ହାଇସ୍କୁଲରେ ପଢୁଛନ୍ତି ପ୍ରାଇମେରି ସ୍କୁଲ ପିଲା । ମଧ୍ୟାହ୍ନ ଭୋଜନ ପାଇଁ ଚାଲୁଛନ୍ତି ୨କି.ମି ରାସ୍ତା ।

କନକ ବ୍ୟୁରୋ:  ପୁରୁଣା ବିଦ୍ୟାଳୟ କୋଠାରେ ବିପଦ ଅଛି । ତେଣୁ ନୂଆ ସ୍କୁଲ ଘର ହେଇଛି । କିନ୍ତୁ ବିଲ ନପାଇ ଠିକାଦାର ତାଲା ପକାଇ ରଖିଛନ୍ତି । ନିରୁପାୟ ହୋଇ ଶିକ୍ଷୟିତ୍ରୀ ସ୍କୁଲଠାରୁ ଦୁଇ କିମି ଦୂରରେ ଥିବା ଆଉ ସ୍କୁଲରେ ପିଲାଙ୍କୁ ପାଠପଢ଼ା ବନ୍ଦୋବସ୍ତ କରିଛନ୍ତି । ମଧ୍ୟାହ୍ନ ଭୋଜନ ଖାଇବା ପାଇଁ ଚାଲିଚାଲି ପୁରୁଣା ସ୍କୁଲକୁ ଆସିବାକୁ ପଡୁଛି । କେନ୍ଦ୍ରାପଡ଼ା ପଟ୍ଟାମୁଣ୍ଡାଇ ବ୍ଲକର ଅଠରବାଟିଆ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀ ସବୁଦିନ ଏଭଳି ଅସୁବିଧାର ସମ୍ମୁଖୀନ ହେଉଛନ୍ତି। 
 
ଅଠରବାଟିଆ ପ୍ରାଥମିକ ବିଦ୍ୟାଳୟରେ ପଢୁଛନ୍ତି ୧୫୮ ଛାତ୍ରଛାତ୍ରୀ । ସେମାନଙ୍କ ପାଇଁ ଦୁଇ ବଖରା କୋଠାଘର ତିଆରି ହୋଇଛି, କିନ୍ତୁ ତାଲା ପଡ଼ିଛି । ଠିକାଦାର ନିମ୍ନମାନର କାମ କରିଥିବା ଅଭିଯୋଗରେ ବିଲ ମିଳୁନି । ତେଣୁ ବିଦ୍ୟାଳୟ କୋଠାରୁ ତାଲା ଖୋଲୁନାହାନ୍ତି, କି ପିଲାମାନେ ସେଠାରେ ପଢ଼ି ପାରୁନାହାନ୍ତି ।

ବର୍ଷା ଦିନେ ପାଣି କାଦୁଅରେ ଛାତ୍ରଛାତ୍ରୀଙ୍କ ଏଭଳି ସମସ୍ୟାର ସମାଧାନ ପାଇଁ ଶିକ୍ଷା ବିଭାଗ ଓ ବ୍ଲକ ପ୍ରଶାସନ ପଦକ୍ଷେପ ନେବା ଜରୁରୀ ହୋଇପଡ଼ିଛି ।