ସରପଞ୍ଚଙ୍କ ଦବଙ୍ଗଗିରି ; ପାନଦୋକାନୀକୁ ମାଡ ମାରିଲେ, ଗିରଫ ହେଲେ

କନକ ବ୍ୟୁରୋ: ମହଙ୍ଗା ପଡିଲା ସରପଞ୍ଚଙ୍କ ଦବଙ୍ଗଗିରି । ଭଦ୍ରକ ବ୍ଲକ ଗୁଜିଦରଡ଼ା ପଞ୍ଚାୟତର ସରପଞ୍ଚ ଫରଆଦ ଆଲାମଙ୍କୁ ଗିରଫ କଲା ପୋଲିସ । ଏକ ସାଧାରଣ ଘଟଣାକୁ କେନ୍ଦ୍ର କରି ଗତ ମାସ ୯ ତାରିଖ ଦିନ ସରପଞ୍ଚ ଜଣେ ଛୋଟ ପିଲାକୁ ମାଡ଼ ମାରୁଥିବା ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା । 

ପାନ ଦୋକାନ କରିଥିବା ଜଣେ ବାଳକଙ୍କ ସହିତ ଆଉ ଜଣେ ଯୁବକଙ୍କ ଯୁକ୍ତିତର୍କ ହୋଇଥିଲା । ପରେ ଯୁବକ ଜଣକ ସ୍ଥାନୀୟ ସରପଞ୍ଚ ଫରଆଦ ଆଲାମଙ୍କୁ ଘଟଣାସ୍ଥଳକୁ ଡାକିଥିଲେ। ସରପଞ୍ଚ ଆସିବା ପରେ ବାଳକଟିକୁ ଘୋଷାଡ଼ି ଘୋଷାଡ଼ି ମାଡ଼ ମାରିଥିଲେ । ମାଡ ଖାଇଥିବା ବାଳକଙ୍କ ପରିବାର ପକ୍ଷରୁ ଗୁଜିଦରଡ଼ା ଫାଣ୍ଡିରେ ଲିଖିତ ଅଭିଯୋଗ ହୋଇଥିଲା । ଦୀର୍ଘ ଦିନ ବିତି ଯାଇଥିବା ବେଳେ ପୋଲିସ ନୀରବ ରହିଥିଲା । ସରପଞ୍ଚଙ୍କ ଗିରଫ ଦାବି କରି ବିଭିନ୍ନ ହିନ୍ଦୁ ସଂଗଠନ, ଭଦ୍ରକ ଏସପି ଓ ଜିଲ୍ଲାପାଳଙ୍କୁ ଦାବିପତ୍ର ଦେଇଥିଲେ । ଶେଷରେ ଭଦ୍ରକ ଗ୍ରାମାଞ୍ଚଳ ପୋଲିସ ସରପଞ୍ଚଙ୍କୁ ଗିରଫ କରି କୋର୍ଟ ଚାଲାଣ କରିଛି।