କନକ ବ୍ୟୁରୋ:  ଶିଳ୍ପମୁହାଁ ହେଉଛି ଓଡ଼ିଶା । ବିକଶିତ ଓଡ଼ିଶା ପାଇଁ ଆଗକୁ ବଢ଼ିଛନ୍ତି ରାଜ୍ୟ ସରକାର । ପ୍ରଥମେ ମେକ୍‌ ଇନ୍‌ ଓଡ଼ିଶା, ଏବେ ବୟନଶିଳ୍ପ କନ୍‌କ୍ଲେଭ, ଶିଳ୍ପପାର୍କ ପରେ ଚିନିକଳର ପୁନଃଉଦ୍ଧାର ପାଇଁ ଅଣ୍ଟା ଭିଡ଼ଛନ୍ତି ସରକାର ।  ରାଜ୍ୟରେ ଦୀର୍ଘଦିନ ଧରି ବନ୍ଦ ପଡ଼ିଥିବା ଚିନିକଳକୁ ପୁଣି କାର୍ଯ୍ୟକ୍ଷମ କରିବାକୁ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର । ସମବାୟ ସମିତିର ରେଜିଷ୍ଟ୍ରାର ଏଭଳି ଚିନିକଳର ପୁନରୁଦ୍ଧାର ପାଇଁ ଦୁଇଜଣ ନୋଡାଲ ଅଫିସରଙ୍କୁ ନିଯୁକ୍ତ କରିଛନ୍ତି । ଏମାନେ ଚିନିକଳକୁ ପୁଣି ଚାଲୁ କରିବା ପାଇଁ ରୋଡ୍‌ମ୍ୟାପ୍‌ ପ୍ରସ୍ତୁତ କରିବେ ।  ଏହାଫଳରେ ବଲାଙ୍ଗୀର, ବରଗଡ଼, ଆସ୍କା, ବଡ଼ମ୍ବା ଓ ନୟାଗଡ଼ ଚିନିକଳ ଖୋଲିବା ରାସ୍ତା ପରିଷ୍କାର ହୋଇଛି । ଖୁବଶୀଘ୍ର ନିଯୁକ୍ତ ନେଡାଲ ଅଧିକାରୀ ଏ ନେଇ ବିସ୍ତୃତ ରିପୋର୍ଟ ସରକାରଙ୍କୁ ଦେବେ । ଏହା ପରେ ଚିନିକଳ ଖୋଲିବାକୁ ପ୍ରକ୍ରିୟା ଆରମ୍ଭ କରିବେ । 

ଚିନିକଳ ଭଳି ଅନ୍ୟ ଶିଳ୍ପକ୍ଷେତ୍ରକୁ ମୋହନ ସରକାର ଗୁରୁତ୍ବ ଦେଇଛନ୍ତି । ବିଶେଷ କରି ବୟନଶିଳ୍ପରେ ବଡ଼ ପୁଞ୍ଜିନିବେଶ ହେବ ।  ଶୁକ୍ରବାର ଆୟୋଜିତ ପ୍ରଥମ ବୟନ ଶିଳ୍ପ କନ୍‌କ୍ଲେଭ୍‌ରେ ୩୩ଟି ଏମ୍‌ଓୟୁ ସ୍ବାକ୍ଷରିତ ହୋଇଛି । ଏହାଦ୍ବାରା ୭ ହଜାର ୮୦୮ କୋଟି ଟଙ୍କାର ପୁଞ୍ଜିନିବେଶ ପାଇଁ ପ୍ରତିଶ୍ରୁତି ମିଳିଛି । ଏହାଦ୍ବାରା ୫୩ ହଜାରରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ । ସେହିଭଳି ଜଗତସିଂହପୁର, ବଲାଙ୍ଗୀର, କଟକ, ଗଞ୍ଜାମ, କେନ୍ଦୁଝର ଓ ସମ୍ବଲପୁରରେ ଖୁବ୍‌ଶୀଘ୍ର ଶିଳ୍ପପାର୍କ ପ୍ରତିଷ୍ଠା ପାଇଁ ଯୋଜନା କରୁଛନ୍ତି ସରକାର ।

ରାଜ୍ୟରେ ଶିଳ୍ପସଂସ୍ଥାଗୁଡ଼ିକୁ ଆକୃଷ୍ଟ କରିବାକୁ ବିଜେପି ସରକାର ଜାନୁଆରିରେ ଆୟୋଜନ କରିଥିଲେ ମେକ୍‌ ଇନ୍‌ ଓଡ଼ିଶା କନ୍‌କ୍ଲେଭ୍‌ । ଏଥିରେ ୧୬ ଲକ୍ଷ ୭୩ ହଜାର କୋଟି ଟଙ୍କାର ନିବେଶ ପାଇଁ ବୁଝାମଣା ହୋଇଥିଲା  । ଏବେ ଚିନିକଳ, ବୟନଶିଳ୍ପ, ଶିଳ୍ପପାର୍କ ଉପରେ ଫୋକସ କରି ୨୦୩୬ ବିକଶିତ ଓଡ଼ିଶା ପାଇଁ ସରକାର ଆଗକୁ ବଢ଼ିଛନ୍ତି ।