ଡାଇବେଟିସ୍‌ ରୋଗୀ ସାବଧାନ !

କନକ ବ୍ୟୁରୋ: ମଧୁମେହ ଓ ଉଚ୍ଚ ରକ୍ତଚାପ ରୋଗୀଙ୍କୁ ଭାରତର ଗ୍ରାମାଞ୍ଚଳ ଡାକ୍ତରଖାନାରେ ମିଳୁନି ଚିକିତ୍ସା ସୁବିଧା । ଔଷଧ ଅଭାବ ରୋଗୀଙ୍କୁ ନାକେଦମ କରୁଛି । ବର୍ଷକର ୧୨ ମାସରୁ ୭ ମାସ ମିଳୁନି ଔଷଧ । ସର୍ଭେ ରିପୋର୍ଟରେ ଏଭଳି ସ୍ଥିତି ସାମ୍ନାକୁ ଆସିବା ପରେ ରୋଗୀଙ୍କ ଟେନସନ ଆହୁରି ବଢିଛି ।

Advertisment

ଗାଁ ଡାକ୍ତରଖାନା ଏବେ ରୋଗିଣା !
ଦେଶରେ ମଧୁମେହ ଓ ଉଚ୍ଚ ରକ୍ତଚାପ ରୋଗୀଙ୍କ ସଂଖ୍ୟା ହୁ ହୁ ହୋଇ ବଢୁଛି । ମଧୁମେହ ରୋଗୀଙ୍କ ତାଲିକାରେ ଭାରତ ଏବେ ଦ୍ବିତୀୟ । ଏଭଳି ସାଂଘାତିକ ସ୍ଥିତି ଭିତରେ ଗ୍ରାମୀଣ ଅଞ୍ଚଳରେ ଚିକିତ୍ସା ଅଭାବର ବିକଳ ଚିତ୍ର ସାମ୍ନାକୁ ଆସିଛି । ନା ଅଛି ଔଷଧ ନା ମିଳୁଛି ଚିକିତ୍ସା ସୁବିଧା । ଗ୍ରାମୀଣ ଅଞ୍ଚଳରେ ମଧୁମେହ ଓ ଉଚ୍ଚ ରକ୍ତଚାପ ରୋଗୀ ହସ୍ପିଟାଲକୁ ଯାଇ ଦହଗଞ୍ଜ ହେଉଛନ୍ତି । ଭାରତର ୪୦ ପ୍ରତିଶତ ସିଏଚ୍‌ସି ଏବଂ ୩୯ ପ୍ରତିଶତ ସ୍ବାସ୍ଥ୍ୟ ଉପକେନ୍ଦ୍ରରେ ଏହି ରୋଗର ସେବା ମିଳିବା ସମ୍ଭବପର ହେଉନାହିଁ । ଆଇସିଏମଆର, ବିଶ୍ବ ସ୍ବାସ୍ଥ୍ୟ ସଙ୍ଗଠନ ପକ୍ଷରୁ ୭ଟି ରାଜ୍ୟରେ ସର୍ଭେ କରାଯାଇଥିଲା । ଓଡ଼ିଶାର ପୁରୀ, ନୟାଗଡ, ଗଞ୍ଜାମ, ମୟୂରଭଞ୍ଜରେ ହୋଇଥିବା ସର୍ଭେରେ ସ୍ବାସ୍ଥ୍ୟସେବାର ଅସଲ ଚିତ୍ରକୁ ସାମ୍ନାକୁ ଆଣିଛି ।

ରୋଗୀ ସାବଧାନ… !

ମଧୁମେହ ଓ ଉଚ୍ଚ ରକ୍ତଚାପ ପରିଚାଳନା ପାଇଁ ଅତ୍ୟାବଶ୍ୟକ ଔଷଧର ଅଭାବ
ବାର୍ଷିକ ଆସୁଥିବା ଔଷଧ ୩ରୁ ୪ ମାସ ଭିତରେ ଶେଷ ହେଉଛି
ବଳକା ୭ରୁ ୮ ମାସ ହସ୍ପିଟାଲର ଔଷଧ ଆଲମିରା ଖାଲି ପଡୁଛି
ଚିକିତ୍ସା ପାଇଁ ଆବଶ୍ୟକୀୟ ଡାକ୍ତର ଉପଲବ୍ଧ ନାହାନ୍ତି
ରୋଗର ଚିକିତ୍ସା ପାଇଁ ସରଞ୍ଜାମର ଘୋର ଅଭାବ

ଭାରତରେ ଏବେ ୩୧୫ ନିୟୁତ ଉଚ୍ଚ ରକ୍ତଚାପ ରୋଗୀ ଥିବା ବେଳେ ୧୦୧ ନିୟୁତରୁ ଊର୍ଦ୍ଧ୍ୱ ମଧୁମେହ ରୋଗୀ ଅଛନ୍ତି । ଦେଶରେ ୪ ପ୍ରତିଶତରୁ ଅଧିକ ମୃତ୍ୟୁ ମଧୁମେହ ସହ ଜଡ଼ିତ ଥିବା ବେଳେ ୧୧ ପ୍ରତିଶତ ଅଧିକ ମୃତ୍ୟୁ ଉଚ୍ଚ ରକ୍ତଚାପ ସହ ଜଡ଼ିତ । ଏଭଳି ସଙ୍କଟଜନକ ସ୍ଥିତିରେ ଗ୍ରାମାଞ୍ଚଳ ହସ୍ପିଟାଲରେ ଔଷଧ ଷ୍ଟକ୍‌ ରହୁନି । ଫଳରେ ଘରୋଇ ଔଷଧ ଦୋକାନରୁ ମହଙ୍ଗା ଔଷଧ କିଣିବାକୁ ବାଧ୍ୟ ହୋଇଛନ୍ତି ରୋଗୀ । କିଛି ରୋଗୀ ମହଙ୍ଗା ଔଷଧ କିଣିନପାରି ଅଧାରୁ ଚିକିତ୍ସା ବନ୍ଦ କରୁଛନ୍ତି । ଯାହା ରୋଗୀଙ୍କ ପାଇଁ ଘାତକ ସାବ୍ୟସ୍ତ ହେଉଛି ।

ଏଭଳି ଉଦବେଗଜନକ ସ୍ଥିତିରେ ସୁଧାର ଆଣିବାକୁ ସର୍ଭେ ରିପୋର୍ଟ କେନ୍ଦ୍ର ସରକାରଙ୍କ ନିକଟରେ ଦାଖଲ କରାଯାଇଛି । ରାଜ୍ୟ ଓ ଜିଲ୍ଲାସ୍ତରରେ ଔଷଧ ବିତରଣରେ ପାରଦର୍ଶିତା ଏବଂ ଗ୍ରାମୀଣ ସ୍ବାସ୍ଥ୍ୟକେନ୍ଦ୍ରରେ ଔଷଧ ଅଭାବ ଦୂର କରିବାକୁ ଡିଜିଟାଲ ଟ୍ରାକିଂର ସୁପାରିଶ କରାଯାଇଛି। ସର୍ଭେ ସଂସ୍ଥା ଦେଇଥିବା ସୁପାରିଶ କାର୍ଯ୍ୟକାରୀ ନକଲେ ଆଗାମୀ ଦିନରେ ଡାଇବେଟିସ୍‌ ଆକ୍ରାନ୍ତରେ ନମ୍ବର ୱାନ୍ ସ୍ଥାନ ନେବ ଭାରତ ।