ୱେଷ୍ଟଇଣ୍ଡିଜକୁ ୯ ୱିକେଟରେ ହରାଇଲା ଦକ୍ଷିଣ ଆଫ୍ରିକା, ଟିମ୍‌ ଇଣ୍ଡିଆକୁ ଆଶ୍ୱସ୍ତି

କନକ ବ୍ୟୁରୋ:  ଟି-ଟ୍ୱେଣ୍ଟି ବିଶ୍ୱକପ ସୁପର-୮ ପର୍ଯ୍ୟାୟରେ ଦକ୍ଷିଣ ଆଫ୍ରିକା ଦଳ ୱେଷ୍ଟଇଣ୍ଡିଜକୁ ୯ ୱିକେଟର ଏକ ବଡ଼ ବ୍ୟବଧାନରେ ପରାସ୍ତ କରିଛି । ଏହି ଗୁରୁତ୍ୱପୂର୍ଣ୍ଣ ବିଜୟ ସହ ଦକ୍ଷିଣ ଆଫ୍ରିକା ସେମିଫାଇନାଲରେ ନିଜର ସ୍ଥାନ ପ୍ରାୟତଃ ପକ୍କା କରିସାରିଛି । ଆଫ୍ରିକାର ଏହି ସଫଳତା ଭାରତୀୟ ଦଳ ପାଇଁ ମଧ୍ୟ ଲାଭଦାୟକ ସାବ୍ୟସ୍ତ ହୋଇଛି । ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚରେ ୱେଷ୍ଟଇଣ୍ଡିଜ ପ୍ରଥମେ ବ୍ୟାଟିଂ କରି ୮୩ ରନ୍ ସ୍କୋର ସୁଦ୍ଧା ୭ଟି ୱିକେଟ୍ ହରାଇ ବିପର୍ଯ୍ୟୟର ସମ୍ମୁଖୀନ ହୋଇଥିଲା । କିନ୍ତୁ ଜେସନ୍ ହୋଲ୍ଡରଙ୍କ ୪୯ ରନ୍ ଏବଂ ରୋମାରିଓ ଶେଫର୍ଡଙ୍କ ୫୨ ରନ୍‌ର ଲଢୁଆ ଇନିଂସ ବଳରେ ଦଳ ୧୭୬ ରନ୍ ସଂଗ୍ରହ କରିବାରେ ସଫଳ ହୋଇଥିଲା ।

ଏହା ବି ପଢ଼ନ୍ତୁ: କାକର ସମସ୍ୟା ଦୂର କରିବାକୁ ଚିପକ୍‌ରେ ଛିଞ୍ଚା ହେଲା ସ୍ବତନ୍ତ୍ର ରାସାୟନିକ ଦ୍ରବଣ

୧୭୭ ରନ୍‌ର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଦକ୍ଷିଣ ଆଫ୍ରିକାକୁ କ୍ୱିଣ୍ଟନ୍ ଡିକକ୍ ଏବଂ ଏଡନ ମାର୍କରାମ ଏକ ଦମଦାର ଆରମ୍ଭ ଦେଇଥିଲେ । ଉଭୟ ମାତ୍ର ୮ ଓଭରରେ ୯୫ ରନ୍ ଯୋଡ଼ି ୱେଷ୍ଟଇଣ୍ଡିଜର ବୋଲିଂ ଲାଇନଅପ୍‌କୁ ଧ୍ୱସ୍ତ କରିଦେଇଥିଲେ । ଡିକକ୍ ୨୪ଟି ବଲ୍‌ରୁ ୪୭ ରନ୍ କରି ଆଉଟ୍ ହୋଇଥିବା ବେଳେ ଅଧିନାୟକ ମାର୍କ୍ରମ ୮୨ ରନ୍‌ର ଏକ ଐତିହାସିକ ଇନିଂସ ଖେଳି ଅପରାଜିତ ରହିଥିଲେ । ନିଜର ଏହି ଧୂଆଁଧାର ପାଳିରେ ସେ ୭ଟି ଚୌକା ଏବଂ ୪ଟି ଛକା ମାରି ଦଳକୁ ବିଜୟ ଦ୍ୱାରଦେଶରେ ପହଞ୍ଚାଇଥିଲେ । ତାଙ୍କ ବ୍ୟତୀତ ରାୟନ୍ ରିକଲଟନ୍ ମଧ୍ୟ ୪୫ ରନ୍ କରି ଅପରାଜିତ ଫେରିଥିଲେ ।

ବ୍ୟାଟିଂ ପୂର୍ବରୁ ଦକ୍ଷିଣ ଆଫ୍ରିକାର ବୋଲରମାନେ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ । ଲୁଙ୍ଗି ଏନଗିଡି ମାତ୍ରାଧିକ ଆକ୍ରମଣାତ୍ମକ ବୋଲିଂ କରି ୩ଟି ୱିକେଟ୍ ଅକ୍ତିଆର କରି କ୍ୟାରେବିଆନ୍ ବ୍ୟାଟିଂର ମେରୁଦଣ୍ଡ ଭାଙ୍ଗି ଦେଇଥିଲେ । ତାଙ୍କୁ ସାଥ୍ ଦେଇ କାଗିସୋ ରବାଡା ଏବଂ କର୍ବିନ୍ ବଶ୍ ମଧ୍ୟ ଦୁଇଟି ଲେଖାଏଁ ୱିକେଟ୍ ଚଟକାଇଥିଲେ । ଆଜି ସନ୍ଧ୍ୟାରେ ଯଦି ଭାରତ ଜିମ୍ବାୱେକୁ ପରାସ୍ତ କରିଦିଏ, ତେବେ ଦକ୍ଷିଣ ଆଫ୍ରିକା ସମ୍ପୂର୍ଣ୍ଣ ଭାବେ ସେମିଫାଇନାଲରେ ପହଞ୍ଚିଯିବ, ଏବେ ସମସ୍ତଙ୍କ ନଜର ଭାରତର ଏହି ମ୍ୟାଚ୍ ଉପରେ ରହିଛି ।

ଦକ୍ଷିଣ ଆଫ୍ରିକାର ଏହି ୯ ୱିକେଟ୍ ବିଜୟ ଭାରତୀୟ ଦଳ ପାଇଁ ଆଶ୍ୱସ୍ତିର ଖବର ଆଣିଛି । ଏହି ଫଳାଫଳ ପରେ ଭାରତ ପାଇଁ ସେମିଫାଇନାଲ ରାସ୍ତା ବହୁତ ସହଜ ହୋଇଯାଇଛି । ବର୍ତ୍ତମାନର ସମୀକରଣ ଅନୁଯାୟୀ, ଭାରତକୁ ସେମିଫାଇନାଲ ଟିକେଟ୍ ହାସଲ କରିବା ପାଇଁ କେବଳ ନିଜର ପରବର୍ତ୍ତୀ ଦୁଇଟି ମ୍ୟାଚ୍ ଜିତିବାକୁ ପଡ଼ିବ । ମାର୍କରାମଙ୍କ ଏହି ବିସ୍ଫୋରକ ବ୍ୟାଟିଂ କେବଳ ଆଫ୍ରିକା ନୁହେଁ ବରଂ ଭାରତୀୟ ପ୍ରଶଂସକଙ୍କ ମନରେ ମଧ୍ୟ ଖୁସି ଭରିଦେଇଛି ।