ଶ୍ରାବଣ ମାସର ଦ୍ୱିତୀୟ ସୋମବାର: ମହାକାଳେଶ୍ୱର ଧାମରେ ଶିବଭକ୍ତଙ୍କ ଜଳାଭିଷେକ

କନକ ବ୍ୟୁରୋ: ଆଜି ଶ୍ରାବଣର ଦ୍ବିତୀୟ ସୋମବାର । ଦ୍ୱିତୀୟ ସୋମବାର ଅବସରରେ ଦ୍ୱାଦଶ ଜ୍ୟୋତିର୍ଲିଙ୍ଗ ମଧ୍ୟରୁ ଅନ୍ୟତମ ପ୍ରସିଦ୍ଧ ଉଜ୍ଜୟିନୀର ମହାକାଳେଶ୍ୱର ଧାମରେ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଦେଖିବାକୁ ମିଳିଛି । ବାବା ମହାକାଳଙ୍କ ଦର୍ଶନ ଓ ଜଳାଭିଷେକ ପାଇଁ ଦେଶର କୋଣ ଅନୁକୋଣରୁ ଲକ୍ଷାଧିକ ଶିବଭକ୍ତ ଏଠାରେ ସମବେତ ହୋଇଛନ୍ତି । 

ଶ୍ରାବଣ ସୋମବାର ଅବସରରେ ମନ୍ଦିରର ପରମ୍ପରା ଅନୁଯାୟୀ, ବ୍ରହ୍ମ ମୁହୂର୍ତ୍ତରେ ଭୋର ୨:୩୦ରେ ମନ୍ଦିରର କବାଟ ଖୋଲାଯାଇଥିଲା । ଏହାପରେ ପଞ୍ଚାମୃତରେ ବାବା ମହାକାଳଙ୍କୁ ଅଭିଷେକ କରାଯାଇଥିଲା । ଏହାପରେ ତାଙ୍କର ଭସ୍ମ ଆଳତି କରାଯାଇ ଏକ ସୁନ୍ଦର ରୂପରେ ଶୃଙ୍ଗାର କରାଯାଇଥିଲା। ସକାଳୁ ସକାଳୁ ଏହି ଦିବ୍ୟ ଦର୍ଶନ ପାଇଁ ଶ୍ରଦ୍ଧାଳୁମାନେ ରାତିରୁ ହିଁ ଲମ୍ବା ଧାଡ଼ିରେ ଅପେକ୍ଷା କରି ରହିଥିଲେ। ଦିନ ତମାମ "ଜୟ ମହାକାଳ" ଏବଂ "ହର ହର ମହାଦେବ" ଧ୍ୱନିରେ ସମଗ୍ର ମନ୍ଦିର ପରିସର ପ୍ରକମ୍ପିତ ହୋଇଉଠିଥିଲା । 

ପରମ୍ପରା ଅନୁଯାୟୀ, ଶ୍ରାବଣ ମାସର ପ୍ରତ୍ୟେକ ସୋମବାର ଦିନ ବାବା ମହାକାଳ ନିଜ ପ୍ରଜାଙ୍କ ସମସ୍ୟା  ଜାଣିବା ପାଇଁ ନଗର ଭ୍ରମଣରେ ବାହାରିଥାନ୍ତି। ଆଜି ଦ୍ୱିତୀୟ ସୋମବାରରେ ମଧ୍ୟ ସନ୍ଧ୍ୟାରେ ମହାକାଳଙ୍କର ଏକ ବିଶାଳ ପଟୁଆର ବାହାରିବ । ବାବା ମହାକାଳଙ୍କୁ ଏକ ସୁସଜ୍ଜିତ ପାଲିଙ୍କିରେ ବିରାଜମାନ କରାଇ ସହର ପରିକ୍ରମା କରାଯିବ । ଏହି ଶୋଭାଯାତ୍ରା ଦେଖିବା ପାଇଁ ରାସ୍ତାର ଦୁଇ ପାର୍ଶ୍ଵରେ ଲକ୍ଷାଧିକ ଶ୍ରଦ୍ଧାଳୁ ଏକତ୍ରିତ ହୋଇଥାନ୍ତି ।

ଶ୍ରାବଣ ମାସକୁ ଦୃଷ୍ଟିରେ ରଖି ମନ୍ଦିର ପରିସର ବାହାରେ ଏକ ବଡ଼ ମେଳାର ଆୟୋଜନ କରାଯାଇଛି । ଏଠାରେ ପୂଜା ସାମଗ୍ରୀ, ଫୁଲ, ଫଳ, ଖେଳନା ଏବଂ ବିଭିନ୍ନ ପ୍ରକାରର ଖାଦ୍ୟପେୟର ଦୋକାନ ବଜାର ଲାଗିଛି । ଦର୍ଶନ ପାଇଁ ଆସୁଥିବା ଶ୍ରଦ୍ଧାଳୁମାନେ ଏହି ମେଳାରେ ବୁଲାବୁଲି କରିବା ସହ କିଣାକିଣି କରୁଛନ୍ତି, ଯାହାଫଳରେ ପରିବେଶ ଆହୁରି ଉତ୍ସବମୁଖର ହୋଇଉଠିଛି। ପ୍ରଶାସନ ପକ୍ଷରୁ ଶ୍ରଦ୍ଧାଳୁଙ୍କ ସୁରକ୍ଷା ଓ ସୁବିଧା ପାଇଁ ବ୍ୟାପକ ବ୍ୟବସ୍ଥା କରାଯାଇଛି । ଭିଡ଼କୁ ନିୟନ୍ତ୍ରଣ କରିବା ପାଇଁ ସ୍ଥାନେ ସ୍ଥାନେ ବ୍ୟାରିକେଡ୍ ଲଗାଯିବା ସହ ବହୁ ସଂଖ୍ୟାରେ ପୁଲିସ କର୍ମୀଙ୍କୁ ମୁତୟନ କରାଯାଇଛି ।