କନକ ବ୍ୟୁରୋ: ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଖୁବ୍‌ ଶୀଘ୍ର ଭାରତ ଗସ୍ତରେ ଆସିବେ ବୋଲି ଆଶା କରାଯାଉଛି । ଏହି ଗସ୍ତ ଏପରି ଏକ ସମୟରେ ହେବାକୁ ଯାଉଛି ଯେତେବେଳେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ଋଷ୍‌ ଠାରୁ ତେଲ କିଣିବା ନେଇ ଚାପ ପକାଉଛନ୍ତି । ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ  ଏବଂ ରାଷ୍ଟ୍ରପତି ପୁଟିନଙ୍କ ମଧ୍ୟରେ ହେବାକୁ ଥିବା ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନେ କରାଯାଉଛି ।

Advertisment

ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଅଗଷ୍ଟ ଶେଷ ସୁଦ୍ଧା ଭାରତ ଗସ୍ତରେ ଆସିପାରନ୍ତି ବୋଲି ଇଣ୍ଟରଫ୍ୟାକ୍ସ ନ୍ୟୁଜ୍ ଏଜେନ୍ସି ଭାରତର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସୂତ୍ରରୁ ପ୍ରକାଶ କରିଛି ।  ଏହା ପୂର୍ବରୁ ଋଷର ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭ ମଧ୍ୟ ପୁଟିନଙ୍କ ଭାରତ ଗସ୍ତ ବିଷୟରେ ସୂଚନା ଦେଇଥିଲେ । ଏହି ଗସ୍ତ ସମୟରେ ଦୁଇ ନେତାଙ୍କ ମଧ୍ୟରେ ବହୁପକ୍ଷୀୟ ସମ୍ପର୍କର ସମୀକ୍ଷା କରାଯିବ ଏବଂ ବିଭିନ୍ନ ଆଞ୍ଚଳିକ ତଥା ବିଶ୍ୱସ୍ତରୀୟ ପ୍ରସଙ୍ଗରେ ଆଲୋଚନା ହେବ ।  

ମୋଦୀ-ପୁଟିନ ବୈଠକର ଗୁରୁତ୍ୱ
ଭାରତ ଏବଂ ଋଷ ମଧ୍ୟରେ ଏକ ବିଶେଷ ଏବଂ ସମ୍ମାନଜନକ ରଣନୈତିକ ଭାଗିଦାରୀ ରହିଛି ।  ଦୁଇ ଦେଶ ମଧ୍ୟରେ ପ୍ରତିରକ୍ଷା, ପରମାଣୁ ଶକ୍ତି, ଆତଙ୍କବାଦ ବିରୋଧୀ ସହଯୋଗ ଏବଂ ମହାକାଶ ଗବେଷଣା ଭଳି ପାଞ୍ଚଟି ପ୍ରମୁଖ କ୍ଷେତ୍ରରେ ସହଯୋଗ ରହିଛି । ଏହି ଗସ୍ତ ସମୟରେ ଶକ୍ତି, ବାଣିଜ୍ୟ, ଉତ୍ପାଦନ ଏବଂ ସାର କ୍ଷେତ୍ରରେ ସହଯୋଗ ବୃଦ୍ଧି କରିବା ଉପରେ ଗୁରୁତ୍ୱ ଦିଆଯିବ ବୋଲି ଆଶା କରାଯାଉଛି । ୟୁକ୍ରେନ ସଙ୍କଟ ଉପରେ ମଧ୍ୟ ଆଲୋଚନା ହେବାର ସମ୍ଭାବନା ରହିଛି, ଯେଉଁଥିରେ ଭାରତ ଆଲୋଚନା ଏବଂ କୂଟନୀତି ମାଧ୍ୟମରେ ସମାଧାନ ପାଇଁ ନିଜର ପକ୍ଷ ରଖିପାରେ । 

ଟ୍ରମ୍ପ ଋଷ୍‌ ଠାରୁ ଭାରତର ତେଲ କ୍ରୟକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ଏବଂ ଭାରତୀୟ ଆମଦାନୀ ଉପରେ ଅତିରିକ୍ତ ଶୁଳ୍କ ଲଗାଇଛନ୍ତି ।   ଏହା ସତ୍ତ୍ୱେ ଭାରତ ଋଷ ସହିତ ନିଜର ବାଣିଜ୍ୟିକ ସମ୍ପର୍କ ଜାରି ରଖିଛି ଏବଂ ଆମେରିକାର ଏହି ପଦକ୍ଷେପକୁ "ଅନ୍ୟାୟପୂର୍ଣ୍ଣ" ବୋଲି କହିଛି । ଚଭାରତ ନିଜର ଜାତୀୟ ସ୍ୱାର୍ଥ ରକ୍ଷା ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ନେବ ବୋଲି ସ୍ପଷ୍ଟ କରିଛି ।  ଭାରତର ଏହି ଦୃଢ଼ ମନୋଭାବକୁ ଋଷ ସମର୍ଥନ କରିଛି ଏବଂ ଆମେରିକାର ଚାପକୁ ବେଆଇନ ବୋଲି କହିଛି ।