ଯୋଗୀଙ୍କୁ ଗୁହାରୀ କଲେ ଛାତ୍ରୀ: କହିଲେ ମୁଁ ପଢ଼ିବାକୁ ଚାହୁଛି

କନକ ବ୍ୟୁରୋ:  ମୁଁ ପଢିବାକୁ ଚାହୁଛି ହେଲେ ସ୍କୁଲ ଫି' ଦେବାକୁ ଟଙ୍କା ନାହିଁ ।  ମୁଖ୍ୟମନ୍ତ୍ରୀ ଯୋଗୀଙ୍କୁ ଏପରି ଅନୁରୋଧ କରି କହିଛନ୍ତି ଜଣେ ସପ୍ତମ ଶ୍ରେଣୀର ଛାତ୍ରୀ ।  ମୁଖ୍ୟମନ୍ତ୍ରୀଙ୍କୁ  ଗୁହାରୀ କରି  ଛାତ୍ରୀ ପଙ୍ଖୁଡୀ  ତ୍ରିପାଠୀ ପଢିବାକୁ ଇଛା  ଥିବା କହିଛନ୍ତି । ନିଜ ଦୁଃଖ ମଧ୍ୟ ଛାତ୍ରୀ ଜଣଙ୍କ ଯୋଗୀଙ୍କୁ ଜଣାଇଥିଲେ ଆଉ କହିଥିଲେ ବାପା ଦିବ୍ୟାଙ୍ଗ, ମା ପରିବାର ଭରଣପୋଷଣ କରିବା ପାଇଁ ଏକ ଦୋକାନରେ କାମ କରୁଛନ୍ତି ।  ବଡ଼ ଭାଇ  ଦ୍ବାଦଶରେ  ପାଠ ପଢୁଛି ।  ପରିବାରର ଦାରିଦ୍ର୍ୟତା କାରଣରୁ ମୋତେ ସ୍କୁଲ ପାଠ ଛାଡିବାକୁ  ପଡୁଛି  ।

ଛାତ୍ରୀଙ୍କ କଥା ଶୁଣି  ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଚିନ୍ତା କରନି । ସରକାର ତୁମ କଥା ଭାବିବେ, ତୁମ ପାଠପଢାରେ କିଛି ସମସ୍ୟା ସୃଷ୍ଟି ହେବ ନାହିଁ । ଏନେଇ ଛାତ୍ରୀଙ୍କୁ  ପ୍ରତିଶ୍ରୁତି ଦେଇଛନ୍ତି ଯୋଗୀ  । ଏଥିସହିତ ଯୋଗୀ ଛାତ୍ରୀ ଜଣଙ୍କ ସହିତ ସେଲ୍ଫି ମଧ୍ୟ ନେଇଥିଲେ । ଗୋରଖପୁରର ଜନତା ଦର୍ଶନ ସମୟରେ ମୁଖ୍ୟମନ୍ତ୍ରୀ ୧୦୦ରୁ ଅଧିକ ଲୋକଙ୍କ ସହ ସାକ୍ଷାତ କରିଛନ୍ତି । ସେମାନଙ୍କର ଅଭିଯୋଗ ମଧ୍ୟ ଶୁଣିଥିଲେ ଏବଂ ଅଧିକାରୀମାନଙ୍କୁ ସମସ୍ୟାର ସମାଧାନ ପାଇଁ  ତୁରନ୍ତ ନିର୍ଦ୍ଦେଶ ମଧ୍ୟ ଦେଇଥିଲେ ।