ସଲମାନ ଖାନଙ୍କ ଘର ଉପରକୁ ଗୁଳି ଚଳାଇବା ମାମଲା । ଭାରତ ଫେରିବ ଲରେନ୍ସ ବିଷ୍ଣୋଇର ସାନଭାଇ । ମୁମ୍ବାଇ ପୋଲିସ ଆରମ୍ଭ କଲା ପ୍ରତ୍ୟାର୍ପଣ ପ୍ରକ୍ରିୟା

କନକ ବ୍ୟୁରୋ : ଅଭିନେତା ସଲମାନ ଖାନଙ୍କ ଘର ଉପରେ ହୋଇଥିବା ଗୁଳିମାଡ ଘଟଣାରେ ମୁମ୍ବାଇ ପୋଲିସ ଆକ୍ସନମୋଡକୁ ଆସିଛି । ଏହି କ୍ରମରେ ଆମେରିକାରେ ରହୁଥିବା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ସାନ ଭାଇ ଅନମୋଲକୁ ଭାରତ ଫେରାଇଆଣିବାକୁ ମୁମ୍ବାଇ ପୋଲିସ ପ୍ରସ୍ତୁତି ଆରମ୍ଭ କରିଛି । ପୋଲିସର ସୂତ୍ର ସୂଚନା ମୁତାବକ ବିଶେଷ ମହାରାଷ୍ଟ୍ର ସଂଗଠିତ ଅପରାଧ ନିୟନ୍ତ୍ରଣ ଅଧିନିୟମ କ୍ରମରେ ଅଦାଲତ ଅନମୋଲର ଗିରଫ ପାଇଁ ପ୍ରଥମରୁ ଜାମିନି ବିହୀନ ଗିରଫ ପରୱାନା ଜାରି କରିଥିଲା । ଏହା ସହ ବିଦେଶରେ ତାକୁ ଖୋଜିବା ପାଇଁ ରେଡକର୍ନର ନୋଟିସ ମଧ୍ୟ ଜାରି କରାଯାଇଛି । ଅକ୍ଟୋବର ୧୬ ତାରିଖରେ ମୁମ୍ବାଇ ପୋଲିସର ଅନୁରୋଧକୁ ଅଦାଲତ ଅନୁମତି ଦେଇଥିଲେ । 

ଅନମୋଲ ବିଷ୍ଣୋଇ ଲରେନ୍ସ ବିଷ୍ଣୋଇର ସାନ ଭାଇ । ଲରେନ୍ସ ଭଳି ଅନମୋଲ ମଧ୍ୟ ଅପରାଧ ଦୁନିଆରେ ସକ୍ରିୟ ରହିଛି । କୁହାଯାଉଛି କି, ଅନମୋଲ ଆମେରିକା ଓ କାନାଡାରେ ନିଜର ଗ୍ୟାଙ୍ଗ ଚଳାଉଛି । ଅନମୋଲକୁ ନେଇ ଜାତୀୟ ଯାଂଚ ଏଜେନ୍ସି ବା ଏନଆଇଏ ତରଫରୁ ୧୦ ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରିଥିଲା ।