କନକବ୍ୟୁରୋ : ସମ୍ବଲପୁରରେ ପୋଲିସ ମାଡ଼ରେ ଅଭିଯୁକ୍ତର ମୃତ୍ୟୁ ଅଭିଯୋଗ   । ତାତିଲେ ଲୋକେ   ।  ରାତିଅଧରେ ହୀରାକୁଦ ଥାନା ଘେରାଉ କରିଛନ୍ତି  । ନ୍ୟାୟ ଦାବିରେ ଥାନା ଆଗରେ ବସି ରହିଲେ ପରିବାର ଲୋକ ଓ ଗ୍ରାମବାସୀ  ।  ମୃତ ବ୍ୟକ୍ତି ଜଣକ ହେଉଛନ୍ତି ଖ୍ରୀଷ୍ଟିଆନପଡା ଅଞ୍ଚଳର କାଦିର ମହମ୍ମଦ ସେଖ୍ ।  ଝାଙ୍କରପଡା ଅଞ୍ଚଳର ଦିଲ୍ଲୀପ ପ୍ରଧାନଙ୍କ ଗ୍ୟାରେଜରୁ  ପାଣି ମୋଟର ଚୋରି ଅଭିଯୋଗରେ କାଦିରଙ୍କୁ ଗିରଫ କରିଥିଲା ପୋଲିସ । ସୋମବାର କୋର୍ଟ ଚାଲାଣ କରାଯାଇଥିଲା  । 

Advertisment

କୋର୍ଟରେ ଦେହ ଅସୁସ୍ଥ ହେବାରୁ କାଦିରଙ୍କୁ ପ୍ରଥମେ ସଦର ଡାକ୍ତରଖାନାକୁ ନିଆଯାଇଥିଲା  ।  ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ ଭିମସାରକୁ ସ୍ଥାନାନ୍ତରିତ କରାଯାଇଥିଲା  ।  କିନ୍ତୁ ବାଟରେ ହିଁ କାଦିରଙ୍କ ମୃତ୍ୟୁ ହୋଇଥିଲା   ।  ପୋଲିସ ଥାନାରେ ମାଡ଼ ମାରିବା ଯୋଗୁଁ କାଦିରଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି  ।  

ସେପଟେ କାଦିର ଯେଉଁ ଗ୍ୟାରେଜରୁ ମୋଟର ଚୋରି କରିଥିଲେ ସେଠାରେ  କର୍ମଚାରୀ ମଧ୍ୟ ତାଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି  ।  ଯାହାକୁ ନେଇ ପ୍ରବଳ ଉତ୍ତେଜନା ପ୍ରକାଶ ପାଇଛି  ।  ଥାନାର ସିସିଟିଭି ଯାଞ୍ଚ ପାଇଁ ଦାବି କରିଛନ୍ତି ଲୋକେ ।  କାଦିରଙ୍କ ଘରେ ଦେଢ଼ ବର୍ଷର ଶିଶୁ ଥିବା ବେଳେ ତାଙ୍କ ପରିବାରକୁ ତୁରନ୍ତ କ୍ଷତିପୂରଣ ଦେବାକୁ ଦାବି ହୋଇଛି  ।  

ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ମୃତ୍ୟୁର କାରଣ ସ୍ପଷ୍ଟ ହେବ ।  ଏଠି ପ୍ରଶ୍ନ ଉଠୁଛି କାଦିର ଅସୁସ୍ଥ ଥିବା ବେଳେ କିପରି ଜାଣିପାରିଲାନି ପୋଲିସ  ? କୋର୍ଟ ଚାଲାଣ ପୂର୍ବରୁ ହୋଇ ନଥିଲା କି ସ୍ବାସ୍ଥ୍ୟ ପରୀକ୍ଷା ? କାଦିରଙ୍କ ପରିବାରକୁ ମିଳିବ ତ ନ୍ୟାୟ ?  ଏ ସମସ୍ତ ପ୍ରଶ୍ନ ଏବେ ପୋଲିସ ଉପରେ ପ୍ରଶ୍ନବାଚୀ ସାଜିଛି