କନକ ବ୍ୟୁରୋ : ସଲମାନ ଖାନଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି ସୋମୀ ଅଲି। କହିଛନ୍ତି, ସଲମାନ ଖାନ୍‌ ତାଙ୍କୁ ନିର୍ୟାତନା ଦେଉଥିଲେ। ଏକ ସାକ୍ଷାତକାରରେ ସଲମାନ ଖାନଙ୍କ ସହ ତାଙ୍କର ପୂର୍ବ ସମ୍ପର୍କ ନେଇ ମୁହଁ ଖୋଲିଛନ୍ତି । ୧୯୯୦ ଦଶକରେ ସଲମାନ୍‌ ଖାନ୍‌ ବାରମ୍ବାର ତାଙ୍କୁ ଶାରୀରିକ ଏବଂ ମାନସିକ ନିର୍ୟାତନା ଦେବାରୁ ସେ ଫିଲ୍ମ ଇଣ୍ଡଷ୍ଟ୍ରି ଛାଡ଼ିବା ପାଇଁ ବାଧ୍ୟ ହୋଇଥିବା କହିଛନ୍ତି । ସୋମୀ କହିଛନ୍ତି, ପ୍ରତିଦିନ ତାଙ୍କୁ ଶାରୀରିକ ଏବଂ ମାନସିକ ନିର୍ୟାତନା ଦିଆଗଲା । ତାଙ୍କୁ ବଲିଉଡରୁ ଅଫର ମିଳିଥିଲା। କିନ୍ତୁ ସଲମାନ୍‌ ତାଙ୍କୁ ଫେରିବା ପାଇଁ ଦେଇନଥିଲେ । କାଳେ ସେ ସଲମାନଙ୍କ ଅସଲ ଚରିତ୍ରକୁ ପଦାରେ ପକାଇଦେବେ ସେହି ଭୟରେ ସେ ତାଙ୍କୁ ସୁଯୋଗ ଦେଇନଥିବା ସୋମୀ ଅଭିଯୋଗ କରିଛନ୍ତି । ଏହା ସହ ଆଉ ଏକ ବଡ଼ ଅଭିଯୋଗ ଆଣିଛନ୍ତି ସୋମୀ । ସୁଶାନ୍ତ ସିଂହ ରାଜପୁତ ଆତ୍ମହତ୍ୟା କରିନାହାନ୍ତି ବରଂ ତାଙ୍କୁ ହତ୍ୟା କରାଯାଇଛି। ସଲମାନଙ୍କୁ ବିଷ୍ଣୋ‌ଇ ସମ୍ପ୍ରଦାୟରୁ ହତ୍ୟା ଧମକ ମିଳିବା ସଂକ୍ରାନ୍ତରେ ସେ କହିଛନ୍ତି, ସଲମାନ ହୁଅନ୍ତୁ କି କୌଣସି ଅଚିହ୍ନା ବ୍ୟକ୍ତି ହୁଅନ୍ତୁ ସେ ମୃତ୍ୟୁଦଣ୍ଡ ଏବଂ ହତ୍ୟାକୁ ବିରୋଧ କରନ୍ତି। ବିଷ୍ଣୋଇକୁ ସେ ବଲିଉଡର ଦାଉଦ୍‌ ଏବଂ ଛୋଟା ସକିଲ୍‌ ବୋଲି କହିଛନ୍ତି ।