ମହେନ୍ଦ୍ର ସିଂ ଧୋନୀଙ୍କୁ ଝାଡ଼ଖଣ୍ଡ ହାଇକୋର୍ଟଙ୍କ ନୋଟିସ୍ । ଫ୍ୟାନ୍ସଙ୍କ ମଧ୍ୟରେ ଅସନ୍ତୋଷ ।

କନକ ବ୍ୟୁରୋ: ଟିମ୍ ଇଣ୍ଡିଆର ପୂର୍ବତନ କ୍ୟାପଟେନ୍ ମହେନ୍ଦ୍ର ସିଂ ଧୋନୀଙ୍କୁ ନେଇ ଆସିଛି ଆଶ୍ଚର୍ଯ୍ୟ କରିଦେଲା ଭଳି ଖବର । ମଙ୍ଗଳବାର ଝାଡ଼ଖଣ୍ଡ ହାଇକୋର୍ଟ ଏକ ମାମଲାକୁ ନେଇ ଧୋନୀଙ୍କୁ ନୋଟିସ୍ ଜାରି କରିଛନ୍ତି ଏବଂ ଉଚ୍ଚନ୍ୟାୟାଳୟରେ ହାଜିର ହେବାକୁ ତାରିଖ ମଧ୍ୟ ଦେଇଛନ୍ତି । ଯାହାକୁ ନେଇ ଜାତୀୟ ଗଣମାଧ୍ୟମର ହେଡଲାଇନରେ ଏବେ ଧୋନୀ, ଧୋନୀ ଆଉ କେବଳ ଧୋନୀଙ୍କୁ ନେଇ ଚର୍ଚ୍ଚା । 

ସୂଚନା ମୁତାବକ, ଧୋନୀଙ୍କ ନାଁରେ ତାଙ୍କ ପୂର୍ବତନ ବିଜନେସ୍ ପାର୍ଟନର ମହିରି ଦିବାକର ଏବଂ ସୌମ୍ୟା ଦାସ ଝାଡ଼ଖଣ୍ଡ ହାଇକୋର୍ଟରେ ଏକ ମାମଲା ଦାୟର କରିଛନ୍ତି । ଯାହାକୁ ନେଇ କୋର୍ଟରେ ନିଜ ପକ୍ଷ ରଖିବାକୁ ଧୋନୀଙ୍କୁ ନିର୍ଦ୍ଦେଶ ଦେଇଛନ୍ତି ଝାଡ଼ଖଣ୍ଡ ଉଚ୍ଚନ୍ୟାୟାଳୟ । ନୋଟିସରେ ଉଲ୍ଲେଖ ଅଛି ଯେ, (ଆର୍କା ସ୍ପୋର୍ଟ୍ସ ଆଣ୍ଡ୍ ମ୍ୟାନେଜମେଣ୍ଟ)ର ନିର୍ଦ୍ଦେଶକ ମିହିର ଦିବାକର ଏବଂ ସୌମ୍ୟା ଦାସ ଧୋନୀଙ୍କ ନାଁରେ ଏକ କ୍ରିକେଟ୍ ଏକାଡେମୀ ଖୋଲିବା ନେଇ ଚୁକ୍ତି କରିଥିଲେ । ହେଲେ କିଛି ବିବାଦ କାରଣରୁ ଚୁକ୍ତି ଆଗକୁ ବଢ଼ିନଥିଲା ଏପରିକି ମହେନ୍ଦ୍ର ସିଂ ଧୋନୀ ଉଭୟ ମିହିର ଏବଂ ସୌମ୍ୟାଙ୍କ ନାଁରେ ଠକେଇ କରିଥିବା ଅଭିଯୋଗ କରିଥିଲେ । ଜାନୁୟାରୀ ମାସରେ ଝାଡ଼ଖଣ୍ଡର ରାଜଧାନୀ ରାଞ୍ଚିରେ ଅପରାଧିକ ମାମଲା ଦାୟର କରିଥିଲେ । ଏହାପରେ ହିଁ (ଆର୍କା ସ୍ପୋର୍ଟ୍ସ ଆଣ୍ଡ୍ ମ୍ୟାନେଜମେଣ୍ଟ ଏବଂ ଧୋନୀଙ୍କ ମଧ୍ୟରେ ଆଇନଗତ ଲଢ଼େଇ ଚାଲିଛି ।

ଧୋନୀ ଦେଇଥିବା ଏତଲା ମୁତାବକ, (ଆର୍କା ସ୍ପୋର୍ଟ୍ସ ଆଣ୍ଡ୍ ମ୍ୟାନେଜମେଣ୍ଟ)ର ଦୁଇ ନିର୍ଦ୍ଦେଶକ ମିହିର ଦିବାକର ଏବଂ ସୌମ୍ୟା ଦାସ ୧୫ କୋଟି ଟଙ୍କା ଠକେଇ କରିଛନ୍ତି । ତେଣୁ ସେ ୨୦୨୧ରେ ହିଁ କ୍ରିକେଟ୍ ଏକାଡେମୀକୁ ନେଇ ହୋଇଥିବା ଚୁକ୍ତିକୁ ମନା କରିଦେଇଥିଲେ । ଏହାପରେ ଉଭୟ ମିହିର ଓ ସୌମ୍ୟା ମହେନ୍ଦ୍ର ସିଂ ଧୋନୀଙ୍କ ନାଁରେ କେସ୍ କରିଥିଲେ । ଏହି ମାମଲାର ଶୁଣାଣି କରି ଝାଡ଼ଖଣ୍ଡ ନାୟିକ ଅଦାଲତ ଉଭୟ ମିହିର ଦିବାକର ଏବଂ ସୌମ୍ୟା ଦାସଙ୍କୁ ସଠିକ୍ ତଥ୍ୟ ଏବଂ ପ୍ରମାଣ ଦେବାକୁ କହିଥିଲେ । ହେଲେ ମିହିର ଓ ସୌମ୍ୟା କିଛି ଦିନର ନିରବତା ପରେ ଝାଡ଼ଖଣ୍ଡ ହାଇକୋର୍ଟରେ ଧୋନୀଙ୍କ ନାଁରେ ଆଉ ଏକ ମାମଲା କରିଛନ୍ତି ଯାହାଦ୍ୱାରା କୋର୍ଟ ଧୋନୀଙ୍କୁ ପୂରା ଘଟଣାର ସତ ଏବଂ ତାଙ୍କ ପକ୍ଷ ରଖିବାକୁ ନୋଟିସ୍ ଜାରି କରିଛନ୍ତି ।

ତେବେ ଏନେଇ ମହେନ୍ଦ୍ର ସିଂ ଧୋନୀ ଗଣମାଧ୍ୟମ ଆଗରେ ମୁହଁ ଖୋଲିନାହାନ୍ତି । ଝାଡ଼ଖଣ୍ଡ ହାଇକୋର୍ଟରେ ହାଜର ହୋଇ ଧୋନୀ ନିଜର ପକ୍ଷ କିଭଳି ରଖିବେ ଏବଂ ଏଭଳି ମାମଲାରେ ଛନ୍ଦି ହୋଇଥିବା ଏହି କିମ୍ବନ୍ଦନ୍ତୀ ଖେଳାଳି କେମିତି ମୁକୁଳିବେ ତାହା ଦେଖିବାକୁ ବାକି ରହିଲା ।