ରଥ ପାଇଁ କାଠ କାହିଁ ? ରଥଖଳାରେ ଧଉରା କାଠ ଅଭାବ

କନକ ବ୍ୟୁରୋ: ଚଳଚଞ୍ଚଳ ରଥ ଖଳା । ଚାଲିଛି ରଥ ନିର୍ମାଣ କାମ । ହେଲେ ଏଯାଏ ଆବଶ୍ୟକ ଅନୁଯାୟୀ ଅଖ କାଠ ପହଞ୍ଚିପାରିନାହିଁ । ରଥଖଳାରେ ଅଖ ତିଆରିରେ ବିଳମ୍ବ ହେଉଛି । ସେପଟେ ଫେଲ ମାରିଛି ଜଗନ୍ନାଥ ବନ ପ୍ରକଳ୍ପ। 

ଅଖ ପାଇଁ ଏଯାଏ ଖଳାରେ ପହଞ୍ଚିନାହିଁ ଧଉରା କାଠ । ଏବେ ଯେଉଁ ଧଉରା କାଠ ପହଞ୍ଚିଛି, ସେଥିରେ ଅଧିକାଂଶ ବଙ୍କା କାଠ ହୋଇଥିବାରୁ ଏହା ଅଖ ନିର୍ମାଣ ଉପଯୋଗୀ ହୋଇପାରୁନାହିଁ  । ଭଉଁରିରେ ଚକ ଅଖ ଡେରା ନୀତି ସମ୍ପନ୍ନ ହେବା ପରେ ଏବେ ଚକ ଓ ଅଖ କାମ ଚାଲିବା କଥା । ଯଦିଓ ଚକ କାମ ଚାଲିଛି, କିନ୍ତୁ ଅଖ ନିର୍ମାଣ ଉପଯୋଗୀ ଧଉରା କାଠ ଆସିନଥିବାରୁ ଅଖ ନିର୍ମାଣ ବିଳମ୍ବ ହେଉଛି । ୩ ରଥ ପାଇଁ ୨୧ଟି ଧଉରା କାଠ ଅଖ ପାଇଁ ଆବଶ୍ୟକ । ଅଖ ହେଉଛି ରଥର ମୁଖ୍ୟ । ଏହାକୁ ଯତ୍ନର ସହିତ ପ୍ରସ୍ତୁତ କରିବାକୁ ପଡ଼େ । ଏଥିପାଇଁ ସମୟ ମଧ୍ୟ ଦରକାର । ହେଲେ ରଥଖଳାକୁ ପର୍ଯ୍ୟାପ୍ତ ଓ ଉପଯୁକ୍ତ କାଠ ପହଞ୍ଚିନଥିବାରୁ ସମସ୍ୟା ସୃଷ୍ଟି ହୋଇଛି  । 

ରଥକାଠ ଆବଶ୍ୟକତାକୁ ପୂରଣ କରିବାକୁ ଜଗନ୍ନାଥ ବନ ପ୍ରକଳ୍ପ କରାଯାଇଥିଲା , କିନ୍ତୁ ଲକ୍ଷ୍ୟ ପଥରୁ ବିଚ୍ୟୁତ ହୋଇଛି ପ୍ରକଳ୍ପ । ପାଣିରେ ପଡିଛି ୯ କୋଟିରୁ ଅଧିକ ଟଙ୍କାର ପ୍ରକଳ୍ପ । ୨୫ ବର୍ଷରେ ୧୬ ବନ ପ୍ରକଳ୍ପ ଫେଲ ମାରିଛି । ୪୩୧୦. ୪୯ ହେକ୍ଟର ଜମିରେ ଲାଗିଥିଲା ୮୯ ଲକ୍ଷ ଚାରା । ୯ କୋଟି ୨୪ ଲକ୍ଷ ୭ ହଜାର ୫୮୨ ଟଙ୍କା ଖର୍ଚ୍ଚର ପ୍ରକଳ୍ପ ଏବେ ଲକ୍ଷ୍ୟ ହରାଇଛି । ସବୁଠାରୁ ବଡ କଥା ହେଲା ପୂର୍ବରୁ ଲାଗିଥିବା ଚାରା ଗୁଡ଼ିକରୁ ଅନେକ ମରିଯାଇଥିବାବେଳେ ବଞ୍ଚିଥିବା ଅନେକ ଗଛ ରଥକାଠ ଉପଯୋଗୀ ହୋଇ ପାରିନାହିଁ । କିଛି ବର୍ଷ ହେବ ରଥ ନିର୍ମାଣ ପାଇଁ ଦାତାଙ୍କ ଦାନ କାଠ ଉପରେ ନିର୍ଭର କରିବାକୁ ପଡୁଛି । ରଥକାଠ ଚାହିଦା ପୂରଣ ନିମନ୍ତେ ଡେଲାଙ୍ଗ ଗୁମୁକା ଜଙ୍ଗଲ ଓ ରେଙ୍ଗଳି ଠାରେ ବନ ପ୍ରକଳ୍ପ ଅନ୍ତର୍ଗତ ଗଛ ଲଗାଯାଇଥିଲା । ହେଲେ ଏବ ମାତ୍ର ୩୩ ଭାଗ ଗଛ ବଞ୍ଚିଛି ।

ପ୍ରତିବର୍ଷ ରଥ ସମୟରେ କାଠ ଅଭାବକୁ ନେଇ ଅସନ୍ତୋଷ ଦେଖାଦେଇଛି । ଏହାର ସ୍ଥାୟୀ ସମାଧାନ କଣ ! ବନ ପ୍ରକଳ୍ପର ଭବିଷ୍ୟତ କଣ  ଏକଥା ଚିନ୍ତା ନକଲେ ଆଗକୁ ରଥକାଠ ସମସ୍ୟା ଉତ୍କଟ ହେବା ଜଳ ଜଳ ଦିଶୁଛି ।