କନକ ବ୍ୟୁରୋ:  କ୍ରିକେଟର ଭଗବାନ କୁହାଯାଉଥିବା ସଚିନ ତେନ୍ଦୁଲକରଙ୍କ ପରିବାରରେ ଖୁବ ଶୀଘ୍ର ଶାହାନାଇ ବାଜିବାକୁ ଯାଉଛି । ତାଙ୍କ ପୁଅ ଅର୍ଜୁନ ତେନ୍ଦୁଲକର ନିକଟରେ ତାଙ୍କର ଦୀର୍ଘଦିନର ବାନ୍ଧବୀ ସାନିଆ ଚାନ୍ଦୋକଙ୍କ ସହ ନିର୍ବନ୍ଧ କରିଛନ୍ତି  ।  ଏହି ଖବର ସାମ୍ନାକୁ ଆସିବା ପରେ ସମସ୍ତଙ୍କ ମନରେ ସାନିଆଙ୍କୁ ନେଇ ଉତ୍କଣ୍ଠା ବଢିଯାଇଛି । ସାନିଆ କେବଳ ଏକ କୋଟିପତି ପରିବାରର ନୁହଁନ୍ତି, ବରଂ ନିଜେ ମଧ୍ୟ ଜଣେ ସଫଳ ମହିଳା ଉଦ୍ୟୋଗୀ ।  

Advertisment

ସାନିଆ ଚାନ୍ଦୋକ ମୁମ୍ବାଇର ଏକ ଜଣାଶୁଣା ବ୍ୟବସାୟୀ ପରିବାରରୁ ଆସିଛନ୍ତି । ସେ ପ୍ରଖ୍ୟାତ ଶିଳ୍ପପତି ରବି ଘାଇଙ୍କ ନାତୁଣୀ । ଘାଇ ପରିବାର ହସ୍ପିଟାଲିଟି ଏବଂ ଖାଦ୍ୟ ଶିଳ୍ପରେ ଏକ ବଡ଼ ନାମ । ସେମାନେ ଇଣ୍ଟରକଣ୍ଟିନେଣ୍ଟାଲ ମେରାଇନ ଡ୍ରାଇଭ ହୋଟେଲ ଏବଂ ଲୋ-କ୍ୟାଲୋରୀ ଆଇସକ୍ରିମ ବ୍ରାଣ୍ଡ 'ବ୍ରୁକଲିନ କ୍ରିମେରୀ'ର ମାଲିକ ଅଟନ୍ତି ।   ରିପୋର୍ଟ ଅନୁଯାୟୀ, ତାଙ୍କ ପରିବାରର ମୋଟ ସମ୍ପତ୍ତି ପ୍ରାୟ ୧୬ ବିଲିୟନ ଟଙ୍କା, ଯାହାକି ସଚିନ ତେନ୍ଦୁଲକରଙ୍କ ମୋଟ ସମ୍ପତ୍ତିଠାରୁ ମଧ୍ୟ ଅଧିକ ।  ସାନିଆ ଲଣ୍ଡନ ସ୍କୁଲ ଅଫ ଇକୋନୋମିକ୍ସରୁ ସ୍ନାତକ ଡିଗ୍ରୀ ହାସଲ କରିଛନ୍ତି  ।

ପେଟ୍ ସ୍ପାର ପ୍ରତିଷ୍ଠାତା:

ଏକ ବ୍ୟବସାୟିକ ପରିବାରରୁ ଆସିଥିଲେ ମଧ୍ୟ ସାନିଆ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ପଶୁମାନଙ୍କ ପ୍ରତି ଥିବା ଭଲପାଇବା କାରଣରୁ ସେ 'ମିଷ୍ଟର ପଜ୍' (Mr. Paws) ନାମକ ଏକ ପେଟ୍ ସ୍ପା ଏବଂ ଷ୍ଟୋରର ପ୍ରତିଷ୍ଠାତା ଅଟନ୍ତି ।  ସେ ୨୦୨୨ ମସିହାରେ ପ୍ରାୟ ୯୦ ଲକ୍ଷ ଟଙ୍କାର ପୁଞ୍ଜିରେ ଏହି ବ୍ୟବସାୟ ଆରମ୍ଭ କରିଥିଲେ ।

ଅର୍ଜୁନ ତେନ୍ଦୁଲକରଙ୍କ ସହ ସମ୍ପର୍କ:

ଅର୍ଜୁନ ତେନ୍ଦୁଲକର ଏବଂ ସାନିଆ ଚାନ୍ଦୋକଙ୍କ ନିର୍ବନ୍ଧ ଅଗଷ୍ଟ ୧୩ ତାରିଖରେ ଏକ ବ୍ୟକ୍ତିଗତ ପାରିବାରିକ ଉତ୍ସବରେ ସମ୍ପନ୍ନ ହୋଇଥିଲା । ଏଥିରେ ଉଭୟ ପରିବାରର ନିକଟତମ ସଦସ୍ୟ ଏବଂ ବନ୍ଧୁମାନେ ଉପସ୍ଥିତ ଥିଲେ ।  ସାନିଆ, ଅର୍ଜୁନଙ୍କ ଭଉଣୀ ସାରା ତେନ୍ଦୁଲକରଙ୍କର ମଧ୍ୟ ଜଣେ ଭଲ ବନ୍ଧୁ ବୋଲି ଜଣାପଡିଛି ।  

ଅର୍ଜୁନ ତେନ୍ଦୁଲକର, ଯିଏକି ଜଣେ ବାମହାତୀ ଦ୍ରୁତ ବୋଲର ଏବଂ ଅଲରାଉଣ୍ଡର । ଆଇପିଏଲରେ ମୁମ୍ବାଇ ଇଣ୍ଡିଆନ୍ସ ଦଳର ଅଂଶ ଅଟନ୍ତି ଏବଂ ଘରୋଇ କ୍ରିକେଟରେ ଗୋଆ ପାଇଁ ଖେଳନ୍ତି । ଏହି ନିର୍ବନ୍ଧ ପରେ ତେନ୍ଦୁଲକର ଏବଂ ଘାଇ ପରିବାର ମଧ୍ୟରେ ଏକ ନୂଆ ସମ୍ପର୍କ ଯୋଡି ହୋଇଛି । ଏବଂ ଖୁବ ଶୀଘ୍ର ଉଭୟ ବିବାହ ବନ୍ଧନରେ ଆବଦ୍ଧ ହେବେ ବୋଲି ଆଶା କରାଯାଉଛି ।