କନକ ବ୍ୟୁରୋ : ୨୫ କୋଟିରେ ନିର୍ମାଣ ହେଲା ସମନ୍ବୟ ଭିତ୍ତିଭୂମି କମ୍ପ୍ଲେକ୍ସ । ବଡ଼ ବଡ଼ ସ୍ବପ୍ନ ଦେଖାଇ ପାଣି ଭଳି ଅର୍ଥ ଖର୍ଚ୍ଚ ହେଲା । ଏବେ କିନ୍ତୁ ପ୍ରାୟ ୬୦ ପ୍ରତିଶତ ଭିତ୍ତିଭୂମି ଅବ୍ୟବହୃତ ହୋଇ ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି । କୋଟି କୋଟି ଟଙ୍କାର ସାମଗ୍ରୀ ଖତ ଖାଉଥିବା ବେଳେ ପ୍ରଶାସନର ଅବହେଳା ଚରମସୀମାରେ । 

Advertisment

ଲକ୍ଷ୍ୟ ଥିଲା ନିରାଶ୍ରହ, ବାସହୀନ, ଭିକ୍ଷୁକ, ମାନସିକ ବିକାରଗ୍ରସ୍ତ, କିନ୍ନରଙ୍କୁ ମିଳିବ ବାସସ୍ଥାନ । ସେମାନଙ୍କୁ ତାଲିମ ଦେଇ ଦକ୍ଷତା ବିକାଶ କରାଯିବ । ରାଜ୍ୟରେ ପାଇଲଟ୍‌ ପ୍ରୋଜେକ୍ଟ ଭାବେ ନିର୍ମାଣ ହୋଇଥିଲା ବିଶାଳ ସମନ୍ବୟ ଭିତ୍ତିଭୂମି କେନ୍ଦ୍ର । ଉଦ୍‌ଘାଟନ ସମୟରେ କିଛି ଭିକ୍ଷୁକଙ୍କୁ ଉଠାଇଆଣି ଫଟୋସୁଟ୍ ମଧ୍ୟ ହୋଇଥିଲା । କିନ୍ତୁ ଏବେ ଏମିତି ଲାଗୁଛି ଯେମିତି ୨୫କୋଟି ଟଙ୍କା ପାଣିରେ ପଡ଼ିଛି । ଲକ୍ଷ ଲକ୍ଷ ଟଙ୍କାର ବ୍ୟାଟେରି ଚାଳିତ ଗାଡ଼ି ଖତ ଖାଉଛି । ଶହ ଶହ ବେଞ୍ଚ ଡେସ୍କ ବ୍ୟବହାର ନହୋଇ ପଡ଼ିରହିଛି । କମ୍ପ୍ଲେକ୍ସର ୪୦ ରୁ ଅଧିକ ରୁମ୍‌ରେ ତାଲା ପଡ଼ିଛି । ଭିନ୍ନକ୍ଷମଙ୍କ ପାଇଁ କିଣାଯାଇଥିବା ହ୍ବିଲ ଚେୟାର ରୁମ୍‌ରେ ତାଲା । ବାରଣ୍ଡାରେ ଧୂଳିର ମୋଟା ଆସ୍ତରଣ । ଏହାର ପାର୍ଶ୍ବରେ ପ୍ରାୟ ସମାନ ଲକ୍ଷ୍ୟ ରଖି ୧୪ କୋଟି ଖର୍ଚ୍ଚରେ ନିର୍ମାଣ ହେଉଛି ଆଉ ଏକ କମ୍ପ୍ଲେକ୍ସ । ଏପଟେ ଏହାର ରକ୍ଷଣାବେକ୍ଷଣର ଦାୟିତ୍ବ କାହାର ତା’କୁ ନେଇ ଦ୍ବନ୍ଦ୍ବ । ଇଡକୋ କହୁଛି, ଜିଲ୍ଲା ସାମାଜିକ ସୁରକ୍ଷା ବିଭାଗକୁ ଏହା ହସ୍ତାନ୍ତର କରାଯାଇଛି । ଏପଟେ ଜିଲ୍ଲା ସାମାଜିକ ସୁରକ୍ଷା ଅଧିକାରୀ କହୁଛନ୍ତି ଫାଇଲ ଇଡକୋ ପାଖରେ ଅଛି । 

୬ ଶହ ଜଣଙ୍କ ପାଇଁ ନିର୍ମାଣ ହୋଇଥିବା ଏହି ବିଶାଳ କମ୍ପ୍ଲେକ୍ସରେ ୧୫୦ରୁ ବି କମ୍ ଲୋକ ରହୁଛନ୍ତି । ବିଭାଗର ସୂଚନା ଅନୁସାରେ ୭୮ ଜଣ ମାନସିକ ବିକାରଗ୍ରସ୍ତ ଲୋକ ରହୁଥିବା ବେଳେ ୫୨ଜଣ ଭିନ୍ନକ୍ଷମ ଛାତ୍ରଛାତ୍ରୀ ଓ ୬ ଜଣ ମାନସିକ ଅନଗ୍ରସର ଛାତ୍ରଛାତ୍ରୀ ରହୁଛନ୍ତି । କମ୍ପ୍ଲେକ୍ସର ୧୩୧ଟି ରୁମ ମଧ୍ୟରୁ କେବଳ ୮୭ ଟି ରୁମ୍ ବ୍ୟବହାର ହେଉଛି । ଏପଟେ ସଫେଇ ବାବଦକୁ ୭ ମାସ ମଧ୍ୟରେ ୨ଲକ୍ଷ ୧୧ହଜାର ଟଙ୍କା ଖର୍ଚ୍ଚ ହୋଇଛି । କିନ୍ତୁ ସଫେଇ କେଉଁଠି ଓ କ’ଣ ହେଉଛି ତାହା ଖୋଜିଲେ ମଧ୍ୟ ମିଳୁନାହିଁ । ଅବ୍ୟବହୃତ ହୋଇ ପଡ଼ିରହିଛି ୨୫ କୋଟିର ମହଲ, ଅନ୍ୟପଟେ ପୁଣି ୧୪ କୋଟି ଖର୍ଚ୍ଚରେ ନିର୍ମାଣ ହେଉଛି ଆଉ ଏକ ବିଶାଳ ବିଲ୍ଡିଂ, ଏହାକୁ ନେଇ ବଢୁଛି ଅସନ୍ତୋଷ ।