ପୁଣି ପଦାରେ ପଡ଼ିଲା ବିଜେଡି କଳି; ବୈଠକରେ ଯୋଗ ନଦେଇ ଅଲଗା ମେଳିକୁ ନେଇ ବଢିଲା ଚର୍ଚ୍ଚା

କନକ ବ୍ୟୁରୋ : ବିଜେଡି କର୍ପୋରେଟର ମେଳି । ଗତକାଲି ବିଏମ୍‌ସି କର୍ପୋରେଟର ବୈଠକରେ ଅନୁପସ୍ଥିତ ଥିବା ବିଜେଡିର ୨୭ କର୍ପୋରେଟର ଅଲଗା ମେଳି କରିଥିବା ଜଣାପଡିଛି । ବିଜେଡି ବିଧାୟକଙ୍କ ସମର୍ଥକମାନେ ଏକାଠି ମେଳି ହୋଥିବାର ଏକ ଦୃଶ୍ୟ ସାମ୍ନାକୁ ଆସିଛି । କର୍ପୋରେସନ୍‌ ବୈଠକରେ ନ ଆସି ଅଲଗା ବୈଠକ କରିବା ବିଜେଡି କଳିକୁ ପଦାରେ ପକାଇଛି ।

ବିଏମସି କର୍ପୋରେଟର ବୈଠକରେ ବିଜେଡି କର୍ପୋରେଟର ଅନୁପସ୍ଥିତ ଘଟଣା ଯେତିକି ଚର୍ଚ୍ଚାର ବିଷୟ ଥିଲା, ତାଠୁ ଅଧିକ ରୋଚକ ଥିଲା ବୈଠକକୁ ନଆସି ଅଲଗା ସ୍ଥାନରେ ବୈଠକ କରିବା । ଗତକାଲି ବିଏମସି କାର୍ଯ୍ୟାଳୟ ପରିସରରେ ଅନୁଷ୍ଠିତ ହୋଇଥିଲା କର୍ପୋରେଟର ବୈଠକ । ଏଥିରେ ଅନେକ ବିଜେଡି କର୍ପୋରେଟର ଯୋଗ ଦେଇ ନଥିଲେ । ବିଶେଷ କରି ଭୁବନେଶ୍ୱର-ମଧ୍ୟ ନିର୍ବାଚନମଣ୍ଡଳୀର ଅଧିକାଂଶ କର୍ପୋରେଟର ବୈଠକରେ ଅନୁପସ୍ଥିତ ଥିଲେ ।

ବୈଠକରେ ୬୭ ଜଣ କର୍ପୋରେଟରଙ୍କ ମଧ୍ୟରୁ ପ୍ରାୟ ୨୭ ଜଣ କର୍ପୋରେଟର ଯୋଗ ଦେଇନଥିଲେ । ଉତ୍ତର ନିର୍ବାଚନମଣ୍ଡଳୀର କିଛି କର୍ପୋରେଟର ଉପସ୍ଥିତ ଥିବା ବେଳେ ଏକାମ୍ର ଓ ମଧ୍ୟ ନିର୍ବାଚନମଣ୍ଡଳୀରୁ କିଛି କର୍ପୋରେଟର ଉପସ୍ଥିତ ନଥିଲେ। ଭୁବନେଶ୍ୱର-ମଧ୍ୟ ନିର୍ବାଚନମଣ୍ଡଳୀର କର୍ପୋରେଟର ଅମରେଶ ଜେନା ଓ ଏକାମ୍ରର କର୍ପୋରେଟର ବିରଞ୍ଚି ନାରାୟଣ ମହାସୁପକାରଙ୍କୁ ବିଜେଡିର ଏକ ନିର୍ଦ୍ଦିଷ୍ଟ ଗୋଷ୍ଠୀକୁ ବିରୋଧ କରିଆସୁଥିବା ଚର୍ଚ୍ଚା ହେଉଛି । ଆଉ ସେହିମାନେ ବୈଠକକୁ ବିରୋଧ କରି ଅଲଗା ମେଳି କରିବା ପୁଣିଥରେ ବିଜେଡି କଳିକୁ ପଦାରେ ପକାଇଛି ।