କନକବ୍ୟୁରୋ : କୋରାପୁଟ ଜିଲ୍ଲା ଜୟପୁର ସହରରେ ବନ୍ଦ ହେବ ଟାଟା କମ୍ପାନିର ସ୍ମାର୍ଟ ମିଟର  । ପୌର ବୈଠକରେ ହେଲା ନିଷ୍ପତ୍ତି । ସବୁ ଦଳର କାଉନସିଲର ଏନେଇ ମତ ଦେଇଛନ୍ତି  ।  ସ୍ମାର୍ଟ ମିଟରକୁ ନେଇ ଚିନ୍ତାରେ କୋରାପୁଟ ଜିଲ୍ଲା ଜୟପୁର ବାସିନ୍ଦା  ।  ଯେତିକି ବିଦ୍ୟୁତ୍‌ ବ୍ୟବହାର ହେଉନି, ତାଠାରୁ ଢେର ଅଧିକ  ବିଲ୍ ଆସୁଛି । ସାଧାରଣ ଲୋକ ଠକେଇର ଶିକାର ହେଉଥିବା ଅଭିଯୋଗ ଆସୁଛି  ।    ୪ ମାସ ପରେ ଜୟପୁର ପୌରପାଳିକାରେ ବସିଥିଲା ବୈଠକ । ବିଜୁଳି ବିଲ୍‌କୁ ନେଇ ଆଲୋଚନା ସମୟରେ ସ୍ମାର୍ଟ ମିଟର ଲଗାଇବାକୁ ନିଆଯାଇଛି ନିଷ୍ପତ୍ତି । ଯେଉଁଠି ମିଟର ଲାଗିଛି ତାକୁ ବାହାର କରିବାକୁ କମ୍ପାନିକୁ ତାଗିଦ କରାଯାଇଛି  ।   ପ୍ରଥମେ ବଡ଼ ବଡ଼ ସହରରେ ଟାଟା କମ୍ପାନି ଏହି ମିଟର ଲଗାଉ ତା'ପରେ ଜୟପୁର କଥା ଚିନ୍ତା କରାଯିବ ।
ବିଧାନସଭାରେ ଅନେକ ଥର ସ୍ମାର୍ଟ ମିଟରକୁ ନେଇ ଚର୍ଚ୍ଚା ହୋଇଛି । ତଥାପି ମନମାନି କରୁଛି କମ୍ପାନି । ଏମିତି ଯୋଜନା ଆଣୁଛ କାହିଁକି ? ବୋଲି ପ୍ରଶ୍ନ କରିଛନ୍ତି ଜୟପୁର ବିଧାୟକ । ସେପଟେ ଟାଟା ପାୱାର୍‌ ଅଧିକାରୀ ଅଭିଯୋଗ ସ୍ୱୀକାର କରିବା ସହ ପୌରପାଳିକା ନିଷ୍ପତ୍ତି ସଂପର୍କରେ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇବେ ବୋଲି କହିଛନ୍ତି  ।  ପୌର ପାଳିକା ବୈଠକରେ ହୋଇଥିବା ଏହି ନିଷ୍ପତ୍ତିକୁ ନଶୁଣିଲେ କମ୍ପାନି ବିରୋଧରେ କାର୍ଯ୍ୟାନୁଷ୍ଠାନ ଚେତାବନୀ ଦିଆଯାଇଛି ।