କନକ ବ୍ୟୁରୋ : ଦେଶର ଯୁବପିଢ଼ିଙ୍କ ମଧ୍ୟରେ UPSC  ପରୀକ୍ଷାକୁ ନେଇ ବଢୁଥିବା କ୍ରେଜ୍ ଉପରେ ଗଭୀର ଚିନ୍ତା ପ୍ରକଟ କରିଛନ୍ତି ଦେଶର ଜଣେ ଶୀର୍ଷ ଅର୍ଥନୀତିଜ୍ଞ । ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦର ସଦସ୍ୟ ସଞ୍ଜୀବ ସାନ୍ୟାଲ ଏହି କ୍ରେଜ୍‌କୁ ୱେଷ୍ଟ୍‌ ଅଫ୍‌ ଟ୍ୟାଲେଣ୍ଟ୍‌ ବୋଲି କହିବା ସହ କୋଚିଂ ସଂସ୍ଥାଗୁଡ଼ିକୁ "କୋଚିଂ ମାଫିଆ" ଆଖ୍ୟା ଦେଇଛନ୍ତି । ତାଙ୍କ କହିବା ଅନୁସାରେ , ଏହି "କୋଚିଂ ମାଫିଆ"  ପିଲାମାନଙ୍କୁ 'ଅଫିମ' ବିକ୍ରି କରୁଛନ୍ତି ।

ଅର୍ଥବ୍ୟବସ୍ଥା ପାଇଁ ଏକ ବଡ଼ ଆଘାତ ?

Advertisment

ସାନ୍ୟାଲ କହିଛନ୍ତି, "ଯଦି ଆପଣଙ୍କ ପିଲାର ପ୍ରକୃତରେ ଜଣେ  ପ୍ରଶାସକ ହେବାର କ୍ଷମତା ଅଛି, ତେବେ ତାକୁ ସେ ଦିଗରେ ପ୍ରୋତ୍ସାହିତ କରନ୍ତୁ । କିନ୍ତୁ ଲକ୍ଷ ଲକ୍ଷ ପିଲା ନିଜ ଜୀବନର ସବୁଠାରୁ ମୂଲ୍ୟବାନ ସମୟକୁ ଏକ ଏପରି ପରୀକ୍ଷା ପାଇଁ ନଷ୍ଟ କରୁଛନ୍ତି, ଯେଉଁଥିରେ ସଫଳତାର ହାର ନଗଣ୍ୟ । ଏହା ଏକ ପ୍ରକାର 'ଆକାଂକ୍ଷାର ଦାରିଦ୍ର୍ୟ' ।" UPSC ପରୀକ୍ଷା ପାଇଁ ପ୍ରସ୍ତୁତି ହେବା ପାଇଁ ଖାଲି ଯେ ଧନୀ ଶ୍ରେଣୀର ପିଲା ଯାଉଛନ୍ତି ତା' ନୁହେଁ ,ବହୁତ ମଧ୍ୟବିତ୍ତ ଗରିବ ଶ୍ରେଣୀର ପିଲାମାନେ ମଧ୍ୟ ଯାଇଥାଆନ୍ତି । ବର୍ଷ ବର୍ଷ ଧରି କୋଚିଂ ସେଣ୍ଟରର ମାଲିକ ସେମାନଙ୍କ ମିଛ ଆଷଶା ଦେଇ ପଇସା ଲୁଟିବାରେ ବ୍ୟସ୍ତ ଥାଆନ୍ତି । ଯାହାକି ସବୁଠାରୁ ଦୁଃଖର ବିଷୟ । 

ସେ ଆହୁରି ମଧ୍ୟ କହିଛନ୍ତି, "କଳ୍ପନା କରନ୍ତୁ, ଯଦି ଏହି ଲକ୍ଷ ଲକ୍ଷ ପିଲା, ଯେଉଁମାନେ ବୁଦ୍ଧିମାନ ସେମାନେ ଯଦି ଉଦ୍ୟୋଗ, କ୍ରୀଡ଼ା, ବିଜ୍ଞାନ, ସଙ୍ଗୀତ କିମ୍ବା ସିନେମା କ୍ଷେତ୍ରରେ ନିଜ ଭାଗ୍ୟ ପରୀକ୍ଷା କରନ୍ତେ, ତେବେ କ'ଣ ହୁଅନ୍ତା ? ଆମକୁ ହୁଏତ ଅନେକ ଏଲନ୍ ମସ୍କ, କିମ୍ବା ଶ୍ରେଷ୍ଠ ବୈଜ୍ଞାନିକ ଓ ଖେଳାଳି ମିଳିପାରନ୍ତେ ।" କୋଚିଂ ଇଣ୍ଡଷ୍ଟ୍ରି ଉପରେ ବର୍ଷି ସେ କହିଛନ୍ତି ଯେ ଦିଲ୍ଲୀର ମୁଖାର୍ଜୀ ନଗର ଏବଂ ରାଜସ୍ଥାନର କୋଟା ଭଳି ସ୍ଥାନରେ "କୋଚିଂ ମାଫିଆମାନେ" ଏକ ବଡ଼ ଶିଳ୍ପ ଚଳାଇଛନ୍ତି । ସେମାନେ ଜାଣନ୍ତି ଯେ ଅଧିକାଂଶ ପିଲା ସଫଳ ହେବେ ନାହିଁ, ତଥାପି ସେମାନେ ମିଛ ଆଶା ଦେଖାଇ ଅଭିଭାବକଙ୍କଠାରୁ ମୋଟା ଅଙ୍କର ଅର୍ଥ ଲୁଟୁଛନ୍ତି ।

ଏଲନ୍ ମସ୍କ ହେବାକୁ ଦେଲେ ପରାମର୍ଶ

ସାନ୍ୟାଲ୍ ମତରେ , ଏତେ କମ୍ ସଫଳତା ହାର ଥିବା ସତ୍ତ୍ୱେ ଲୋକମାନେ କାହିଁକି ଏହାକୁ ବାଛୁଛନ୍ତି । ସେ ପରାମର୍ଶ ଦେଇଛନ୍ତି ଯେ ଯୁବପିଢ଼ିମାନେ ଏଲନ୍ ମସ୍କ ହେବାକୁ ଚେଷ୍ଟା କରିବା ଉଚିତ୍ । ସାନ୍ୟାଲ ସ୍ପଷ୍ଟ କରିଛନ୍ତି ଯେ ସିଭିଲ୍ ସର୍ଭିସ୍‌ ପରୀକ୍ଷାରେ ସଫଳ ହେବାକୁ ଇଚ୍ଛା ରଖିଥିବା ପିଲାଙ୍କ ପ୍ରତି ତାଙ୍କର କୌଣସି ଆପତ୍ତି ନାହିଁ । କିନ୍ତୁ, ସେ ସେହି ଯୁବପିଢ଼ିଙ୍କ ବିରୋଧରେ ଅଛନ୍ତି ଯେଉଁମାନେ ବର୍ଷ ବର୍ଷ ଧରି ଏହାକୁ ପାଇବା ଆଶାରେ ଫସି ରହୁଛନ୍ତି । ସେ ଏହାକୁ ମାନବ ସମ୍ବଳର ଅପଚୟ ବୋଲି କହିଛନ୍ତି ।

ମାର୍ଚ୍ଚ ୨୦୨୪ ଶେଷ ଆଡ଼କୁ ସାନ୍ୟାଲ୍ UPSC ପ୍ରତି ଥିବା କ୍ରେଜକୁ ନେଇ ସତର୍କ କରାଇଥିଲେ । ସେ କହିଥିଲେ ଯେ ବହୁତ ସଂଖ୍ୟକ ଯୁବକ ନିଜର ଶକ୍ତିକୁ UPSC ପରୀକ୍ଷା ପାସ୍ କରିବାରେ ବରବାଦ କରୁଛନ୍ତି । ସଞ୍ଜୀବଙ୍କ ମତରେ, ଦେଶକୁ କେବଳ ଜିଲ୍ଲାପାଳ ନୁହେଁ, ବରଂ ନୂଆ ଜିନିଷ ତିଆରି କରୁଥିବା, ନୂଆ ଚିନ୍ତାଧାରା ଆଣୁଥିବା ଏବଂ ରିସ୍କ ନେଉଥିବା ଲୋକଙ୍କର ଅଧିକ ଆବଶ୍ୟକତା ରହିଛି । ତାଙ୍କର ଏହି ବୟାନ ପରେ ସାମାଜିକ ଗଣମାଧ୍ୟମରେ ଏକ ନୂଆ ବିତର୍କ ଆରମ୍ଭ ହୋଇଯାଇଛି ।