ବିହାରରେ ଲଜ୍ଜାଜନକ ଘଟଣା: ଚଳନ୍ତା ଆମ୍ୱୁଲାନ୍ସରେ ମହିଳାଙ୍କୁ ଦୁଷ୍କର୍ମ ଅଭିଯୋଗ

କନକ ବ୍ୟୁରୋ: ବିହାରର ଗୟା ଜିଲ୍ଲାରେ ଏକ ଅତ୍ୟନ୍ତ ଲଜ୍ଜାଜନକ ଘଟଣା ସାମ୍ନାକୁ ଆସିଛି । ଏଠାରେ ହୋମଗାର୍ଡ ନିଯୁକ୍ତି ଦୌଡ଼ ସମୟରେ ଜଣେ ମହିଳା ଚେତାଶୂନ୍ୟ ହୋଇ ପଡ଼ିଥିଲେ । ଏହାପରେ ତାଙ୍କୁ ଶୀଘ୍ର ହସ୍ପିଟାଲ ପଠାଇବା ପାଇଁ ଏକ ଆମ୍ବୁଲାନ୍ସ ଡକାଯାଇଥିଲା । ଆମ୍ବୁଲାନ୍ସ ଘଟଣାସ୍ଥଳେ ପହଞ୍ଚି ମହିଳାଙ୍କୁ ହସ୍ପିଟାଲ ନେଇଯାଇଥିଲା । ଏହି ସମୟରେ ଆମ୍ବୁଲାନ୍ସ ଡ୍ରାଇଭର ଏବଂ ଟେକ୍ନିସିଆନ୍ ରାସ୍ତାରେ ମହିଳାଙ୍କୁ ଦୁଷ୍କର୍ମ କରିଥିଲେ । ଏହି ଘଟଣା ଜଣାପଡ଼ିବା ପରେ ଉତ୍ତେଜନା ପ୍ରକାଶ ପାଇଥିଲା । ପୁଲିସ ଆମ୍ବୁଲାନ୍ସ ଡ୍ରାଇଭର ଏବଂ ଟେକ୍ନିସିଆନଙ୍କୁ ଗିରଫ କରିଛି ।

ଗୁରୁବାର ଦିନ ବୋଧଗୟା ଅଞ୍ଚଳର ବିଏମପି ୩ ପରେଡ୍ ଗ୍ରାଉଣ୍ଡରେ ହୋମଗାର୍ଡ ନିଯୁକ୍ତି ଚାଲିଛି । ଜଣେ ମହିଳା ଦୌଡ଼ରେ ଅଂଶଗ୍ରହଣ କରିବାକୁ ଆସିଥିଲେ । ଦୌଡ଼ ଚାଲିଥିବା ସମୟରେ ମହିଳା ପ୍ରାର୍ଥୀ ଚେତାଶୂନ୍ୟ ହୋଇ ପଡ଼ିଥିଲେ । ତାଙ୍କୁ ତୁରନ୍ତ ଆମ୍ବୁଲାନ୍ସ ମାଧ୍ୟମରେ ଚିକିତ୍ସା ପାଇଁ ହସ୍ପିଟାଲକୁ ନିଆଯାଇଥିଲା ।

ଶୁକ୍ରବାର ଦିନ, ଏସଏସପି ଆନନ୍ଦ କୁମାର ଏକ ପ୍ରେସ୍ ରିଲିଜ୍ ଜାରି କରି କହିଛନ୍ତି ଯେ ପୀଡ଼ିତା ଘଟଣା ବିଷୟରେ ସୂଚନା ଦେଇଛନ୍ତି । ସୂଚନା ପାଇବାର ୨ ଘଣ୍ଟା ମଧ୍ୟରେ ଆମ୍ବୁଲାନ୍ସ ଡ୍ରାଇଭର ବିନୟ କୁମାର ଏବଂ ଟେକ୍ନିସିଆନ୍ ଅଜିତ କୁମାରଙ୍କୁ ଗିରଫ କରାଯାଇଥିଲା । ପୀଡ଼ିତା ଡାକ୍ତରଙ୍କୁ କହିଥିଲେ ଯେ ହସ୍ପିଟାଲକୁ ନିଆଯାଉଥିବା ସମୟରେ ଚଳନ୍ତା ଆମ୍ବୁଲାନ୍ସରେ ଦୁଷ୍କର୍ମ ଘଟଣା ଘଟିଥିଲା ।

ଘଟଣାକୁ ଗମ୍ଭୀରତାର ସହ ନେଇ, ବୋଧଗୟା ଏସଡିପିଓ ସୌରଭ ଜୟସୱାଲଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଦଳ ଗଠନ କରାଯାଇଥିଲା । ପୁଲିସ ଦଳ ଚଢ଼ାଉ କରି ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିଥିଲା । ପ୍ରମାଣ ସଂଗ୍ରହ ପାଇଁ ଏଫଏସଏଲ ଦଳକୁ ମଧ୍ୟ ଘଟଣାସ୍ଥଳକୁ ପଠାଯାଇଛି ।

ଅପରାଧ ସ୍ଥାନରେ ଲାଗିଥିବା ସିସି କ୍ୟାମେରାର ଫୁଟେଜ୍ ମାଧ୍ୟମରେ ଉଭୟ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି । ଏହି ମାମଲାରେ ବୋଧଗୟା ପୁଲିସ ଷ୍ଟେସନରେ ଏକ ମାମଲା ରୁଜୁ କରାଯାଇଛି । ପରବର୍ତ୍ତୀ କାର୍ୟ୍ୟାନୁଷ୍ଠାନ ଗ୍ରହଣ କରାଯାଉଛି । ଏସଏସପି ଆନନ୍ଦ କୁମାର କହିଛନ୍ତି ଯେ ମାମଲାର ତଦନ୍ତ କରାଯିବ ଏବଂ ଯଥାଶୀଘ୍ର ଚାର୍ଜସିଟ୍ ଦାଖଲ କରାଯିବ ।