ଶେଷ ହେବ କି ୟୁକ୍ରେନ-ଋଷ ଯୁଦ୍ଧ  !  ପୁଟିନଙ୍କ ସହ ଟ୍ରମ୍ପଙ୍କ ଭେଟ୍‌ଘାଟ୍‌ କଣ ଦେଉଛି  ସଙ୍କେତ

କନକ ବ୍ୟୁରୋ: ଶେଷ ହେବ  ୟୁକ୍ରେନ-ଋଷ ଯୁଦ୍ଧ । ଏଭଳି ଆଭାସ୍‌ ଦେଉଛି  ପୁଟିନଙ୍କ ସହ ଟ୍ରମ୍ପଙ୍କ ଭେଟ୍‌ଘାଟ୍‌ ।  ଆଜ୍ଞା ହଁ କାରଣ ସାକ୍ଷାତ ପରେ ପୁଟିନ୍‌ଙ୍କ ହାବଭାବରେ ଖୁବ୍‌ ପରିବର୍ତ୍ତନ ନଜର ଆସିଛି । ଆଲାସ୍କାରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକ ପରେ ଟ୍ରମ୍ପ ଏହାକୁ "ଅତ୍ୟନ୍ତ ଫଳପ୍ରଦ" ବୋଲି କହିଥିବାବେଳେ, ପୁଟିନ ଏହାକୁ "ସମୟୋପଯୋଗୀ ଏବଂ ବହୁତ ଉପଯୋଗୀ" ବୋଲି ବର୍ଣ୍ଣନା କରିଛନ୍ତି ।  ତେବେ, ଏହି ବହୁଚର୍ଚ୍ଚିତ ବୈଠକରେ ଯୁଦ୍ଧବିରାମ କିମ୍ବା ଶାନ୍ତି ରାଜିନାମା ନେଇ କୌଣସି ନିର୍ଦ୍ଦିଷ୍ଟ ଘୋଷଣା କରାଯାଇନାହିଁ ।  ତଥାପି ଅନୁମାନ କରାଯାଇଛି ଯୁଦ୍ଧ ବନ୍ଦ ହେବାନେଇ  । 

ଏହି ବୈଠକର ସବୁଠାରୁ ବଡ଼ ପରିବର୍ତ୍ତନ ହେଉଛି ଟ୍ରମ୍ପଙ୍କ ଆଭିମୁଖ୍ୟରେ ପରିବର୍ତ୍ତନ । ପୂର୍ବରୁ ଯୁଦ୍ଧବିରାମ ପରେ ଶାନ୍ତି ଆଲୋଚନା ପାଇଁ କହୁଥିବା ଟ୍ରମ୍ପ, ଏବେ ସିଧାସଳଖ ଶାନ୍ତି ରାଜିନାମା ଉପରେ ଗୁରୁତ୍ୱ ଦେଉଛନ୍ତି ।  ଏହା ପୁଟିନଙ୍କ ଦୀର୍ଘ ଦିନର ଦାବି ସହ ମେଳ ଖାଉଥିବାରୁ, ଏହାକୁ ଋଷ ପାଇଁ ଏକ କୂଟନୈତିକ ବିଜୟ ଭାବେ ଦେଖାଯାଉଛି ।  ଏହି ବୈଠକରେ ପୁଟିନ କୌଣସି ପ୍ରକାରର ରିହାତି ନ ଦେଇ କିମ୍ବା ନୂଆ ପ୍ରତିବନ୍ଧକର ସମ୍ମୁଖୀନ ନ ହୋଇ ଫେରିଛନ୍ତି, ଯାହା ଋଷକୁ ଉତ୍ସାହିତ କରିଛି । 

ଆଲାସ୍କା ବୈଠକ ପରେ, ସମସ୍ତଙ୍କ ନଜର ଏବେ ୱାଶିଂଟନରେ ହେବାକୁ ଥିବା ଟ୍ରମ୍ପ ଏବଂ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ବୈଠକ ଉପରେ କେନ୍ଦ୍ରୀଭୂତ ହୋଇଛି ।  ଟ୍ରମ୍ପ କହିଛନ୍ତି ଯେ ଏହି ବୈଠକ ସଫଳ ହେଲେ, ପୁଟିନଙ୍କ ସହ ଏକ ତ୍ରିପାକ୍ଷିକ ବୈଠକର ଆୟୋଜନ କରାଯାଇପାରେ । 
ତେବେ, ଏହି ବୈଠକକୁ ନେଇ ଅନେକ ଆଶଙ୍କା ମଧ୍ୟ ସୃଷ୍ଟି ହୋଇଛି । କୂଟନୈତିକ ବିଶେଷଜ୍ଞମାନେ ଆଶଙ୍କା କରୁଛନ୍ତି ଯେ ଟ୍ରମ୍ପ, ଜେଲେନସ୍କିଙ୍କ ଉପରେ କିଛି ଅଞ୍ଚଳ ଋଷକୁ ଛାଡିଦେବା ପାଇଁ ଚାପ ପକାଇ ପାରନ୍ତି ।  ରିପୋର୍ଟ ଅନୁଯାୟୀ, ପୁଟିନ ସମ୍ପୂର୍ଣ୍ଣ ଡୋନେସ୍କ ଅଞ୍ଚଳ  ନିଜ  ନିୟନ୍ତ୍ରଣକୁ ନେଇ    ଯୁଦ୍ଧ ରୋକିବାକୁ ପ୍ରସ୍ତାବ ଦେଇଛନ୍ତି । କିନ୍ତୁ  ଜେଲେନସ୍କି ପୂର୍ବରୁ ଅନେକ ଥର ନିଜ ଦେଶର କୌଣସି ଅଂଶ ଛାଡିବାକୁ ମନା କରିଆସିଛନ୍ତି ।  

ତୁଫାନ ପୂର୍ବର ଶାନ୍ତି?
ଏହି ସମଗ୍ର ଘଟଣାକ୍ରମକୁ ଦେଖିଲେ, ଏହା ଶାନ୍ତିର ଏକ ନୂଆ ଆଶା ସଞ୍ଚାର କରୁଥିବାବେଳେ ଏକ ଅନିଶ୍ଚିତତା ମଧ୍ୟ ସୃଷ୍ଟି କରୁଛି ।
ଶାନ୍ତିର ସମ୍ଭାବନା ଏହା  ଯେ, ଆମେରିକା ଏବଂ ଋଷ ମଧ୍ୟରେ ଉଚ୍ଚସ୍ତରୀୟ ଆଲୋଚନା ଏକ ସକାରାତ୍ମକ ପଦକ୍ଷେପ ।

ଯଦି ତ୍ରିପାକ୍ଷିକ ବୈଠକ ସଫଳ ହୁଏ, ତେବେ ଯୁଦ୍ଧର ଅନ୍ତ ଘଟିପାରେ ।

ଆହୁରି ବଡ଼ ଧରଣର ଯୁଦ୍ଧର  ଆଶଙ୍କା ଏଇଥିପାଇଁ ଯେ,

•    ଟ୍ରମ୍ପଙ୍କ ଆଭିମୁଖ୍ୟରେ ପରିବର୍ତ୍ତନକୁ ଋଷ ନିଜର ବିଜୟ ଭାବେ ଦେଖୁଛି, ଯାହା ତାକୁ ଆହୁରି ଆକ୍ରମଣାତ୍ମକ କରିପାରେ ।
•    ଯଦି ୟୁକ୍ରେନ ଉପରେ କୌଣସି ଅସମାନ ଚୁକ୍ତି ଲଦି ଦିଆଯାଏ, ତେବେ ଏହା ଏକ ଅସ୍ଥାୟୀ ଶାନ୍ତି ହେବ ଏବଂ ଭବିଷ୍ୟତରେ ଆହୁରି ବଡ଼ ସଂଘର୍ଷର କାରଣ ପାଲଟିପାରେ ।

•    ୟୁରୋପୀୟ ଦେଶମାନେ ଏହି ଆଲୋଚନାରେ ସିଧାସଳଖ ସାମିଲ ନଥିବାରୁ, ସେମାନଙ୍କ ସମର୍ଥନ ବିନା କୌଣସି ଶାନ୍ତି ଚୁକ୍ତି ସ୍ଥାୟୀ ହେବା କଷ୍ଟକର ।

ତେବେ  ଆଲାସ୍କା ବୈଠକ ଏବଂ ଆଗାମୀ ଟ୍ରମ୍ପ-ଜେଲେନସ୍କି ଆଲୋଚନା ଏକ ଗୁରୁତ୍ୱପୂର୍ଣ୍ଣ ମୋଡ । କିନ୍ତୁ ଏହା ଯୁଦ୍ଧର ସମାପ୍ତି ଘଟାଇବ ନା ଏହା କେବଳ ଏକ କୂଟନୈତିକ ଚାଲ, ତାହା ଆଗାମୀ ଦିନରେ ହିଁ ସ୍ପଷ୍ଟ ହେବ । ଯଦି ୟୁକ୍ରେନର ସାର୍ବଭୌମତ୍ୱ ଏବଂ ସୁରକ୍ଷାକୁ ସୁନିଶ୍ଚିତ କରା ନଯାଏ,  ତେବେ  ଏକ ବଡ଼ ଧରଣର ସଂଘର୍ଷ ପୂର୍ବର ନୀରବତା । ଯାହାକୁ  ନେଇ ଏବେ ଚର୍ଚ୍ଚା ଜୋର ଧରିଛି ।