ବିଜେଡିରେ ଅଲୋଡା କି ବରିଷ୍ଠ? ଦଳୀୟ କାର୍ଯ୍ୟରେ କାହିଁକି ମିଳୁନି ଦେଖା?

କନକ ବ୍ୟୁରୋ: ବିଜେଡିରେ ଯେମିତି ଅଲୋଡ଼ା ହୋଇପଡିଛନ୍ତି ବରିଷ୍ଠ ନେତା। ଦଳୀୟ କାର୍ଯ୍ୟକ୍ରମରେ ଏମାନଙ୍କୁ ଦେଖିବାକୁ ମିଳୁନାହିଁ। ନିର୍ବାଚନ ପୂର୍ବରୁ ଯେଉଁମାନେ ନେତୃତ୍ୱ ନେଉଥିଲେ, ଏବେ ଦୁରେଇ ଯାଇଛନ୍ତି। ମନେ ହେଉଛି, ବରିଷ୍ଠ ଓ କନିଷ୍ଠଙ୍କ ମଧ୍ୟରେ ସମନ୍ୱୟ ରକ୍ଷା କରିବାରେ ଦଳ ଫେଲ୍ ମାରିଛି। ଆଉ ବିଜେଡି ସଙ୍ଗଠନ ପାଇଁ ବଡ଼ ବିପଦ ଘନେଇ ଆସୁଛି ।

• ବିଜେଡିରେ ଅଲୋଡା କି ବରିଷ୍ଠ?
• ଦଳୀୟ କାର୍ଯ୍ୟରେ କାହିଁକି ମିଳୁନି ଦେଖା? 

ରଣେନ୍ଦ୍ର ପ୍ରତାପ ସ୍ୱାଇଁ, ପ୍ରସନ୍ନ ଆଚାର୍ଯ୍ୟ, ଅମର ଶତପଥି, ଶଶୀ ବେହେରା । ଏକଦା ବିଜେଡି କହିଲେ ଏମାନଙ୍କ ନାଁ ଆଗରୁ ରହୁଥିଲା । ହେଲେ ପରାଜୟ ପରେ ସବୁ ଅଙ୍କ ବଦଳି ଯାଇଛି । କିଛି ନେତା ଜିତିବା ପରେ ମଧ୍ୟ ଦଳୀୟ କାର୍ଯ୍ୟକ୍ରମରେ ଦେଖା ମିଳୁ ନାହାନ୍ତି। ଆଉ କିଛି ପରାଜୟ କିମ୍ବା ଟିକେଟ ନ ପାଇବା ପରଠାରୁ ଦଳୀୟ କାର୍ଯ୍ୟକ୍ରମରୁ ଦୂରେଇ ରହୁଛନ୍ତି।

ରଣେନ୍ଦ୍ର ପ୍ରତାପ ସ୍ୱାଇଁ : ବିଜେଡିର ବରିଷ୍ଠ ତଥା ୮ ଥରର ବିଧାୟକ । ସବୁଠାରୁ ଅଭିଜ୍ଞ ଦଳର ଟାଣୁଆ ସଂଗଠକ । ହେଲେ ଚଳିତ ବିଧାନସଭାରେ ତାଙ୍କ ସ୍ବର ଶୁଭୁନଥିଲା। କୌଣସି ପ୍ରସଙ୍ଗରେ ସରକାରଙ୍କୁ ଘେରି ନଥିଲେ ରାଜା।  

ପ୍ରସନ୍ନ ଆଚାର୍ଯ୍ୟ : ତାଙ୍କୁ ଦଳ ଉପନେତା ପରି ଗୁରୁ ଦାୟିତ୍ୱ ଦେଇଛି । ହେଲେ ସେ ବିଧାନସଭାକୁ ନ ଆସିବା କିଛି ଭିନ୍ନ ଚର୍ଚ୍ଚାକୁ ଇଙ୍ଗିତ କରୁଛି ।

ଅମର ଶତପଥି: ଚଳିତ ନିର୍ବାଚନରେ ବିଜେଡି ତାଙ୍କୁ ଟିକେଟରୁ ବଞ୍ଚିତ କରିଥିଲା । ଲଗାତାର ୬ ଥରର ବିଧାୟକଙ୍କୁ ଟିକେଟରୁ ଦୁରେଇ ରଖିବା ସହ ଏବେ ଶଙ୍ଖ ଭବନ କିମ୍ବା ନବୀନ ନିବାସରେ ମଧ୍ୟ ଦେଖିବାକୁ ମିଳୁନାହିଁ ।

ଅମରଙ୍କ ପରି ବରିଷ୍ଠ ନେତା ଶଶୀ ବେହେରାଙ୍କର ମଧ୍ୟ ସମାନ ଅବସ୍ଥା । ହାରିଥିବା ନେତା ନୃସିଂହ ସାହୁ, ପ୍ରଫୁଲ ସାମଲ, ପ୍ରଫୁଲ ମଲ୍ଲିକଙ୍କୁ ମଧ୍ୟ ଦଳୀୟ କାର୍ଯ୍ୟକ୍ରମରେ ବିଶେଷ ଦେଖିବାକୁ ମିଳୁନାହିଁ । ତେବେ ବରିଷ୍ଠ ସାମ୍ବାଦିକ କହିଛନ୍ତି, ଦଳ ପରାଜୟ ପରେ ଦଳର ଆଭିମୁଖ୍ୟ ବଦଳୁଥିବା ବେଳେ ବରିଷ୍ଠ ନେତାଙ୍କୁ ଅଣଦେଖା କରିବା ଦଳକୁ ମହଙ୍ଗା ପଡିବ ।

ସୂଚନାଯୋଗ୍ୟ ଯେ, ନିର୍ବାଚନରେ ପରାଜୟ ପରେ ଅନୁମାନ କରାଯାଉଥିଲା ବିଜେଡି ଉଭୟ ବରିଷ୍ଠ ଓ ଯୁବ ନେତାଙ୍କ ସମନ୍ବୟରେ ଆଗକୁ ବଢ଼ିବ। କିନ୍ତୁ ନିର୍ବାଚନର ୩ ମାସ ପରେ ବି ସେମିତି କିଛି ହୋଇନାହିଁ। ଯାହାକୁ ନେଇ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି ।