କନକ ବ୍ୟୁରୋ : ବିଚାରପତି ଯଶବନ୍ତ ବର୍ମାଙ୍କ ବିରୋଧରେ ମାମଲା ରୁଜୁ ଦାବି କରି ସୁପ୍ରିମକୋର୍ଟରେ ହୋଇଥିବା ଆବେଦନକୁ କୋର୍ଟ ଖାରଜ କରିଦେଇଛନ୍ତି । କୋର୍ଟ କହିଛନ୍ତି କି, ଏହା ପୂର୍ବରୁ ସୁପ୍ରିମକୋର୍ଟର ମୁଖ୍ୟ ବିଚାରପତି ୩ ବିଚାରପତିଙ୍କ ତଦନ୍ତ ରିପୋର୍ଟ ଓ ବିଚାରପତି ଯଶବନ୍ତ ବର୍ମାଙ୍କ ଜବାବକୁ ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କ ନିକଟକୁ ବିଚାର ପାଇଁ ପଠାଇ  ଦିଆଯାଇଛି ।  ଏବେ ମାମଲା ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କ ପାଖରେ ରହିଛି । ଏହି କାରଣରୁ ଆବେଦନକାରୀ କୋର୍ଟ ଆସିବା ବଦଳରେ ସିଧା ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ନିକଟରେ ଆବେଦନ କରିପାରିବେ ।

Advertisment

ଓକିଲ ନେଦୁମପାରାଙ୍କ ତରଫରୁ ଦାଖଲ ହୋଇଥିବା ଆବେଦନରେ କୁହାଯାଇଛି କି, ଜଷ୍ଟିସ ବର୍ମାଙ୍କ ଘରୁ ଟଙ୍କା ମିଳିବା କଥା ପ୍ରମାଣିତ ହୋଇସାରିଛି । ଏହି କାରଣରୁ ଆଇନ ପ୍ରକ୍ରିୟା ମାଧ୍ୟମରେ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ତେଣୁ ଏବେ ତାଙ୍କ ବିରୋଧରେ ମାମଲା ରୁଜୁ ହେବା ଆବଶ୍ୟକ । 

ଏହି ମାମଲାର ଶୁଣାଣି କରି ବିଚାରପତି ଅଭୟ ଏସ ଓକ୍ ଓ ଜଷ୍ଟିସ  ଉଜ୍ଜ୍ୱଳ ଭୂୟାଁଙ୍କ ବେଂଚ କହିଛନ୍ତି କି, ଏହି ମାମଲା ଏବେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ନିକଟରେ ରହିଛି । ତେଣୁ ଏହା ଉପରେ ସୁପ୍ରିମକୋର୍ଟ ହସ୍ତକ୍ଷେପ କରିପାରିବ ନାହିଁ । ଏହାକୁ ନେଇ ଓକିଲ ନେଦୁମପାରା ବୀରାସ୍ୱାମୀ ଜଜମେଣ୍ଟ ଉପରେ ପ୍ରଶ୍ନ ଉଠାଇଥିଲେ ।