ନୀଳାଚଳଧାମର ନିର୍ମାଲ୍ୟ ବିକାଳୀ ନୀଳ ମାଉସୀ । ଦି’ଓଳି ଖାଇବାକୁ ଜଗା ଦୁଆରେ ବସୁଛନ୍ତି, ଭିକ ନମାଗି ନିର୍ମାଲ୍ୟ ବିକି ପେଟ ପୋଷୁଛନ୍ତି ।

କନକ ବ୍ୟୁରୋ: ମୁଣ୍ଡ ଉପର ଛାଇ ପାଇଁ କାନ୍ଧରେ ଭଙ୍ଗା ଛତାଟିଏ, ପାଦରେ ହଳେ ଛିଡିଯାଇଥିବା ପ୍ଲାଷ୍ଟିକ୍ ଚପଲ । ବୟସ ଶହେ ଛୁଇଁଲାଣି, ଦେହର ଚମ ଧୁଡୁଧୁଡୁ ବି ହୋଇଗଲାଣି । ଶେଷ ନିଶ୍ୱାସ ନେଉଥିବା ବୟସରେ ବିଶ୍ୱାସର ବଡ଼ଦାଣ୍ଡରେ ବସି ଭୋକ ପାଇଁ ଚାଲିଛି ନାଟ । ଛଳଛଳ ଆଖିରେ ନୀଳକନ୍ଦରକୁ ଚାହୁଁଛନ୍ତି, ପୁଣି ଘଡ଼ିଏ ଅଟକି ଭୋକ ମାରିବାକୁ ଭକ୍ତଙ୍କ ଭିଡ଼ ଭିତରକୁ ଭରସା କରୁଛନ୍ତି । ଭଲା ଏ ବୟସରେ ନିର୍ମାଲ୍ୟ ଖାଇବା ଲୋକଟି ଯେତେବେଳେ ନିର୍ମାଲ୍ୟ ବିକି ଜିଇଁବାକୁ ଜଗା ଦୁଆରେ ସଂଘର୍ଷ କରୁଛି, ତା’ଠୁ ବଡ଼ ବିଚିତ୍ର ଲୀଳା ଅବା କ’ଣ ହୋଇପାରେ । ଭାଗ୍ୟକୁ ଆଦରୀ ଜନ୍ମକଲା ପିଲାଙ୍କୁ ଭଗାରୀ କହି ଭାବବିନୋଦିଆ ଶରଣରେ ପଡ଼ି ରହିଛି ଶତାୟୁ ନୀଳ ମାଉସୀ । 

ଖୋର୍ଦ୍ଧା ଭୁଷୁଣ୍ଡପୁରର ନୀଳ ମାଉସୀ । ୭ ବର୍ଷ ପୂର୍ବେ ସ୍ୱାମୀ ଆଖିବୁଜିଦେଲା ପରେ ନୀଳ ମାଉସୀଙ୍କ ଜୀବନରେ ଦୁଃଖ ଯେମିତି ଜୁଆର ଭଳି ମାଡ଼ି ଆସିଛି । ଝିଅକୁ ବାହାଦେଲା ପରେ ଜନ୍ମକଲା ପୁଅ ବାହାସାହା ହୋଇ ଶ୍ୱଶୁର ଘରେ ରହୁଛି, ଆଉ ସେବେଠୁ ନୀଳ ମାଉସୀ ସାଜିଛନ୍ତି ନିଳାଚଳଧାମର ନିର୍ମାଲ୍ୟ ବିକାଳୀ । କେବେ ୧୦୦ ତ କେବେ ୧୫୦ ଆଉ କେବେ ଆଦୌ ବିକ୍ରୀ ହୁଏନି ନିର୍ମାଲ୍ୟ, ପେଟର ଭୋକକୁ ମାରି କାଳିଆକୁ କଷ୍ଟର କାହାଣୀ କହି ସେଇଠି ପଡ଼ି ରୁହନ୍ତି ଏ ଶତାୟୁ ବୃଦ୍ଧା ଜଣକ । 
ମାଉସୀଙ୍କୁ ସିଂହଦ୍ୱାର ସମ୍ମୁଖରେ ଯିଏ ଦେଖନ୍ତି ତାଙ୍କ ଅସହାୟତାକୁ ଆହାଃ ପଦେ କହି ଚାଲିଯାଆନ୍ତି । ହଁ କିଏ ବା କାହିଁକି ତାଙ୍କ ଅନ୍ତରଆତ୍ମାକୁ ପଢ଼ିବ? ହେଲେ କନକ ନ୍ୟୁଜର ପୁରୀ ପ୍ରତିନିଧି ସୀମାଞ୍ଚଳ ପାଢ଼ୀ, ମାଉସୀଙ୍କ ଦୁଃଖଭରା କାହାଣୀକୁ ଦେଖିଲା ପରେ ଲୋକଲୋଚନକୁ ଆଣିବାକୁ ପ୍ରୟାସ କରିଛନ୍ତି । ଆଉ ନୀଳ ମାଉସୀଙ୍କ ଏଭଳି ସଂଘର୍ଷଭରା ଜୀବନ କାହାଣୀକୁ ଯିଏ ବି ଶୁଣୁଛନ୍ତି ଘଡ଼ିଏ ଅଟକି ଯାଉଛନ୍ତି, ଦୁଇ ମୁଠା ନିର୍ମାଲ୍ୟ କିଣୁଛନ୍ତି ।