କନକ ବ୍ୟୁରୋ:  ଦେଶର ଦୁଇ ପ୍ରମୁଖ ମହାନଗରୀ ଦିଲ୍ଲୀ ଏବଂ ମୁମ୍ବାଇରେ କୁକର ଏବଂ ପାରାଙ୍କୁ କେନ୍ଦ୍ର କରି ଅଭାବନୀୟ ପରିସ୍ଥିତି ସୃଷ୍ଟି ହୋଇଛି । ଗୋଟିଏ ପଟେ ଦିଲ୍ଲୀରେ ବୁଲା କୁକୁର  ଆତଙ୍କ ଭଳି ନିଷ୍ଠୁର ଘଟଣା ସାମ୍ନାକୁ ଆସୁଥିବା ବେଳେ, ଅନ୍ୟପଟେ ମୁମ୍ବାଇରେ ପାରାଙ୍କୁ ଖାଇବାକୁ ଦେବାକୁ ନେଇ ବିବାଦ ତେଜିବାରେ ଲାଗିଛି । ଏହି  ଦୁଇଟି ଯାକ ଘଟଣାରେ ପଶୁ ଅଧିକାର କର୍ମୀମାନେ ସକ୍ରିୟ ହୋଇଉଠିଛନ୍ତି ଏବଂ ପ୍ରଶାସନ ଓ ସାଧାରଣ ଲୋକଙ୍କ ମଧ୍ୟରେ ଏକ ପ୍ରକାରର ବିବାଦୀୟ ପରିସ୍ଥିତି ସୃଷ୍ଟି ହୋଇଛି । ରାସ୍ତାଗୁଡ଼ିକୁ ବୁଲା କୁକୁର ମୁକ୍ତ କରିବା ପାଇଁ କଡ଼ା ନିର୍ଦ୍ଦେଶ ଜାରି କରିଛନ୍ତି। ସମସ୍ତ ବୁଲା କୁକୁରଙ୍କୁ ଧରିବାକୁ ସୁପ୍ରିମ୍‌ କୋର୍ଟ ନିର୍ଦ୍ଦେଶ ଦେଇଛନ୍ତି  । ଏହି କୁକୁର ମାନଙ୍କୁ ତୁରନ୍ତ ଧରି ଡଗ୍‌ ସେଲ୍‌ଟର ହୋମ୍‌ ରେ ଭର୍ତ୍ତି କରିବାକୁ କହିଛନ୍ତି  କୋର୍ଟ  ।

Advertisment

କୋର୍ଟ ଏହି କୁକୁରମାନଙ୍କର ବନ୍ଧ୍ୟାକରଣ ଏବଂ ଟୀକାକରଣ ପାଇଁ ମଧ୍ୟ ନିର୍ଦ୍ଦେଶ ଦେଇଛନ୍ତି।  କୁକୁର ଧରିବାରେ ବାଧା ସୃଷ୍ଟି କରୁଥିବା ଲୋକଙ୍କ ବିରୁଦ୍ଧରେ କଠୋର ଅବମାନନା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମଧ୍ୟ କୋର୍ଟ ଚେତାବନୀ ଦେଇଛନ୍ତି। ଶିଶୁ, ବୃଦ୍ଧ ଏବଂ ମହିଳାଙ୍କ ସୁରକ୍ଷା ପାଇଁ ଏହି ନିଷ୍ପତ୍ତି ନିଆଯାଇଛି । ଦିଲ୍ଲୀରେ ବୁଲା କୁକୁରଙ୍କ ସମସ୍ୟା ବହୁତ ଦିନ ଧରି ଆଲୋଚନାରେ ରହିଛି । କୁକୁର କାମୁଡ଼ା ଏବଂ ଆକ୍ରମଣର ବଢ଼ୁଥିବା ଘଟଣା ଲୋକଙ୍କୁ ଚିନ୍ତିତ କରିଛି। ସୁପ୍ରିମକୋର୍ଟ ଏହି ସମସ୍ୟାକୁ ବହୁତ ଗମ୍ଭୀର ଭାବରେ ବିଚାର କରିଥିଲେ ଏବଂ ସ୍ୱତଃପ୍ରବୃତ୍ତ ଭାବରେ ବିଚାର କରି ଏହି ନିଷ୍ପତ୍ତି ନେଇଥିଲେ । ଅନ୍ୟପକ୍ଷରେ, ବମ୍ବେ ହାଇକୋର୍ଟ ମୁମ୍ବାଇରେ ପାରାମାନଙ୍କୁ ଖାଇବାକୁ ଦେବା ଉପରେ ନିଷେଧ କରିଛନ୍ତି । ସ୍ୱାସ୍ଥ୍ୟଗତ ସମସ୍ୟାକୁ ଦୃଷ୍ଟିରେ ରଖି ଏହି ନିଷେଧ ଲାଗୁ କରାଯାଇଛି । ହାଇକୋର୍ଟ କହିଛନ୍ତି ଯେ ପାରାଙ୍କ ମଳରୁ ଶ୍ୱାସକ୍ରିୟା ଜନିତ ରୋଗ ବ୍ୟାପୁଛି । କୋର୍ଟଙ୍କ ନିର୍ଦ୍ଦେଶ ଉପରେ କାର୍ଯ୍ୟ କରି, BMC ଅନେକ ପାରା ଘର ବନ୍ଦ କରିଦେଇଛି  ।