ନଦୀ ପଠାକୁ ଖୋଳି ପକାଉଛନ୍ତି ବାଲି ଚୋର ; କୋଟିକୋଟି ଟଙ୍କାର ବାଲି ଲୁଟ୍ ଅଭିଯୋଗ

କନକ ବ୍ୟୁରୋ : ସାରା ରାଜ୍ୟରେ ମାତିଛନ୍ତି ବାଲି ମାଫିଆ । ଆଇନ୍ ବାହାରକୁ ଯାଇ ଖୋଳି ପକାଉଛନ୍ତି ନଦୀପଠା,ବୋହି ନେଉଛନ୍ତି ଟ୍ରିପ୍‌ ଟ୍ରିପ୍ ବାଲି । କେନ୍ଦ୍ରାପଡ଼ାରେ ୭ଟି ପ୍ରମୁଖ ନଦୀର ୨୦ଟି ସୈତରାକୁ ନିଲାମ ଦିଆଯାଏ କିନ୍ତୁ ୨୦୨୩-୨୪ ଆର୍ଥିକ ବର୍ଷରେ ୧୮ଟି ଘାଟକୁ ବନ୍ଦ କରିଦେଇଛନ୍ତି ସରକାର । ଅର୍ଥାତ୍ ଏବେ ସରକାରୀ ଭାବେ ୨ଟି ଘାଟ ଲିଜ୍ ଦିଆଯାଇଛି । କିନ୍ତୁ ବେଆଇନ୍ ଭାବେ ଚାଲିଛି ୫୦ରୁ ଅଧିକ ଖାଦାନ ।

ବେଆଇନ୍ ବାଲି ଚାଲଣକୁ ନେଇ ଖବର ପ୍ରସାରଣ ପରେ ଲୋକ ଦେଖାଣିଆ ଭାବେ ତୁଣୁପୁର, ବିଚଣଆ ବାଲିଘାଟରେ ଚଢ଼ାଉ କରିଛି ଖଣି ବିଭାଗ । ଧର୍ମକୁ ଆଖିଠାର ଭଳି କାଁ ଭାଁ ଚଢ଼ାଉ ଚାଲିଛି କିନ୍ତୁ ଖଣି ବିଭାଗରେ କର୍ମଚାରୀ ନାହାନ୍ତି । ଜଣେ ମାତ୍ର ଭାରପ୍ରାପ୍ତ ଅଧିକାରୀ ଥିବାରୁ କୋଟିକୋଟି ଟଙ୍କାର ରାଜସ୍ୱ ଲୁଟ୍‌ରେ ରୋକ ଲାଗିପାରୁନାହିଁ । ନଦୀନାଳ ଘେରା କେନ୍ଦ୍ରାପଡ଼ା ଜିଲ୍ଲା । ଏଭଳି ଜିଲ୍ଲାରେ ବାଲି ଚୋରିକୁ ରୋକିବା ପାଇଁ ପ୍ରଶାସନ ପକ୍ଷରୁ ପର୍ୟ୍ୟପ୍ତ କର୍ମଚାରୀ ନିଯୁକ୍ତ କରିବାର ଆବଶ୍ୟକତା ରହିଛି ।