚାଉଳ । ସରକାରୀ ବାବୁ ଏବଂ ଜନ ପ୍ରତିନିଧିଙ୍କ ନଜର ଆଢୁଆଳରେ ରହି ଯାଇଥିବା ଏହି ପରିବାରର ଦୁଃଖ ବାବଦରେ ପଚାରି ବୁଝିବାକୁ ଆମେ ପହଞ୍ଚିଥିଲୁ କପ୍ତିପଦା ଉପଖଣ୍ଡ ଉପଜିଲ୍ଲାପାଳଙ୍କ ନିକଟରେ । ଆମେ ଖବର ଦେଖାଇଲୁ, ଏବେ ଏମିତି ବିକଳ ଚିତ୍ର ଦେଖିବା ପରେ ଏ ଅସହାୟ ପରିବାରକୁ ଯଥାଶୀଘ୍ର ସରକାରୀ ସହାୟତା ମିଳିବ ବୋଲି ଆଶା କରିବା ।