ସବୁ ମନ୍ଦିରରେ ସୁରକ୍ଷା ଢିଲା, ମେଳା ମହୋତ୍ସବରେ ଜଗୁଛନ୍ତି ପୁଲିସ, .ଅନ୍ୟବେଳେ ଖୋଲାମେଲା

କନକ ବ୍ୟୁରୋ : ଅସୁରକ୍ଷିତ ଅବସ୍ଥାରେ ରାଜ୍ୟର ପ୍ରମୁଖ ଧର୍ମାନୁଷ୍ଠାନ । ନାଁକୁ ମାତ୍ର, ମେଳା ମହୋତ୍ସବରେ ପୁଲିସ କର୍ମଚାରୀ ନିୟୋଜିତ ହେଉଛନ୍ତି, ବର୍ଷ ତମାମ ରହୁନି କାହାରି ନିଘା। କେଉଁଠି ମନ୍ଦିର ଭିତରକୁ ଅବାଧ ଭାବେ ବିଦେଶୀ ପଶିଗଲେଣି ତ ଆଉ କେଉଁଠି ମନ୍ଦିରରୁ କଳାକନା ବୁଲାଇ ଦେଉଛନ୍ତି ଦୁର୍ବୃତ୍ତ। କଟକର ଅଧିଷ୍ଠାତ୍ରୀ ଦେବୀ ମା’ କଟକ ଚଣ୍ଡୀ, କେନ୍ଦ୍ରାପଡ଼ାର ଆରାଧ୍ୟ ବଳଦେବଜିଉ, ଜଗତସିଂହପୁରର ମା’ସାରଳା, ସମ୍ବଲପୁରର ମା’ ସମଲେଇ, ଘଟଗାଁ ତାରିଣୀ ପୀଠ, ଯାଜପୁରର ବିରଜା ମନ୍ଦିର ସୁରକ୍ଷାକୁ ନେଇ ଉଠିଛି ପ୍ରଶ୍ନ । ମନ୍ଦିରକୁ ସୁରକ୍ଷା ଦେବାକୁ ନାହିଁ କୌଣସି ବ୍ୟବସ୍ଥା। କେଉଁଠି ସିସିଟିଭି ଖରାପ ହୋଇପଡ଼ିଛି, ପୁଣି କେଉଁଠି ମନ୍ଦିର ନିକଟରେ ଫାଣ୍ଡି ଧର୍ମକୁ ଆଖିଠାର ସଦୃଶ ହୋଇଛି । 

ସହର ସାରା ସିସିଟିଭି, ସୁରକ୍ଷା ଦାୟିତ୍ବରେ ରକ୍ଷକ ଭଳି ଅତ୍ୟାଧୁନିକ ଜ୍ଞାନକୌଶଳରେ ସୁସଜ୍ଜିତ ସୁରକ୍ଷା ଗାଡ଼ି। ଏତେ ସବୁ ପରେ ବି ବାରମ୍ବାର ସାମ୍ନାକୁ ଆସୁଛି ଶ୍ରୀମନ୍ଦିର ସୁରକ୍ଷାରେ ଚରମ ଅବହେଳାର ଦୃଶ୍ୟ। ନିକଟରେ ମେଘନାଦ ପାଚେରୀ ଡେଇଁ ଶ୍ରୀମନ୍ଦିରରେ ପଶିଥିଲେ ୪ ଯୁବକ। ସେହିପରି ସ୍ପାଏ କ୍ୟାମେରା ନେଇ ଶ୍ରୀମନ୍ଦିରରେ ପ୍ରବେଶ ସମୟରେ ୩ଜଣ ସନ୍ଦିଗ୍ଧ ଧରାପଡ଼ିଛନ୍ତି। ପୁଣି କେତେବେଳେ ମନ୍ଦିର ଉପରେ ଡ୍ରୋନ ଉଡୁଛି ତ ଅନେକ ସମୟରେ ବିଦେଶୀ ପର୍ୟ୍ୟଟକ ଧରାପଡୁଛନ୍ତି। ଶ୍ରୀମନ୍ଦିର ସୁରକ୍ଷାରେ ଘଳିଆ, ଅନ୍ୟ ମନ୍ଦିରର ସୁରକ୍ଷା ନେଇ ପ୍ରଶ୍ନ ଚିହ୍ନ ଛିଡ଼ାହୋଇଛି।  

ରାଜ୍ୟରେ ଥିବା ମନ୍ଦିର ଗୁଡ଼ିକର ସୁରକ୍ଷା ପାଇଁ ସ୍ବତନ୍ତ୍ର ଆଇନ ଆଣିବାକୁ ଦାବି କରିଛନ୍ତି ବୁଦ୍ଧିଜୀବୀ ।