Jagannath Temple : ଶ୍ରୀମନ୍ଦିରକୁ ଗଳା ବାଟ ? ସୁରକ୍ଷାକୁ ନେଇ ଉଠିଲା ପ୍ରଶ୍ନ

କନକ ବ୍ୟୁରୋ: ନୀଳାଦ୍ରି ବିଜେ ପରେ ଆଜିଠାରୁ ରତ୍ନବେଦୀରେ ଦର୍ଶନ ଦେଉଛନ୍ତି ମହାପ୍ରଭୁ । ହେଲେ ଶ୍ରୀମନ୍ଦିରରେ ସୁରକ୍ଷା ବ୍ୟବସ୍ଥାରେ ବଡ଼ ବିଭ୍ରାଟ ଅଭିଯୋଗ ହୋଇଛି । ଗଳାବାଟ ଦେଇ ଶ୍ରୀମନ୍ଦିର ଭିତରକୁ ପଶିଗଲେ କିଛି ଯୁବକ । ସୁରକ୍ଷା ବିଭ୍ରାଟର ସାଂଘାତିକ ତ୍ରୁଟିର ଦୃଶ୍ୟ ଏବେ ସାମ୍ନାକୁ ଆସିବା ପରେ ବଢିଲା ଚର୍ଚ୍ଚା । ଦକ୍ଷିଣ ଦ୍ବାର ନିକଟରେ ଥିବା ଅଳିଆ ଗଦାରେ ଚଢ଼ି ମେଘନାଦ ପାଚେରି ଡେଇଁ ଶ୍ରୀମନ୍ଦିର ଭିତରକୁ ପଶି ଯାଇଛନ୍ତି କିଛି ଯୁବକ, ଯାହାର ଭିଡ଼ିଓ ଏବେ ଭାଇରାଲ ହେଉଛି ।

ଭାଇରାଲ ହେଉଥିବା ଏହି ହିଁ ସ୍ପଷ୍ଟ କରୁଛି ଶ୍ରୀମନ୍ଦିର ସୁରକ୍ଷାରେ କେତେ ବଡ଼ ତ୍ରୁଟି ହୋଇଛି । ଚାରିଦ୍ବାର ପଟେ ପ୍ରବେଶ ନେଇ କଡ଼ା ସୁରକ୍ଷା ବ୍ୟବସ୍ଥା ରହିଥିଲେ ବି କିଭଳି ନିୟମକୁ ଫୁ କରି ଗଳାବାଟ ଦେଇ ଲୋକ ଶ୍ରୀମନ୍ଦିର ପ୍ରବେଶ କରୁଛନ୍ତି ତାହା ଏବେ ବଡ଼ ପ୍ରଶ୍ନ । ଯଦି ଗଳାବାଟେ ଏଭଳି ଲୋକ ଶ୍ରୀମନ୍ଦିରକୁ ପ୍ରବେଶ କରୁଛନ୍ତି, ସେମାନଙ୍କ ନିକଟରେ ମୋବାଇଲ ଫୋନ୍ ବି ନିଶ୍ଚିତ ଥାଇପାରେ ବୋଲି ଅନୁମାନ କରାଯାଉଛି । କଥାହେଲା, ରଥଯାତ୍ରା ଦିନରୁ ଯେଉଁପରି ଗୋଟିଏ ପରେ ଗୋଟିଏ ବିଭ୍ରାଟର କଥା ସାମ୍ନାକୁ ଆସୁଛି ତାହାକୁ ନେଇ ଜୋରଦାର ଚର୍ଚ୍ଚା ହେଉଛି । ହେଲେ ଏହାରି ଭିତରେ ଶ୍ରୀମନ୍ଦିର ଭିତରକୁ ଏମିତି ମନଇଚ୍ଛା ପଶିଯାଉଥିବାର ଭିଡ଼ିଓ ସାମ୍ନାକୁ ଆସିବା ପରେ ସୁରକ୍ଷାକୁ ନେଇ ବଡ଼ପ୍ରଶ୍ନ ଉଠିଲାଣି ।

ସେପଟେ, ସରିଲା ଘୋଷଯାତ୍ରାର ଅନ୍ତିମ ପର୍ବ ନୀଳାଦ୍ରି ବିଜେ । ଆଜିଠୁ ଭକ୍ତଙ୍କୁ ମିଳିବ ନୀଳାଚଳ ଅବଢା । ରତ୍ନବେଦୀରେ ମହାପ୍ରଭୁଙ୍କ ଦର୍ଶନ ପାଇଁ ଶ୍ରୀମନ୍ଦିରରେ ଆରମ୍ଭ ହେଲାଣି ଭକ୍ତଙ୍କ ଗହଳି । ଘୋଷଯାତ୍ରାର ୧୨ ଦିନର ଲୀଳାଖେଳା ପରେ ମହାପ୍ରଭୁ ଜଗନ୍ନାଥ, ବଡ଼ଭାଇ ବଳଭଦ୍ର ଓ ଭଉଣୀ ସୁଭଦ୍ରାଙ୍କୁ ନେଇ ରତ୍ନବେଦୀକୁ ଫେରିଛନ୍ତି ।  ରଥଯାତ୍ରା, ସୁନାବେଶ ଓ ଅଧରପଣା ସାରି ଗୋଟି ପହଣ୍ଡିରେ ବଡ଼ଦେଉଳକୁ ଫେରିଛନ୍ତି  । ଆଜିଠୁ ରତ୍ନ ସିଂହାସନରୁ ଶ୍ରଦ୍ଧାଳୁଙ୍କୁ ଦର୍ଶନ ଦେବେ ତିନି ଠାକୁର । ଏତେ ଦିନ ଧରି ମାନ କରି ରହିଥିବା ମା’ ଲକ୍ଷ୍ମୀ ସାଆନ୍ତାଣିଙ୍କୁ ରସଗୋଲା ଦେଇ ମାନଭଞ୍ଜନ କରିଛନ୍ତି ବିଶ୍ବନିୟନ୍ତା ଶ୍ରୀଜଗନ୍ନାଥ । ନୀଳାଦ୍ରି ବିଜେ ଅବସରରେ ଏହା ହେଉଛି ଅନନ୍ୟ ପରମ୍ପରା ।  ପ୍ରଥମେ ରସଗୋଲା ଖୁଆଇ ମାନଭଞ୍ଜନ କଲା ପରେ ମହାପ୍ରଭୁ ରତ୍ନବେଦୀରେ ବିରାଜମାନ କରନ୍ତି । ଆଉ ଏବେ ଯେଉଁପରି ଭାବରେ ଶ୍ରୀମନ୍ଦିର ପାଚେରି ଡେଇଁ ଯୁବକମାନେ ପଶିଛନ୍ତି ତାହାକୁ ନେଇ କିନ୍ତୁ ଚର୍ଚ୍ଚା ଜୋର ।