ରୋଜଗାର ଦେଇଛି ଚିଙ୍ଗୁଡ଼ି ଚାଷ : ମାଛ ଭଳି ଚିଙ୍ଗୁଡ଼ି ବି ଏକ ଲାଭଜନକ ବ୍ୟବସାୟ

କନକବ୍ୟୁରୋ : ମାଛ ଭଳି ଚିଙ୍ଗୁଡ଼ି ବି ଏକ ଲାଭଜନକ ବ୍ୟବସାୟ । ରାଜ୍ୟ ତଥା ରାଜ୍ୟ ବାହାରେ ବି ରହିଛି ଓଡ଼ିଶା ଚିଙ୍ଗୁଡ଼ିର ଚାହିଦା ।  ବିଦେଶକୁ ବି ରପ୍ତାନୀ ହୁଏ ଓଡ଼ିଶାର ଚିଙ୍ଗୁଡ଼ି ।

ଲୋକଙ୍କ ଚାହିଦାକୁ ନଜରରେ ରଖି ପୁରୀ ଜିଲ୍ଲା ଅସ୍ତରଙ୍ଗ ଅଂଚଳର ଯୁବ ଚାଷୀ ମାନେ ଏହି ଚାଷ ଅପଣାଇଛନ୍ତି । ଅତ୍ୟାଧୁନିକ ପ୍ରଣାଳୀରେ ଚାଷ କରି ସେମାନଙ୍କ ଆର୍ଥିକ ସ୍ଥିତିରେ ଉନ୍ନତି ଆଣିପାରିଛନ୍ତି । ବ୍ୟାଙ୍କରୁ କିଛି ରୁଣ ନେଇ ନିଜ ଜମିରେ ପୋଖରୀ ଖୋଳିଛନ୍ତି ।

 ଭେନାମୀ ପ୍ରଜାତିର ଚିଙ୍ଗୁଡ଼ି ଚାଷ କରି ଲାଭବାନ ହେଉଛନ୍ତି । ଏହି ଚିଙ୍ଗୁଡ଼ି ବଢ଼ିବା ପାଇଁ ୯୦ ଦିନ ସମୟ ଲାଗିଥାଏ  ।  ବିଶେଷକରି କଣ୍ଟାଳ, ବାଗ୍‌ଦା, ଘୋଡ଼ିଆ ଆଦି ଚିଙ୍ଗୁଡ଼ି ନଦୀ, ନାଳ ଓ ସମୁଦ୍ରରେ ବଢ଼ିଥାନ୍ତି । 

ଅସ୍ତରଙ୍ଗ ବ୍ଲକରେ ପ୍ରାୟ ୨,୦୦୦ ପୋଖରୀରେ ଚିଙ୍ଗୁଡ଼ି ଚାଷ ହେଉଛି । ପାଖାପାଖି ୨୦୦ ଚାଷୀ ଚିଙ୍ଗୁଡ଼ି ଚାଷ କରୁଛନ୍ତି । ପୂର୍ବରୁ ପାରମ୍ପରିକ ଭାବେ ନଦୀରୁ ଯାଆଁଳ ସଂଗ୍ରହ କରି ଚାଷ ହେଉଥିଲା । ଏହା ଦ୍ବାରା ଚାଷୀଙ୍କୁ କ୍ଷତି ସହିବାକୁ ପଡ଼ୁଥିଲା। ମାଛ ଜାଆଁଳ ଗବେଷଣା କେନ୍ଦ୍ର ପକ୍ଷରୁ ଭେନାମୀ ଚିଙ୍ଗୁଡ଼ି ଚାଷ ପାଇଁ ପରାମର୍ଶ ପରେ ଚାଷୀ ଲାଭବାନ ହେଉଛନ୍ତି । 

ଭେନାମୀ ଚିଙ୍ଗୁଡ଼ି ବର୍ତ୍ତମାନର ଜଳବାୟୁ ସହ ଖାପଖୁଆଇ ବଢୁଛନ୍ତି । ଚାଷ ଭଲ ହେଉଥିବା ବେଳେ ଭଲ ରୋଜଗାର ବି ହେଉଛି । 

ସାରା ରାଜ୍ୟରେ ଅଧିକାଂଶ ଚାଷୀ ଏହି ଚିଙ୍ଗୁଡ଼ି ଚାଷ କରୁଛନ୍ତି । ଅନେକ ଯୁବକ ଚାକିରି ପଛରେ ନଦୌଡି ଛୋଟଛୋଟ ପୋଖରୀ ଖୋଳି ଏହି ଚାଷ କରି ନିଜେ ରୋଜଗାରକ୍ଷମ ହୋଇପାରୁଛନ୍ତି । 

ବଡ଼ ବଡ଼ ହୋଟେଲ ଓ ରେଷ୍ଟୁରାଂଟ ଠାରୁ ଆରମ୍ଭ କରି ଭୋଜିଭାତରେ ଚିଙ୍ଗୁଡ଼ିର ମେନ୍ୟୁ ଥାଏ । ଘରେ ଘରେ ଚିଙ୍ଗୁଡ଼ି ତରକାରୀ ହେଉ ଅବା ଚିଙ୍ଗୁଡ଼ି ଭଜା କିମ୍ବା ଚିଙ୍ଗୁଡ଼ି ଘାଂଟ ଭାରି ସ୍ବାଦିଷ୍ଟ ।  ସମସ୍ତେ ଏହାକୁ ଖାଇବାକୁ ପସନ୍ଦ କରୁଥିବା ବେଳେ ଅସ୍ତରଙ୍ଗ ଅଂଚଳର ଚାଷୀ ଏହି ଚାଷ କରି ଲାଭବାନ ହେଉଛନ୍ତି  ।