ସରଗରମ ନିମାପଡା ରାଜନୀତି ; ଗୋଟିଏ ଦଳରେ ଅଲଗା ଅଲଗା ସମୀର-ପ୍ରଭାତୀ

କନକ ବ୍ୟୁରୋ : ସମୀରଙ୍କ ଅଭିଯୋଗ, ପ୍ରଭାତୀଙ୍କ ଉତ୍ତର ଏବେ ନିମାପଡା ରାଜନୀତିରେ ହଟଚମଟ ସୃଷ୍ଟି କରିଛି । ବିଜେପିକୁ ଆସିବାର ବର୍ଷେ ପରେ ସମୀରଙ୍କ ଆଭିମୁଖ୍ୟରେ ପରିବର୍ତ୍ତନ ନୂଆ ଚର୍ଚ୍ଚାକୁ ଜନ୍ମ ଦେଲାଣି । ବର୍ଷେ ପୂର୍ବରୁ ରାଜନୈତିକ ସମ୍ପର୍କରେ ଯେଉଁ ଜୁଆର ଉଠିଥିଲା ,ଏବେ ସେଠାରେ ଭଟ୍ଟା ପଡ଼ିଛି । ବର୍ଷେ ପୂର୍ବରୁ ବିଜେଡିକୁ ବାଏ ବାଏ କରି ପଦ୍ମ ଧରିଥିଲେ ପୂର୍ବତନ ମନ୍ତ୍ରୀ ସମୀର ଦାଶ । ସମୀର ଦଳ ଛାଡ଼ିବା ସହ ବିଜେଡି ହାତରୁ ଖସିଥିଲା ନିମାପଡ଼ା ଆସନ । ବିଜେପିରୁ ବାଜି ମାରିଥିଲେ ପ୍ରଭାତୀ । କିନ୍ତୁ ବର୍ଷେ ପରେ ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କୁ ନେଇ ବିଷ ଉଗାରିଛନ୍ତି ଦଳୀୟ ସହଯୋଗୀ ତଥା ପୂର୍ବତନ ମନ୍ତ୍ରୀ ସମୀର ଦାଶ ।

ବର୍ଷକର ହିସାବକିତାବ ସହ ପ୍ରଭାତୀଙ୍କୁ ମାରିଛନ୍ତି ବିକାଶ ବାଣ । ବର୍ଷକରେ ନିମାପଡ଼ାରେ ମାଟି ମୁଠାଏ ପଡିନି । ପିସି କାରବାର ବଢ଼ିଛି କହି ଅସନ୍ତୋଷ ଝାଡ଼ିଛନ୍ତି ସମୀର । ଯାହାର କଡ଼ା ଜବାବ ରଖି ପ୍ରଭାତୀ କହିଛନ୍ତି, ବର୍ଷେ ଭିତରେ କଣ କାମ ହୋଇଛି ନ ହୋଇଛି ତାହା ଲୋକ କହିବେ । ଯଦି ମାଟି ପଡ଼ିନି ତେବେ ପିସି କାରବାର କେମିତି ହେଲା ? ବୋଲି ପାଲଟା ପ୍ରଶ୍ନ କରିଛନ୍ତି । 

ଆଶା ଯେବେ ପୂରଣ ହୁଏନି ସେବେ ବଢିଯାଏ ଅସନ୍ତୋଷ । ନିମାପଡ଼ା ବିଜେପି ରାଜନୀତିରେ ଏବେ ସମାନ ସ୍ଥିତି ଦେଖିବାକୁ ମିଳିଛି । ବର୍ଷକ ପୂର୍ବରୁ ଅନେକ ଆଶା ନେଇ ପଦ୍ମ ଧରିଥିଲେ ସମୀର , ଦଳ ସରକାରକୁ ଆସିଲା । କିନ୍ତୁ ବର୍ଷକ ଭିତରେ ସମୀରଙ୍କୁ ସଙ୍ଗଠନରେ ସେଭଳି ଗୁରୁଦାୟିତ୍ବ ମିଳିଲାନି । ନିଜ ରାଜନୈତିକ ଅସ୍ତିତ୍ବ ବଞ୍ଚାଇବାକୁ ସମୀର ଏବେ ସମାନ୍ତରଳ ସଙ୍ଗଠନ ଆରମ୍ଭ କରିଥିବା ଚର୍ଚ୍ଚା ହେଉଛି । 

ପ୍ରଭାତୀଙ୍କ ଉପରେ ସମୀରଙ୍କ ପ୍ରଶ୍ନ ଉଠାଇ ରାଜନୈତିକ କରିଡରରେ ହଲଚଲ ସୃଷ୍ଟି କରିଛନ୍ତି । ଚର୍ଚ୍ଚା ହେଉଛି, ଖୁବଶୀଘ୍ର ପୁରୁଣା ଦଳକୁ ଫେରିପାରନ୍ତି ସମୀର ? କିନ୍ତୁ ବିଜେଡି ସମୀରଙ୍କୁ ବିଶ୍ବାସକୁ ନେବ କି ନାହିଁ ତାହା ସବୁଠୁ ବଡ଼ ପ୍ରଶ୍ନ ?