ସାୱାଲକୋଟ ଜଳ ବିଦ୍ୟୁତ୍ ପ୍ରକଳ୍ପ: ଟେଣ୍ଡର ଜାରି, ପାକିସ୍ତାନର ବଢ଼ିଲା ଚିନ୍ତା

କନକବ୍ୟୁରୋ : ପାକିସ୍ତାନ ସହିତ ସିନ୍ଧୁ ଜଳ ଚୁକ୍ତିନାମା ସ୍ଥଗିତ ହେବା ପରେ , ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାର ଚେନାବ ନଦୀରେ ପ୍ରମୁଖ ଭିତ୍ତିଭୂମି ଓ ଶକ୍ତି ପ୍ରକଳ୍ପ ପାଇଁ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛନ୍ତି । ଏହି ପରିପ୍ରେକ୍ଷୀରେ, ରାଷ୍ଟ୍ରାୟତ୍ତ ଏନ୍‌ଏଚ୍‌ପିସି ଜମ୍ମୁ-କାଶ୍ମୀରର ରାମବନ ଜିଲ୍ଲାରେ ସାୱାଲକୋଟ ଜଳ ବିଦ୍ୟୁତ୍ ପ୍ରକଳ୍ପ ନିର୍ମାଣ ପାଇଁ ଏକ ଟେଣ୍ଡର ଜାରି କରିଛି ।

ମୋଟ ବଜେଟ୍ ୫,୧୨୯ କୋଟି ଟଙ୍କା
ଏହି ପ୍ରକଳ୍ପ ଚେନାବ ନଦୀ ଉପରେ ଅବସ୍ଥିତ। ଏହାର ମୋଟ ବଜେଟ୍ ୫,୧୨୯ କୋଟି ଟଙ୍କା ରହିଛି । ଏହି ପ୍ରକଳ୍ପରେ ଗୋଟିଏ ପ୍ୟାକେଜ୍ ମଧ୍ୟରେ ଏକ ଭିନ୍ନ ସୁଡ଼ଙ୍ଗ, ଏଡିଟ୍, ଡିଟି ଓ କଫର ଡ୍ୟାମ୍ ନିର୍ମାଣ କରାଯିବ। । ଏହା ସହିତ, ମାଣ୍ଡିଆ ନାଲା ଡିଟି, ରାସ୍ତା ନିର୍ମାଣ, ଡାହାଣ ପାର୍ଶ୍ୱ ସର୍ପାଇଲ୍ ସୁଡ଼ଙ୍ଗ, ପ୍ରବେଶ ସୁଡ଼ଙ୍ଗ ଓ ଡ୍ୟାମ୍ ସମ୍ବନ୍ଧୀୟ ଆନୁଷଙ୍ଗିକ କାର୍ଯ୍ୟ ମଧ୍ୟ ଏହି ପ୍ୟାକେଜ୍‌ର ଅଂଶ ହେବ ।

ଜାମ୍ମୁ-କାଶ୍ମୀରର ବିକାଶ ପାଇଁ ଗୁରୁତ୍ୱପୂର୍ଣ୍ଣ 
ପ୍ରକଳ୍ପକୁ ବିଦ୍ୟୁତ୍ ଉତ୍ପାଦନ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଏହାର କାର୍ଯ୍ୟକ୍ଷମ ହେବା ଦ୍ୱାରା ଜମ୍ମୁ-କାଶ୍ମୀରର ଶକ୍ତି ଆବଶ୍ୟକତା ପୂରଣ ହେବ। ଏହା ଦେଶର ବିଦ୍ୟୁତ୍ ଗ୍ରୀଡ୍‌କୁ ମଧ୍ୟ ସୁଦୃଢ଼ କରିବ। ପ୍ରକଳ୍ପ ପାଇଁ ଟେଣ୍ରଡ ମାର୍ଚ୍ଚ ୧୨ ରୁ ମାର୍ଚ୍ଚ ୨୦ ପର୍ଯ୍ୟନ୍ତ ଗ୍ରହଣ କରାଯିବ। ଏହାର ବୈଧତା ଅବଧି ୧୮୦ ଦିନ ରହିବ। ନିର୍ମାଣ କାର୍ଯ୍ୟ ସମାପ୍ତ ହେବା ପାଇଁ ୩,୨୮୫ ଦିନର ସମୟସୀମା ଧାର୍ଯ୍ୟ କରାଯାଇଛି। ଏହି ପ୍ରକଳ୍ପରୁ ମୋଟ ୧,୮୫୬ ମେଗାୱାଟ୍ ବିଦ୍ୟୁତ୍ ଉତ୍ପାଦନ କରିବାକୁ ଲକ୍ଷ୍ୟ ରଖାଯାଇଛି।

ଶକ୍ତି ଆତ୍ମନିର୍ଭରଶୀଳତା ଦିଗରେ ଗୁରୁତ୍ୱପୂର୍ଣ୍ଣ ପଦକ୍ଷେପ
ସିନ୍ଧୁ ଜଳ ଚୁକ୍ତିନାମା ଅନୁଯାୟୀ ପାକିସ୍ତାନ ସହିତ ବଢୁଥିବା ଉତ୍ତେଜନା ମଧ୍ୟରେ , ଏହି ପ୍ରକଳ୍ପକୁ ଭାରତର ଜଳସମ୍ପଦର ଉତ୍ତମ ବ୍ୟବହାର ଓ ରଣନୈତିକ ତଥା ଆର୍ଥିକ ସ୍ଥିତିକୁ ସୁଦୃଢ଼ କରିବାର ଏକ ମାଧ୍ୟମ ଭାବରେ ଦେଖାଯାଉଛି। ଏହାକୁ ଭାରତ ପାଇଁ ଶକ୍ତି ଆତ୍ମନିର୍ଭରଶୀଳତା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ବିବେଚନା କରାଯାଉଛି। ତେବେ ଏହାକୁ ନେଇ ପାକିସ୍ତାନର ଚିନ୍ତା ବଢ଼ିବାରେ ଲାଗିଛି।