କନକ ବ୍ୟୁରୋ : ଶାସକ-ବିରୋଧୀ ଛକାପଞ୍ଝାରେ ଗ୍ରାମାଞ୍ଚଳର ବିକାଶ ବିନାଶ ଆଡ଼କୁ ଗତି କରୁଛି । ରାଜ୍ୟର ଅନେକ ଲୋକ ପ୍ରତିନିଧି ବି ଏଥିରେ ବଳି ପଡ଼ୁଛନ୍ତି । କିଏ ନିଜ ପରିବାରକୁ ବଞ୍ଚାଇବାକୁ ଦାଦନ ଖଟିବାକୁ ଯାଉଛି ତ’ ଆଉ କିଏ ମୂଲ ଲାଗୁଛି । ନିଆଳି ପଞ୍ଚାୟତ ପୁବଖଣ୍ଡ ମୁଣ୍ଡାସାହି ଗାଁର ମମତା ଚାମ୍ପିଆ , କାନ୍ଧରେ କୋଦାଳ ପକାଇ କାମକୁ ବାହାରିଛନ୍ତି । ମୂଲ ଲାଗିଲେ ଘର ଚଳିବ । ୩୮ ବର୍ଷିଆ ସମିତି ସଭ୍ୟା , ପରିବାର ପୋଷିବା ପାଇଁ ଗାଁ ଗଣ୍ଡାରେ ମୂଲ ମଜୁରି କରୁଛନ୍ତି । ସ୍ବାମୀ ଭାସ୍କର ଚାମ୍ପିଆଙ୍କ ଅକାଳ ବିୟୋଗ ପରେ ପ୍ରତିଦିନ ସଂଘର୍ଷ କରୁଛନ୍ତି ଏହି ନାରୀନେତ୍ରୀ । 

Advertisment

ଗତ ପଞ୍ଚାୟତ ନିର୍ବାଚନରେ ନିଆଳି ପଞ୍ଚାୟତର ସମିତି ସଭ୍ୟା ଭାବେ ନିର୍ବାଚିତ ହୋଇଥିଲେ ମମତା । ଆଶା ଥିଲା ଲୋକଙ୍କ ସେବା କରିବା ସହ ପଞ୍ଚାୟତର ବିକାଶ କ୍ଷେତ୍ରରେ ବାହକ ସାଜିବେ । ହେଲେ ଏସବୁ ଆଶା ଆଶାରେ ରହିଯାଇଛି । ସରକାରଙ୍କ ସହଯୋଗ ମିଳୁନଥିବାରୁ ପଞ୍ଚାୟତ ସ୍ତରରେ ବିକାଶମୂଳକ କାମ ହୋଇପାରୁନଥିବା ଅଭିଯୋଗ ହୋଇଛି । ରାଜନୈତିକ ଛକାପଞ୍ଝା ଭିତରେ ଗାଁ ବିକାଶ ଠପ୍‌ ହୋଇଯାଇଥିବା ଗ୍ରାମାଞ୍ଚଳ ଜନ ପ୍ରତିନିଧି ଅଭିଯୋଗ ଆଣିଛନ୍ତି  ।ସରକାରଙ୍କ ପାଖରୁ ମିଳୁଥିବା ସ୍ବଳ୍ପ ବେତନରେ ଚଳିବା କଷ୍ଟ ହେଉଥିବାରୁ ମମତାଙ୍କ ଭଳି ଅନେକ ଲୋକ ପ୍ରତିନିଧି ବଞ୍ଚିବାକୁ ଅହରହ ସଂଗ୍ରାମ କରୁଛନ୍ତି ।